قازاقستاندا اۋىل شارۋاشىلىعى تاۋارىن وندىرۋشىلەرگە تىڭايتقىش قولدانعانى ءۇشىن بەرىلەتىن مەملەكەتتىك سۋبسيديا جۇيەسى وزگەرتىلەدى. بۇل جايىندا ورتالىق كوممۋنيكاتسيالار قىزمەتىندەگى بريفينگتە قر اۋىل شارۋاشىلىعى مينيسترلىگى وسىمدىك شارۋاشىلىعى ونىمدەرىن ءوندىرۋ جانە قايدا وڭدەۋ دەپارتامەنتىنىڭ ديرەكتورى اجار قاجىبەكوۆا ءمالىم ەتتى, دەپ حابارلايدى قازاقپارات.
«بىزدە اگروحيميانى دامىتۋ ءۇشىن تىڭايتقىشتار مەن گەربيتسيدتەرگە سۋبسيديا بەرىلىپ كەلگەن ەدى. بىراق, بىزدە تىڭايتقىش بىلاي سۋبسيديالاناتىن: ەگەر ءبىز تىڭايتقىشتى وتاندىق وندىرۋشىدەن ساتىپ الساق, وندا سۋبسيديا 50 پايىز كولەمىندە, ال ەگەر تىڭايتقىش يمپورتتىق وندىرۋشىدەن الىنسا, سۋبسيديانى 30 پايىز كولەمىندە تولەيتىنبىز. اۋىل شارۋاشىلىعى تاۋارىن وندىرۋشىلەردى ساپالى, جاقسى تىڭايتقىشتار مەن پەستيتسيدتەردى پايدالانۋعا ىنتالاندىرۋ ءۇشىن پايىزدىق ەمەس ابسوليۋتتىك ماندە سۋبسيديالاۋ تۋرالى شەشىم قابىلداندى», - دەدى دەپارتامەنت باسشىسى.
ونىڭ ايتۋىنشا, ەندىگى ۋاقىتتا اگراري وتاندىق نەمەسە شەتەلدىك ءوندىرۋشىنىڭ تىڭايتقىشىن ساتىپ العاندىعىندا ەشقانداي ايىرماشىلىق بولمايدى.
«اۋىل شارۋاشىلىعى تاۋارىن وندىرۋشىلەر بەلگىلى ءبىر تىڭايتقىشتى ساتىپ العان كەزدە قانداي سۋبسيديا جانە قانداي كولەمدە الاتىندىعىن بىلەتىن بولادى. يمپورتتىق نەمەسە وتاندىق ءپرينتسيپى بويىنشا جىكتەۋ بولمايدى. ماسەلەن, قۇرامىندا ازوتى بار تىڭايتقىش بولسا وندا يمپورتتىق نەمەسە وتاندىق ەكەندىگىنە قاراماستان سۋبسيديالاۋدىڭ بىرىڭعاي ءنورماتيۆىن الادى. سۋبسيديا ءنورماتيۆى اۋىل شارۋاشىلىعى مينيسترلىگىنىڭ بۇيرىعىمەن بەكىتىلەدى», - دەدى قاجىبەكوۆا.