الماتىدا ۋنيۆەرسياداعا قىزمەت ەتەتىن ەرىكتىلەردى ىرىكتەۋ بايقاۋى اياقتالدى. مۇندا 14 مىڭنان اسا ءوتىنىم قارالدى.
ەرىكتىلەر جيناۋدىڭ ءبىرىنشى كەزەڭى 27 قىركۇيەكتە باستالدى. وتىنىمدەر بارلىعى جازباشا ساۋالناما تۇرىندە جانە ونلاين ارقىلى قابىلداندى. وسى كۇنگە دەيىن بارلىعى 14 165 ءوتىنىم قابىلدانىپ, كوپشىلىگى الماتىلىقتاردان كەلىپ ءتۇستى.
ۋنيۆەرسيادا-2017 ەرىكتىسى اتانعىسى كەلەتىندەردىڭ دەنى – رەسەيلىكتەر. ولاردان بارلىعى 3594 ادام حابارلاسقان. سونداي-اق, يتاليا, كانادا, اقش, قىتاي, ليۆان, ۇلىبريتانيا, گونكونگ, ۋكراينا, مولداۆيا, وزبەكستان سەكىلدى الىس جانە تاياۋ شەت ەلدەن دە كەلىپ ءتۇستى.
ۋنيۆەرسياداعا ەرىكتىلەر تارتۋ ماقساتىندا 15 جوعارى وقۋ ورنىمەن ىنتىماقتاستىق تۋرالى مەموراندۋمدارعا قول قويىلدى. الماتى قالاسىنىڭ 27 وقۋ مەكەمەسىندە ەرىكتىلەر باعدارلاماسىنىڭ تانىستىرىلىمدارى وتكىزىلدى. وسىنىڭ ءناتيجەسىندە اتالعان ءىس-شارالارعا قاتىسقانداردىڭ 96 پايىزى ۋنيۆەرسيادا-2017 ەرىكتىسى اتانۋعا نيەت ءبىلدىردى.
قازىرگى تاڭدا ەرىكتىلەردى ءۇيلەستىرۋمەن اينالىساتىن, ترەنينگتەر, دارىستەر مەن سپورت نىساندارىندا كۆەستەردەن وتكەن 150 ادام تاڭداپ الىندى. قازىردىڭ وزىندە ەرىكتىلەردىڭ ءبىر بولىگى 2017 جىلى الماتى قالاسىندا وتەتىن ءXXVIIى دۇنيەجۇزىلىك قىسقى ۋنيۆەرسياداعا دايىندالۋ جانە ءوتكىزۋگە ارنالعان ءىس-شارالارعا, قاتىسۋدا. ەرىكتىلەرمەن جۇمىس جۇرگىزۋدىڭ كەلەسى كەزەڭىندە كەلىسىمدەرگە قول قويىلىپ, ولارعا قاجەتتى كيىم-كەشەك بەرىلمەك. جۇمىس كەزىندە ەرىكتىلەر تاماقپەن, تەگىن جولاقىمەن جانە ۇيالى بايلانىسپەن قامتاماسىز ەتىلەدى.
ۋنيۆەرسيادا كەزىندە ەرىكتىلەر 30-دان اسا قىزمەت باعىتىندا جۇمىس جاسايتىن بولادى. ولاردىڭ كوپشىلىگى سپورت جارىستارىنداعى جۇمىستارعا تارتىلىپ, سونداي-اق, كىرىپ-شىعۋدى باقىلاۋ قىزمەتى, كولىك, ءباسپاسوز قىزمەتى, مەديتسينا, اتلەتتەر اۋىلى, كورەرمەندەرمەن جۇمىس جۇرگىزۋ, مادەني ءىس-شارالار, قوناقتاردى جايعاستىرۋ, اككرەديتتەۋ, قاۋىپسىزدىك, باس اقپاراتتىق ورتالىق سەكىلدى جۇمىس تەلىمدەرىندە قىزمەت ەتپەكشى.
جاستار ۋنيۆەرسيادا-2017 اياسىنداعى ەرىكتىلەر باعدارلاماسىنا ءتۇرلى سەبەپتەرگە بايلانىستى ۇلكەن قىزىعۋشىلىق تانىتىپ وتىر. ويتكەنى, وسىنداي اۋقىمدى وقيعاعا اتسالىسۋدىڭ ارقاسىندا ولار شەت ءتىلى داعدىلارىن جاقسارتىپ, حالىقارالىق جوبادا باعا جەتپەس تاجىريبە جيناۋعا, جاڭا ادامدارمەن تانىسىپ, ءوزىن تاتۋ كوماندانىڭ مۇشەسى رەتىندە سەزىنۋگە, اسا اسەرلى وتەتىن سپورت سايىستارىن ءوز كوزىمەن تاماشالاۋعا قول جەتكىزبەك.
ايناش ەسالي,
«ەگەمەن قازاقستان»
الماتى