بيىل شىعىس وڭىرىندە ءماۋلىت مەرەكەسى كەڭىنەن اتالىپ ءوتتى. اسىرەسە, وبلىس ورتالىعىنداعى مەتاللۋرگتەردىڭ مادەنيەت سارايىندا وتكەن "راحمەت نۇرى" اتتى رۋحاني كەش وسكەمەندىكتەردىڭ ءوز-وزىنە وزگەشە قاراعان, جاراتۋشىعا جاقىنداي تۇسكەن شاراعا اينالدى. قازاقستان مۇسىلماندارى ءدىني باسقارماسىنىڭ ارداقتى مۇحاممەد پايعامبارىمىز (س.ع.س) ومىرگە كەلگەن ءماۋلىت ايىندا كەڭ كولەمدە رۋحاني شارالار ۇيىمداستىرۋ جونىندەگى تاپسىرماسى اياسىندا وسكەمەن ايماعى وكىلدىگى وتكىزگەن رۋحاني كەشكە اۋدان مەن قالا يمامدارى, اقساقالدار, زيالى قاۋىم وكىلدەرى, مەملەكەتتىك قىزمەتكەرلەر جانە جاستار كەلدى.
ەلدىڭ ەڭسەلى سارايعا تولاسسىز اعىلۋىنان-اق ولاردىڭ وسىناۋ قاسيەتتى ايعا دەگەن ساعىنىشىن, اللا ەلشىسىنە دەگەن ىزگى قۇرمەتىن كورۋگە بولادى. الىس اۋدانداردان, قالا سىرتىنداعى اۋىلداردان كەلۋشىلەر ءۇشىن وكىلدىكتەن ارنايى تەگىن كولىك ۇيىمداستىرىلدى.
جيىن قاسيەتتى قۇران وقۋمەن باستالىپ, ارداقتى پايعامبار ءومىرى مەن ىزگى امالدارى, سونىمەن قاتار وسكەمەن وكىلدىگىنىڭ اعىمداعى جىلى اتقارعان شارالارىنىڭ ەسەبى ساحناداعى ەكراننان ۇسىنىلدى.
قمدب-نىڭ وسكەمەن ايماعى بويىنشا وكىل يمامى, حاليفا التاي اتىنداعى شىعىس قازاقستان وبلىستىق مەشىتىنىڭ باس يمامى ەرمەك قاجى تاسبولات ۇلى ءوڭىر جۇرتشىلىعىن ءماۋلىت مەرەكەسىمەن قۇتتىقتادى. ءماۋلىت مەرەكەسىنىڭ ماڭىزى مەن تاريحىنا توقتالعان ول: «پايعامبارىمىزدىڭ ونەگەلى ءومىرى مەن تاعىلىمى – سارقىلماس رۋحاني قازىنا. قازاق ەلى قاشاننان پايعامبارىمىزدى جوعارى كوتەرىپ, سىيلاپ, قۇرمەتتەگەن, جاقسى كورگەن. ىزگى قاسيەتتەرىن ءداستۇرىمىز بەن ادەت-عۇرپىمىزعا ەنگىزگەن. ءبىز ءدىندى ءتىلدىڭ ۇشىنا ەمەس, ءدىلدىڭ ىشىنە ورناتقان حالىقپىز! ورناتىپ قانا قويماي, امالعا اينالدىرعان حالىقپىز. وسىنى جەتە ءتۇسىنۋىمىز كەرەك", دەدى.
بۇل كەشتە ساحناعا وڭىردە العاش رەت قۇرىلعان ءماۋلىت وقيتىن توپتىڭ جاس ورەن شاكىرتتەرى شىعىپ, مۇحاممەد پايعامبارعا (س.ع.س) ءماۋلىت وقىپ, سالاۋات ايتتى. سونداي-اق وبلىستاعى تانىمال ونەرپازدار اۋەلەتە اسەم ءان شىرقاپ, كۇمبىرلەتە كۇي توكتى. ءيىرىمى تەرەڭ, تىڭداۋشىسىن اسەرلى ويعا جەتەلەيتىن تەرمەلەرمەن ءدىني اندەر شىرقالدى. وسكەمەن قالاسىنداعى جوعارعى وقۋ ورىندارىنىڭ ونەرلى ستۋدەنت جاستارى بۇگىنگى قوعام ومىرىنەن كورىنىستەر قويدى.
رۋحاني كەش بارىسىندا وڭىردە ناتيجەلى قىزمەت اتقارىپ كەلە جاتقان يمامدار ماراپاتتالدى. مەرەكەلىك شارا اياسىندا وكىلدىكتىڭ اتقارعان شارالارى بويىنشا اۋقىمدى فوتو جانە ۇلتتىق جادىگەرلەر كورمەسى ۇيىمداستىرىلدى. سونىمەن قاتار كونە قۇران كىتاپتارىنىڭ كورمەسى ۇسىنىلدى. تۇرعىندار ءماۋلىت مەرەكەسىن جوعارعى دەڭگەيدە ۇيىمداستىرعان وسكەمەن ايماعى وكىلدىگىنە ريزاشىلىق ءبىلدىردى.
دۋمان اناش, "ەگەمەن قازاقستان"
وسكەمەن.