تاۋەلسىزدىكتىڭ 25 جىلدىعىنا وراي «نۇر وتان» پارتياسىنىڭ الماتى قالاسىنداعى بولىمشەسىندە «تاۋەلسىزدىك – ۇرانىم, ماڭگىلىك ەل – تۇراعىم» اتتى رەسپۋبليكالىق عىلىمي-تاجىريبەلىك كونفەرەنتسيا ءوتىپ, اۋعان سوعىسى ارداگەرلەرىنىڭ باسىن قوسقان القالى جيىن مەملەكەتتىك حاتشى گۇلشارا ابدىقالىقوۆانىڭ قۇتتىقتاۋ سوزىمەن اشىلدى.
مەملەكەتتىك حاتشىنىڭ قۇتتىقتاۋىن جەتكىزگەن ءماجىلىس دەپۋتاتى, اۋعان سوعىسى اردارگەرلەرى ۇيىمدارىنىڭ «قازاقستان ارداگەرلەرى» قاۋىمداستىعىنىڭ ءتوراعاسى باقىتبەك سماعۇل كونفەرەنتسيا جۇمىسىنا ساتتىلىك تىلەپ, وتان ءۇشىن وت كەشكەن وعلانداردىڭ ەرلىك ىستەرىنە ءسات سايىن تاعزىم جاساپ, ەسىمدەرىن جادىدا جاڭعىرتىپ تۇرۋ ازاماتتىق پارىز ەكەنىن قايىرا ءبىر ەسكە سالدى.
ءححى عاسىردىڭ باستى تالابى تاتۋلىق, كەلىسىم, تولەرانتتىلىق بولىپ وتىرعانى بارشاعا ايان. ىنتىماق جاراستىرىپ, ەلگە, جەرگە دەگەن سۇيىسپەنشىلىكتى, وتانعا ادالدىقتى سەزىنىپ, اتا-بابادان مۇراعا قالعان اسىل قۇندىلىقتاردى ارتتىرۋ ەرلىكتىڭ دە, ەلدىكتىڭ دە ۇلگىسى بولىپ قالا بەرەتىنىن جيىندا ءسوز العان ازاماتتاردىڭ بارشاسى شەگەلەي ايتىپ جاتتى.
كونفەرەنتسياعا قاتىسۋشىلاردى قۇتتىقتاپ, جۇمىسىنا تابىس تىلەگەن ءدىن ىستەرى جانە ازاماتتىق قوعام مينيسترلىگى ازاماتتىق قوعام كوميتەتىنىڭ ءتورايىمى ءاليا عالىموۆا مەملەكەت باسشىسىنىڭ جەمىستى باستامالارى نەگىزىندە ەلىمىزدەگى تاۋەلسىزدىك پەن قاۋىپسىزدىكتى ساقتاۋدىڭ كەشەندى جۇمىستارى اتقارىلىپ كەلە جاتقانىنان, وسىعان سايكەس, ازاماتتىق قوعام كوميتەتىنىڭ بەيبىت ءومىر مەن تىنىشتىقتى قامتاماسىز ەتەتىن بىرنەشە نەگىزگى باعدارى بەلگىلەپ قويىلعانىنان كوپشىلىكتى حاباردار ەتتى. ال «جاس وتان» جاستار قاناتىنىڭ توراعاسى شاھماردان بايمانوۆ يدەولوگيالىق كەڭىستىكتىڭ بوساڭداۋ بولىپ قالعان تۇسىندا جاستارعا اسكەري-پاتريوتتىق تاربيە بەرۋدە اۋعان سوعىسى ارداگەرلەرىنىڭ سىڭىرگەن ەڭبەگى زور بولعانىن اتاپ ءوتتى. بيىلعى جىلى جاسوتانشىلاردىڭ قۇزىرلى ورىندارمەن, وكىلدەرمەن ءوزارا ارىپتەستىك ورناتىپ, وبلىستاردا «اسكەردەگى ءبىر كۇن» اتتى جاستاردىڭ كاسىبي ورتالىقتارى مەن ءبولىمدەرىمەن كەزدەسۋلەر وتكىزىپ, ۇرپاقتار ساباقتاستىعى جوباسى اياسىندا ارداگەرلەرمەن, قوعام قايراتكەرلەرىمەن باسقوسۋلار وتكىزگەنىن ماقتانىشپەن جەتكىزدى.
«نۇر وتان» پارتياسى اۋعان سوعىسى ارداگەرلەرىنە ۇنەمى ىزەت, قۇرمەت كورسەتۋدى نازاردان تىس قالدىرعان ەمەس. كونفەرەنتسيانىڭ ەكىنشى بولىمىندە بىرقاتار سۇم سوعىستىڭ كۋاگەرى بولعان ارداگەرلەرگە ارناپ توسبەلگى تارتۋ ەتىلدى.
ايگۇل احانبايقىزى,
«ەگەمەن قازاقستان»
الماتى