2016 جىل قازاقستاندىق دزيۋدوشىلار ءۇشىن تابىستى جىل بولدى. ءبىر جىلدا ەكى الەم چەمپيونى, ەڭ باستىسى, ءتورت جىلدىقتىڭ باستى باسەكەسىندە ەكى مەدالدى قانجىعاعا بايلاندى, دەپ حابارلادى دزيۋدو فەدەراتسياسىنىڭ ءباسپاسوز قىزمەتى.
بۇل قازاقستان دزيۋدو تاريحىندا التىن ارىپتەرمەن جازىلاتىن جەتىستىك. ەلدوس سمەتوۆ - وليمپيادا ويىندارىندا دزيۋدودان اسحات جىتكەەۆتىڭ ەرلىگىن قايتالاپ, كۇمىس مەدالعا قول جەتكىزسە, گالبادراح وتگونتسەتسەگ – دزيۋدودان وليمپيادا ويىندارىندا جۇلدەگەر اتانعان العاشقى قازاقستاندىق ايەل سپورتشى اتاندى. وليمپيادادان بولەك, سپورتشىلارىمىز الەم چەمپيوناتىندا دا مەدالمەن ورالدى. اتاپ ايتار بولساق, كينتونوۆ مۋرات – ارداگەرلەر اراسىندا الەم چەمپيونى اتانسا, عۇسمان قىرعىزباەۆ – اسكەريلەر اراسىنداعى الەم چەمپيوناتىندا التىننان القا تاعىنىپ, ەل نامىسىن ابىرويمەن قورعادى.
قۇرلىقتىق چەمپيوناتتا دا دزيۋدوشىلارىمىز جۇلدەسىز قالمادى. وزبەكستان استاناسى تاشكەنت قالاسىندا 3 التىن, 2 كۇمىس, 4 قولامەن ۇلتتىق قۇراما كوماندالىق ەسەپتە ازيا چەمپيوناتىن ءىىى ورىنمەن اياقتادى. بۇل سىندا ەلدوس سمەتوۆ (60 كگ), وتگونتسەتسەگ گالبادراح (48 كگ) جانە ماريان ۋرداباەۆا (63 كگ) چەمپيون اتانىپ, جالاۋىمىزدى جەلبىرەتكەن بولاتىن.
بيىل ەرەسەكتەردەن قازاقستان ۇلتتىق قۇراماسى IJF كۇنتىزبەسىندەگى بارلىق ءىرى جارىستارعا قاتىسىپ, 2016 جىلى 35 مەدالعا قول جەتكىزدى. ونىڭ 10-ى التىن, 12-ءسى كۇمىس جانە 13-ءى قولا.