«قازاقستاننىڭ قۇرمەتتى ازاماتتارىنا» پاتەر كىلتتەرى تابىستالدى

BI Group كومپانياسى قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي «قازاقستاننىڭ قۇرمەتتى ازاماتى» جوباسىن ۇيىمداستىرعان بولاتىن. 6 جەلتوقساندا تاۋەلسىز ساراپشىلاردىڭ شەشىمىمەن تاڭدالعان 10 ۇمىتكەرگە بۇكىلحالىقتىق داۋىس بەرۋ باستالدى. بۇگىن ورتالىق كوممۋنيكاتسيالار قىزمەتىنىڭ اقپارات الماسۋ الاڭىندا داۋىس بەرۋ ناتيجەسى جاريالانىپ, «قازاقستاننىڭ قۇرمەتتى ازاماتى» انىقتالدى. 2016 جىلدىڭ 15 قاراشاسىندا باستالعان جوباعا ەلىمىزدىڭ تۇكپىر-تۇكپىرىنەن 2 مىڭنان استام ۇمىتكەردىڭ ءوتىنىمى ۇسىنىلدى. ساراپشىلار كەڭەسى – ارۋجان ساين, ەرلان قارين, ايدوس سارىم, ايبەك الدابەرگەنوۆ, ۆاديم بورەيكو, اسەل قاراۋىلوۆا, سەرگەي پونومارەۆ, دوسجان تابىلدى, الىشەر ەلىكباەۆ, ەرجان راشەۆ, دەنيس كۋلكين, نۇركەن حالىقبەرگەن, ەۆگەني كوچەتوۆ ەكى مىڭ ۇمىتكەردىڭ ءومىربايانىن زەرتتەپ, قىزۋ تالقىلاۋدىڭ ناتيجەسىندە لايىقتى دەگەن ون ازاماتتى انىقتادى. ولار: مۇمكىندىگى شەكتەۋلى ادامداردىڭ قۇقىن قورعاۋشى – الماز ەرجان, «بىت يلي نە بىت» ءفيلمىنىڭ اۆتورى – ازيز زايروۆ, «كلۋب 28 پەتەل» جوباسىنىڭ نەگىزىن سالۋشى – كارلا نۇر, كوپبالالى اكە – مۇرات كابىلباەۆ. قازاقستانداعى ءبىرىنشى «دەتسكي حوسپيس» جانە «زدوروۆايا ازيا» قورىنىڭ نەگىزىن سالۋشى – ناعيما پلوحيح, تالانتتى مۋزىكانت – ازامات تەميرباەۆ, «ۇلتتىق ونكولوگيا جانە ترانسپلانتولوگيا عىلىمي ورتالىعى» اق ونكوگەماتولوگيا بولىمشەسىنىڭ الەۋمەتتىك جۇمىس مامانى – مارينا چەيشۆيلي, حالىقارالىق گروسسمەيستەر – جانسايا ابدىمالىك, ۇشقىش – دميتري رودين جانە رەجيسسەر – ەرمەك تۇرسىنوۆ. ءاربىر ۇمىتكەردىڭ ەرەن ەرلىگىن نەمەسە ولشەۋسىز ەڭبەگىن باياندايتىن بەينەسيۋجەتتەر ءتۇسىرىلىپ, ماقالالار جازىلدى. وسىلايشا, كەز كەلگەن قازاقستاندىق bi-azamat.kz سايتىندا ۇمىتكەرلەردىڭ ومىرلىك تاريحىمەن تانىسىپ, قالاعان قاتىسۋشىعا داۋىس بەرۋگە مۇمكىندىك الدى. سونىمەن, جەلتوقساننىڭ 25-نەن 26-نا قاراعان ءتۇنى بۇكىلحالىقتىق داۋىس بەرۋ توقتاتىلدى. العاشقى كۇندەردەن-اق وزگە قاتىسۋشىلاردان ايتارلىقتاي باسىمدىقپەن العا شىققان مۇرات كابىلباەۆ پەن مارينا چەيشۆيلي داۋىس بەرۋدىڭ سوڭىنا دەيىن قاتارلاسىپ كەلدى. وسىلايشا, BI Group كومپانياسى ەڭ كوپ داۋىس جيناعان ەكى ۇمىتكەردى دە جوبانىڭ جەڭىمپازى دەپ تانىپ, ەكەۋىنە دە ەكى بولمەلى پاتەرلەردىڭ كىلتتەرىن تابىس ەتتى. ال قالعان 8 ۇمىتكەر 500 مىڭ تەڭگەلىك سەرتيفيكاتتارعا يە بولدى. ايدار ورىسباەۆ, "ەگەمەن قازاقستان".