جاڭاقورعان اۋدانى سۋناقاتا اۋىلىنىڭ تۇرعىنى ومىرزاق ەرماحانوۆ موتوتسيكلدىڭ قوزعالتقىشىن تراكتورعا ورناتىپ, قولدان قۇراستىرعان كولىگىن تۇرمىسىنا پايدالانىپ وتىر, دەپ حابارلادى «قازاقپارات» اۋداندىق اكىمدىككە سىلتەمە جاساپ.
ومىرزاق اعانىڭ قۇراستىرعان تراكتورى اۋىل جۇرتشىلىعىنا جاقسى تانىمال. قاراپايىم عانا اۋىل تۇرعىنى قولدا بار تەمىر-تەرسەكتەن تراكتور قۇراستىرىپ, ءوزىنىڭ يگىلىگىنە پايدالانۋدا. كولىك شاعىن ءارى ىڭعايلى. تىركەمەسى تاعى بار. مالدىڭ جەم-ءشوبىن, ءۇيدىڭ وتىن-سۋىن تاسۋعا تاپتىرماس دۇنيە. بۇگىنگى كۇنى ەڭ ارزان تراكتوردىڭ باعاسى كەم دەگەندە 4-5 ملن. تەڭگەدەن اسىپ جىعىلاتىنى بەلگىلى.
«جاسىراتىن تۇگى جوق. نەگىزگى بولشەكتەرىن الۋعا 60 مىڭ تەڭگە جۇمسادىم. قالعان تەمىر-تەرسەگىنىڭ بارلىعى وزىمنەن شىقتى. دانەكەرلەۋشى مامان بولعاندىقتان تراكتوردىڭ قىر-سىرىنا قانىقپىن», – دەيدى ونەرتاپقىش.
تراكتوردىڭ موتورى موتوتسيكلدىكى بولعاندىقتان جانارمايدى از قولدانادى. باستىسى, ءۇيدىڭ شارۋاسىنا جاراپ تۇر.
ومىرزاق ەرماحانوۆ زامانعا لايىقتالعان بۇل كولىكتى كەلەشەكتە جەتىلدىرىپ, باسقا دا يگىلىككە پايدالانۋ ويدا بارىن جاسىرمايدى.