2011 جىلعى 2 شىلدە, استانا, ۇكىمەت ءۇيى
تەمىر جول ۆوكزالدارى قىزمەتىن ۇيىمداستىرۋ قاعيداسىن بەكىتۋ تۋرالى
«تەمىر جول كولىگى تۋرالى» قازاقستان رەسپۋبليكاسىنىڭ 2001 جىلعى 8 جەلتوقسانداعى زاڭىنىڭ 14-بابى 1-تارماعىنىڭ 20) تارماقشاسىنا سايكەس قازاقستان رەسپۋبليكاسىنىڭ ۇكىمەتى قاۋلى ەتەدى:
1. قوسا بەرىلىپ وتىرعان تەمىر جول ۆوكزالدارى قىزمەتىن ۇيىمداستىرۋ قاعيداسى بەكىتىلسىن.
2. وسى قاۋلى العاشقى رەسمي جاريالانعان كۇنىنەن باستاپ كۇنتىزبەلىك ون كۇن وتكەن سوڭ قولدانىسقا ەنگىزىلەدى.
قازاقستان رەسپۋبليكاسىنىڭ پرەمەر-ءمينيسترى ك.ءماسىموۆ.
قازاقستان رەسپۋبليكاسى ۇكىمەتىنىڭ
2011 جىلعى 2 شىلدەدەگى № 759 قاۋلىسىمەن بەكىتىلگەن
تەمىر جول ۆوكزالدارى قىزمەتىن ۇيىمداستىرۋ قاعيداسى
1. جالپى ەرەجەلەر
1. تەمىر جول ۆوكزالدارى قىزمەتىن ۇيىمداستىرۋ قاعيداسى (بۇدان ءارى - قاعيدا) «تەمىر جول كولىگى تۋرالى» قازاقستان رەسپۋبليكاسىنىڭ 2001 جىلعى 8 جەلتوقسانداعى زاڭىنىڭ 14-بابى 1-تارماعىنىڭ 20) تارماقشاسىنا سايكەس ازىرلەندى, جولاۋشىلارعا تەمىر جول ۆوكزالدارىندا قاۋىپسىز جانە ساپالى قىزمەت كورسەتۋدى قامتاماسىز ەتۋگە باعىتتالعان قازاقستان رەسپۋبليكاسىندا تەمىر جول ۆوكزالدارى قىزمەتىن ۇيىمداستىرۋ ءتارتىبىن بەلگىلەيدى.
2. وسى قاعيدا قازاقستان رەسپۋبليكاسىنىڭ اۋماعىندا ورنالاسقان بارلىق تەمىر جول ۆوكزالدارىنا قولدانىلادى.
2. تەمىر جول ۆوكزالدارى قىزمەتىن ۇيىمداستىرۋ
3. تەمىر جول ۆوكزالدارى تاسىمالداۋ پروتسەسىنىڭ اجىراماس بولىگى بولىپ تابىلادى جانە قىزمەتىن تاۋلىك بويى جۇزەگە اسىرادى.
4. تەمىر جول ۆوكزالىنىڭ تەحنولوگيالىق ماقساتى جولاۋشىلاردىڭ تەمىر جول ستانتسيالارىنا كەلۋى جانە جونەلتىلۋى كەزىندە ولارعا قاۋىپسىز, ساپالى قىزمەت كورسەتىلۋىن قامتاماسىز ەتۋ جانە حالىققا قىزمەتتەر كورسەتۋ بولىپ تابىلادى.
5. تەمىر جول ۆوكزالدارىندا بيلەت كاسسالارى, كۇتۋگە ارنالعان ءۇي-جايلار, سانيتارلىق-تۇرمىستىق ءۇي-جايلار (دارەتحانا بولمەلەرى) جانە اقپاراتتىق قىزمەت كورسەتۋ وبەكتىلەرى (تابلو, ستەندتەر, داۋىس زورايتقىش بايلانىسى, انىقتامالىقتار), مەديتسينالىق پۋنكت, قوعامدىق ءتارتىپتى قورعاۋ پۋنكتى بولۋى ءتيىس.
6. جولاۋشىلار پلاتفورمالارى مەن پەرروندارعا ءوتۋ جانە شىعۋ مۇگەدەكتەر مەن حالىقتىڭ باياۋ قيمىلدايتىن توپتارىنا قولجەتىمدى بولۋعا (پاندۋستارمەن, مامانداندىرىلعان ليفتىلەرمەن جابدىقتالۋعا) ءتيىس.
7. تەمىر جول ۆوكزالدارىندا جول ءجۇرۋ قۇجاتتارىن (بيلەتتەردى) ساتۋدى قامتاماسىز ەتۋ ءۇشىن ءۇي-جايلار ۇسىنۋدى بارلىق تاسىمالداۋشىلار تەڭ نەگىزدە جۇزەگە اسىرادى.
8. تەمىر جول ۆوكزالدارىندا مەديتسينالىق پۋنكتتەردىڭ بولۋىن:
1) جەكە نەمەسە زاڭدى تۇلعالار مەديتسينالىق قىزمەتتەر كورسەتۋگە مۇددەلى بولعان كەزدە ولارمەن مەديتسينالىق قىزمەتتەر ۇسىنۋ جونىندە شارتتار جاساسۋ ارقىلى;
2) ۆوكزال يەلەرى دەربەس قامتاماسىز ەتەدى.
9. تاسىمالداۋ پروتسەسىمەن بايلانىستى انىقتاما-اقپاراتتىق قىزمەتتەر تۇرعىندارعا تەگىن كورسەتىلەدى, اتاپ ايتقاندا:
1) اقپاراتتىق ستەندتەر, تابلو جانە ت.ب ارقىلى كوزبەن شولۋ اقپاراتى ارقىلى:
- جولاۋشىلار پوەزىنىڭ كەلۋى جانە ءجۇرۋى تۋرالى اقپارات;
- جولاۋشىلار پوەزدارىنىڭ ءجۇرۋ كەستەسى;
- جولاۋشىلار تاسىمالىن ورىندايتىن تاسىمالداۋشىلار تۋرالى مالىمەت;
- تەمىر جول ۆوكزالىنداعى جولاۋشىلاردىڭ قۇقىقتارى مەن مىندەتتەرى تۋرالى اقپارات.
2) اقپاراتتىق قىزمەت بويىنشا اۋىزشا جانە (نەمەسە) راديوترانسلياتسيالىق اقپارات ارقىلى:
جولاۋشىلار پوەزىنىڭ ناقتى كەلۋ ۋاقىتى, ءجۇرۋى جانە (نەمەسە) بوگەلۋى;
- جولاۋشىلار پوەزىنىڭ بەرىلەتىن جانە جۇرەتىن جولى تۋرالى;
10. اقىلى نەگىزىندە قوسىمشا (سەرۆيستىك) اقپاراتتىق قىزمەتتەر كورسەتىلەدى:
1) كۇتىپ الاتىن جانە شىعارىپ سالاتىن جولاۋشىلاردىڭ ءوتىنىشى بويىنشا داۋىس زورايتقىشپەن حابارلاندىرۋ;
2) تاسىمالداۋشىلاردىڭ قىزمەتى جانە ۆوكزالدا ورنالاسقان كوممەرتسيالىق قۇرىلىمداردىڭ قىزمەتتەرى تۋرالى جارنامالىق سيپاتتاعى حابارلاندىرۋ.
11. قوعامدىق ءتارتىپتى قورعاۋ پۋنكتتەرىنە ارنالعان ءۇي-جايلار كوممۋنالدىق تولەمدەردى, بايلانىس تولەمدەرىن قوسپاعاندا, وتەۋسىز ۇسىنىلادى.
12. تەمىر جول ۆوكزالدارىندا:
1) ۆوكزالداردىڭ, بوس ءۇي-جايلارى تەحنولوگيالىق مۇمكىندىكتەرى بولعان جاعدايدا كۇتۋ زالدارىندا پوەزدىڭ كەلۋىن كۇتۋ قامتاماسىز ەتىلەدى;
2) جولاۋشىلارعا قىزمەت كورسەتۋمەن جانە تاسىمالداۋمەن بايلانىستى قىزمەتتەر كورسەتۋ ءۇشىن ءۇي-جايلار ۇسىنۋعا رۇقسات بەرىلەدى;
3) ۆوكزال عيماراتىنا, پەرروندارعا كىرەتىن/شىعاتىن وتپەلەردى, وتىرعىزۋ پلاتفورمالارىن, جاياۋ جۇرگىنشى كوپىرلەرىن, توسەنىشتەردى, توننەلدەردى قول جۇگىمەن, باگاجبەن, باسقا زاتتارمەن بوگەۋگە جول بەرىلمەيدى;
4) ۆوكزال اۋماعىندا 15 جاسقا تولماعان ادامداردىڭ ەرەسەكتەردىڭ قاراۋىنسىز بولۋىنا جول بەرىلمەيدى;
5) جولاۋشىلارعا قىزمەت كورسەتۋگە ارنالگان ءۇي-جايلاردى ولارعا قىزمەت ەتۋمەن بايلانىستى ەمەس ماقساتتار ءۇشىن پايدالانۋعا جول بەرىلمەيدى;
6) مەديتسينالىق پۋنكتتەر ءبىرىنشى قاباتتا ورنالاستىرىلادى جانە پەرروندارعا, ۆوكزال ماڭىنداعى الاڭدارعا جانە جولاۋشىلاردىڭ كۇتۋ زالدارىنا ەركىن كىرۋگە بولادى;
7) ۆوكزال پەرروندارىندا پاۆيلوندار مەن دۇڭگىرشەكتەر ورنالاستىرۋ قامتاماسىز ەتىلەدى.
13. تەمىر جول ۆوكزالىنىڭ يەسى جولاۋشىلارعا جالپى پايدالانىلاتىن ءۇي-جايلارعا (اقىلى قىزمەتتەر كورسەتۋگە ارنالعان ءۇي-جايلاردان باسقا, فويەگە, كۇتۋ زالدارىنا, كاسسا زالىنا, جەراستى وتپەلەرىنە, جولاۋشىلار پلاتفورمالارىنا (پەرروندارعا), قوعامدىق دارەتحانالارعا جانە ت.ب.) اقىسىز كىرۋدى قامتاماسىز ەتەدى.
تەمىر جول ۆوكزالىن كۇتىپ-ۇستاۋعا بايلانىستى ونىڭ يەسىنىڭ شىعىستارىن تاسىمالداۋشى:
1) انىقتاما-اقپاراتتىق (ولشەم بىرلىگى - قىزمەت كورسەتىلگەن جولاۋشىلار پوەزى);
2) اقىلى قىزمەتتەر كورسەتۋگە ارنالعان ءۇي-جايلاردان باسقا, تاسىمالداۋ پروتسەسىن قامتاماسىز ەتۋ ماقساتىندا پايدالانىلاتىن تەمىر جول ۆوكزالىنىڭ الاڭدارىن ۇسىنۋ (ولشەم بىرلىگى -جولاۋشىلار پوەزى) قىزمەتتەرىنە اقى تولەۋ ارقىلى وتەيدى.
بۇل رەتتە, وسىمەن بالانىستى تاسىمالداۋشىنىڭ شىعىندارى بيلەتتىڭ قۇنىنا ەنگىزۋ جولىمەن وتەلەدى
14. ۆوكزالدارداعى تەمىر جول كولىگى قىزمەتكەرلەرى جولاۋشىلاردىڭ قاۋىپسىزدىگىن قامتاماسىز ەتۋگە, ولارعا قاجەتتى قولايلى جاعداي جاساۋعا, مادەنيەتتى تۇردە قىزمەت كورسەتۋگە, تەمىر جول كولىگى قىزمەتتەرىن پايدالاناتىن بارلىق ادامدارمەن قاتىناستا سىپايى جانە جايدارى بولۋى جانە ولاردان قولدانىستاعى تەمىر جول كولىگى ەرەجەلەرىنىڭ ورىندالۋىن تالاپ ەتۋى ءتيىس.
15. تەمىر جول ۆوكزالدارىندا جۇمىستار جۇرگىزۋ تەمىر جول كولىگىندە قوزعالىس قاۋىپسىزدىگىن تومەندەتپەۋى, تەمىر جول كولىگى قوزعالىسىندا ۇزىلىستەردىڭ تۋىنداۋىنا اكەلمەۋى ءتيىس.
16. تەمىر جول ۆوكزالدارىنىڭ اۋماعىنا ورتتەردى, اۆاريالاردى جانە باسقا دا دۇلەي اپاتتاردى جويۋ ءۇشىن ءورت ءسوندىرۋ جانە اۆاريالىق-قۇتقارۋ كوماندالارىنىڭ جاۋىنگەرلىك جاساقتارى, جەدەل جانە شۇعىل مەديتسينالىق كومەك بريگادالارى كەدەرگىسىز جىبەرىلەدى.
17. ۆوكزالداردا جولاۋشىلارعا كورسەتىلەتىن شۇعىل مەديتسينالىق كومەك كورسەتۋدى قوسا العاندا, مىندەتتى قىزمەتتەر تىزبەسى قازاقستان رەسپۋبليكاسىنىڭ ۇكىمەتى بەكىتەتىن جولاۋشىلاردى, جۇكتى جانە جۇكباگاجدى تاسىمالداۋ قاعيداسىندا ايقىندالادى.
18. تەمىر جول ۆوكزالدارىندا جولاۋشىلارعا جانە تۇرعىندارعا ۆوكزالداردىڭ تەحنولوگيالىق مۇمكىندىكتەرىنە بايلانىستى قىزمەتتىڭ قوسىمشا تۇرلەرى كورسەتىلۋى مۇمكىن.
19. تاسىمالداۋ پروتسەسىنە قاتىسۋشىلارعا قىزمەتتەر كورسەتۋ وتكىزىلگەن كونكۋرستاردىڭ قورىتىندىلارى بويىنشا تەمىر جول ۆوكزالدارى يەلەرىمەن جاساسقان شارتتار نەگىزىندە جۇرگىزىلەدى.
بۇل رەتتە ۆوكزالداردىڭ يەلەرى مەن تاسىمالداۋ پروتسەسىنە قاتىسۋشىلار اراسىنداعى شارتتار جاساسۋ مىناداي قاعيداتتار نەگىزگە الىنا وتىرىپ, جۇزەگە اسىرىلادى:
1) قىزمەتتەردى تۇتىنۋشىلارعا تەڭ قولجەتىمدىلىك;
2) تەڭ جاعدايلار ۇسىنۋ;
3) قىزمەتتەردى جەتكىزۋشىلەردىڭ بارلىعىنا قاتىستى بىرىڭعاي تاريفتىك ساياسات جۇرگىزۋ;
4) قىزمەتتەردى جەتكىزۋشىلەردىڭ جولاۋشىلار مەن پوەزدار قوزعالىسىنىڭ قاۋىپسىزدىگىن قامتاماسىز ەتۋ بويىنشا تالاپتاردى بۇلجىتپاي ساقتاۋ.