«قازينۆەستبانك» اق بانكتىك جانە وزگە دە وپەراتسيالاردى جانە باعالى قاعازدار نارىعىندا قىزمەتتى جۇرگىزۋگە بەرىلگەن ليتسەنزيادان ايىرىلدى, دەپ حابارلايدى ۇلتتىق بانك.
قازاقستان رەسپۋبليكاسى ۇلتتىق بانكى باسقارماسىنىڭ 2016 جىلعى 26 جەلتوقسانداعى № 291 قاۋلىسىنا سايكەس «قازينۆەستبانك» اق-تى (بۇدان ءارى – بانك) «قازاقستان رەسپۋبليكاسىنداعى بانكتەر جانە بانك قىزمەتى تۋرالى» قازاقستان رەسپۋبليكاسى زاڭىنىڭ (بۇدان ءارى – بانكتەر تۋرالى زاڭ) 48-بابى 1-تارماعىنىڭ ۆ) تارماقشاسىندا كوزدەلگەن نەگىزدەر بويىنشا, تولەم جانە اۋدارىم وپەراتسيالارى بويىنشا شارتتىق مىندەتتەمەلەردى ۇنەمى (قاتارىنان كۇنتىزبەلىك ون ەكى اي ىشىندە ءۇش جانە ودان كوپ رەت) تيىسىنشە ورىنداماعانى ءۇشىن بانككە قازاقستان رەسپۋبليكاسىنىڭ قارجى نارىعىن جانە قارجى ۇيىمدارىن رەتتەۋ مەن قاداعالاۋ اگەنتتىگى (بۇدان ءارى – اگەنتتىك) بانكتىك جانە وزگە دە وپەراتسيالاردى جانە باعالى قاعازدار نارىعىندا قىزمەتتى جۇرگىزۋگە بەرگەن 2008 جىلعى 21 ناۋرىزداعى № 221 ليتسەنزيادان 2016 جىلعى 27 جەلتوقساننان باستاپ ايىرۋ تۋرالى شەشىم قابىلداندى.
بانك سەكتورىنىڭ جيىنتىق اكتيۆتەرى مەن مىندەتتەمەلەرىندەگى بانكتىڭ اكتيۆتەرى مەن مىندەتتەمەلەرى ۇلەسىنىڭ تومەن بولۋىنا بايلانىستى (0,7%) بانكتى ليتسەنزيادان ايىرۋ باسقا قارجى ۇيىمدارى ءۇشىن تاۋەكەلدەرگە اكەلمەيدى.
قازاقستان رەسپۋبليكاسى ۇلتتىق بانكى توراعاسى ورىنباسارىنىڭ 2016 جىلعى 26 جەلتوقسانداعى № 468 بۇيرىعىمەن ۋاقىتشا اكىمشىلىك تاعايىندالدى, وعان بانكتى باسقارۋدىڭ بارلىق ورگاندارىنىڭ وكىلەتتىكتەرى ءوتتى.
ۋاقىتشا اكىمشىلىك سوت تاراتۋ كوميسسياسىن تاعايىنداعانعا دەيىن جۇمىس ىستەيتىن بولادى. 2016 جىلعى 27 جەلتوقساننان باستاپ ۋاكىلەتتى ورگاننىڭ نورماتيۆتىك قۇقىقتىق اكتىلەرىندە كوزدەلگەن شىعىستارعا, بانككە كەلىپ تۇسەتىن اقشانى ەسەپتەۋگە بايلانىستى جاعدايلاردى قوسپاعاندا, كليەنتتەردىڭ جانە بانكتىڭ بانك شوتتارى بويىنشا بارلىق وپەراتسيالار توقتاتىلدى.
قازاقستان رەسپۋبليكاسىنىڭ ۇلتتىق بانكى زاڭنامادا بەلگىلەنگەن تارتىپپەن بانكتىڭ قىزمەتىن ماجبۇرلەپ توقتاتۋ (تاراتۋ) تۋرالى سوتقا ءوتىنىش جاسايدى. سوت بانكتى ماجبۇرلەپ تاراتۋ تۋرالى ءىس قوزعاعان كۇننەن باستاپ بانكتى ۇستاپ تۇرۋعا اعىمداعى شىعىستارعا بايلانىستى تالاپتاردى قوسپاعاندا, كرەديتورلاردىڭ بانككە تالاپتارى تەك تاراتۋ وندىرىسىندە عانا ۇسىنىلۋى مۇمكىن.
بانك جەكە تۇلعالاردىڭ دەپوزيتتەرىنە مىندەتتى كەپىلدىك بەرۋ جۇيەسىنىڭ قاتىسۋشىسى بولىپ تابىلادى, وسىعان وراي دەپوزيتورلارعا بەلگىلەنگەن تارتىپپەن كەپىلدىك وتەمى تولەنەتىن بولادى. ۋاقىتشا اكىمشىلىك قىزمەتىنىڭ بارلىق ماسەلەلەرى بويىنشا ۋاقىتشا اكىمشىلىك باسشىسى – د.م. زينۋلليناعا نە باسشىسىنىڭ ورىنباسارى ا.ل. وتتسوۆاعا +77012224736 تەلەفونى بويىنشا ءوتىنىش جاساۋ قاجەت.
بارلىق قىزىعۋشىلىق تانىتقان سۇراقتار بويىنشا +7(727) 330 00 77 «جەدەل جەلى» تەلەفونى بويىنشا, سونداي-اق قر ۇلتتىق بانكىنىڭ قارجىلىق قىزمەتتەردى تۇتىنۋشىلاردىڭ قۇقىقتارىن قورعاۋ جانە سىرتقى كوممۋنيكاتسيالار باسقارماسىنا +7(727) 278 80 84 تەلەفونى بويىنشا ءوتىنىش جاساۋعا بولادى.