كۇنى كەشە عانا استانانىڭ «بارىسى» ءوز ايدىنىندا ماگنيتوگورسكىنىڭ ازۋلى «مەتاللۋرگىن» قابىلداپ, 5:3 ەسەبىمەن جەڭىسكە جەتكەن. ماتچتىڭ قورىتىندىسى جايلى كانادالىق قاقپاشى كەۆين پۋلەن ايتىپ بەردى.
«جانكۇيەرلەر ءۇشىن قىزىققا ءارى تارتىسقا تولى ويىن بولسا, ءبىز اۋىر ماتچ وتكىزدىك. «شىعىس» كونفەرەنتسياسىندا كوش باستاپ كەلە جاتقان ازۋلى كومانداعا قارسى تۇرۋ وڭاي ەمەس. شابۋىلدا ءساتتى ونەر كورسەتىپ, قورعانىسقا دا ساقتىقپەن قارادىق. وسىنىڭ ارقاسىندا ءۇش ۇپاي الىپ, پلەي-وفف كەزەڭىنە جولداما الاتىن ورىننان قوزعالمادىق. دەگەنمەن, 7-8-ورىنداردىڭ اراسى دا وتە الىس ەمەس. ءبىر ويىننان ءمۇلت كەتسەڭ وكشەلەپ كەلە جاتقان ۇجىم باسىپ وزادى دا كەتەدى», – دەيدى كانادالىق قاقپاشى.
«مەتاللۋرگ» ساپىندا ونەر كورسەتەتىن ۇزدىك شابۋىلشىلاردىڭ ءبىرى سەرگەي موزياكين كەۆين پۋلەنگە العاشقى شايبانى سوققان بولاتىن. ونىڭ ويىنى جايلى: «ويىنعا جان-تانىڭمەن بەرىلگەن كەزدە, كىمنىڭ مىقتى, كىمنىڭ وسال ەكەنىنە ءمان بەرمەيسىڭ. ارينە, موزياكين بۇل تۋرنيردە كوپتەن بەرى ويناپ كەلەدى, تاجىريبەسى دە مول», – دەدى.
سپورتتىڭ قاي ءتۇرى بولماسىن باس جاتتىقتىرۋشىنىڭ قولدانعان تاكتيكاسى, ۇستانعان جوسپارى وتە ماڭىزدى. ال ەدۋارد زانكوۆەتس ازۋىن ايعا بىلەگەن «مەتاللۋرگكە» قارسى قانداي ايلا قولدانىپتى؟
«ءبىرىنشى كەزەڭ ءبىز ءۇشىن وتە ءساتتى بولدى. مۇنداي ۇجىمعا قارسى 20 مينۋتتىڭ ىشىندە ءتورت بىردەي گول سوعۋ وڭاي جۇمىس ەمەس. شاماسى, بۇل ماۋسىمدا ءدال وسىنداي ناتيجە كورسەتپەگەن شىعارمىز. ۇزىلىستە باپكەرىمىز جيناقىلىق تانىتىپ, قارسىلاستارىمىزدىڭ بىرەۋىن دە نازاردان تىس قالدىرماۋ كەرەكتىگىن ەسكەرتتى. سەبەبى, تاجىريبەلى كوماندا ورايى كەلگەن ساتتەردى جىبەرە قويمايتىنى انىق. ال ءۇشىنشى كەزەڭدە بارىنشا ساق ويناۋ كەرەكتىگىن, ەموتسياعا بەرىلىپ, ءتارتىپ بۇزباۋىمىزدى كەڭەس ەتتى», – دەدى كانادالىق لەگيونەر.
استانالىقتار ءبىرىنشى كەزەڭدە جاۋاپسىز ءتورت گول سوققانمەن, ماتچ بارىسىندا ءۇش شايبا جىبەرىپ الدى. مۇنداي ساتتە قولدا تۇرعان جەڭىستىڭ سۋسىپ كەتۋى عاجاپ ەمەس.
«قوناقتاردىڭ ءدال وسىنداي كورسەتكىشكە جەتۋى ويىننىڭ ءبىر بولىگى. ەكىنشى كەزەڭدە ولار بىرنەشە رەت ويىنشى باسىمدىعىنا يە بولىپ, ۇتىمدى پايدالاندى. بۇل كەزدە اشۋعا بەرىلىپ, سابىرسىزدىق تانىتۋدىڭ سوڭى ۇلكەن قاتەلىككە اكەلەدى. سەبەبى, ماتچتىڭ اياقتالۋىنا ءالى ءبىراز ۋاقىت بار. ءوزىمىزدىڭ شابۋىلىمىزعا قاراپ, جەڭىسىمىزگە سەنىمدى بولا ءتۇستىم», – دەدى «بارىس» ويىنشىسى.
سۇحبات بارىسىندا جانكۇيەرلەرگە كومانداسى نەعۇرلىم كوپ گول سوققانى ۇنايتىنى ايتىلدى.
«ارينە, ءىرى ەسەپپەن ۇتقانىمىز جاقسى. ءبىر جاعىنان وزىڭە ءۇمىت ارتقان جاندارعا قاراپ, قاقپاڭدى گولدان امان ۇستاعىڭ كەلەدى. دەگەنمەن, قارسى ۇجىمنىڭ شابۋىلى كەزىندە بار ونەرىڭدى پاش ەتكەنگە نە جەتسىن!» – دەدى ول.
كەۆين پۋلەننىڭ قازاقستانعا كەلگەنىنە بىرنەشە ايدىڭ ءجۇزى بولدى. جاڭا كومانداعا, جاڭا ەلگە بىردەن ۇيرەنىسىپ كەتۋ كىمگە بولسىن قيىنداۋ.
«ەكى ەلدىڭ ءومىر ءسۇرۋ سالتى ەكى ءتۇرلى بولعانمەن, ۇقساس تۇستارى دا جوق ەمەس. ماسەلەن, اۋا رايى: قاقاعان قىستىڭ ايازى, تولاسسىز جاۋعان قار. قازىر وتباسىم قاسىمدا. سونداي-اق, استانادا جاقىندارىممەن قىدىراتىن جەرلەر وتە كوپ. مىسالى, بىزگە «حان شاتىردا» كوڭىل كوتەرگەن ۇنايدى. بالالارىمدى ويىن اۆتوماتتارىنان ارەڭ الداپ الىپ شىعامىن. ال جاساندى جاعاجايدىڭ ورنى تىپتەن بولەك. قىستىڭ سۋىعىندا توڭىپ كەلگەندە تروپيكالىق ەلدەردىڭ بىرىنە ءتۇسىپ كەتكەندەي بولاسىڭ», – دەدى.
«ءۇش ايعا جۋىق ۋاقىت ىشىندە قۇرلىقتىق حوككەي ليگاسىنا ۇيرەندىم دەپ سەنىممەن ايتا الامىن. ىلعي دا ءوزىڭدى جاڭا قىرىڭنان كورسەتكەن جاقسى. ارينە, ءستيلى, ويىن مانەرى سولتۇستىك امەريكالىقتاردان ەرەكشەلەنەدى. تەك ازداپ سابىر ساقتاي ءبىلىپ, جاتتىقتىرۋشىنىڭ ايتقانىن بۇلجىتپاي ورىنداساڭ بولعانى. ۇلتتىق حوككەي ليگاسى (ۇكل) مەن قۇرلىقتىق حوككەي ليگاسىنداعى (قحل) ايىرماشىلىق مۇز ايدىنىنىڭ كولەمىندە. ۇكل-ءدىڭ كولەمى قىسقا بولعاندىقتان, سايكەسىنشە ويلانۋعا دا ۋاقىتىڭ از. ايدىننىڭ قاي تۇسىنان سوققى جاساسا دا گولعا اينالۋى ابدەن مۇمكىن», – دەدى لەگيونەر.