جوعارى ەۋرازيالىق ەكونوميكالىق كەڭەستىڭ سانكت-پەتەربوردا وتەتىن وتىرىسىندا ارمەنيا, بەلورۋسسيا, قازاقستان, قىرعىزستان جانە رەسەي باسشىلارى وداقتىڭ ەكى جىلعى جۇمىسىن قورىتىندىلاپ, اتالمىش ىقپالداستىق ۇيىمىنىڭ ودان ءارى دامۋ باعىتتارىن ايقىندايدى, دەپ جازادى تاسس.
ءسامميتتىڭ باستى وقيعاسى ەاەو-نىڭ كەدەندىك كودەكسى تۋرالى شارتقا قول قويۋ بولعالى وتىر. ءۇش جىل كولەمىندە ازىرلەنگەن جاڭا كودەكستە كەدەندىك وپەراتسيالاردى اقپاراتتاندىرۋعا جاڭا تاسىلدەمەلەر, قاعاز تۇرىندەگى قۇجات اينالىمىن جانە سىرتقى ەكونوميكالىق قىزمەتكە قاتىسۋشىلاردىڭ لاۋازىمدى تۇلعالارمەن بايلانىسىن ازايتۋ ماقساتىندا بيزنەس ءۇشىن مەملەكەتتىك ورگاندارمەن ءوزارا ءىس-قيمىلدىڭ ىڭعايلى الگوريتمى ەنگىزىلگەلى وتىر.
سونداي-اق وداققا مۇشە ەلدەردىڭ بارلىعىنا ارناپ كەدەندىك وپەراتسيالار بارىنشا بىردەيلەندىرىلەدى. جاڭا قۇجات كۇشىنە ەنگەن سوڭ ەەك بارلىق ەلدەر ءۇشىن بىرىڭعاي باج سالىعىنسىز ساۋدانىڭ جوعارعى وزىندىك قۇنىن جانە سالماقتىق شەكتى ايقىنداماق.
تاراپتار وزدەرىنىڭ قالاۋى بويىنشا حالىقارالىق پوشتا جونەلتىلىمدەرى, سونداي-اق ەكسپرەسس-تاسىمالداۋشىلار ارقىلى تاسىمالداناتىن تاۋارلارعا قاتىستى ۇلتتىق دەڭگەيدە باجسىز تاسىمالداۋدىڭ بارىنشا تومەن نورمالارىن بەكىتە الادى.
وداقتىڭ مۇشەلەرى جاڭا كەدەندىك كودەكس كۇشىنە ەنگەن سوڭ, 2018 جىلى ەاەو ەلدەرىنە شەتەلدىك ينتەرنەت-دۇكەندەردەن باجسىز تاسىمالداۋدىڭ شەگى بىرتىندەپ تومەندەيتىندىگىنە كەلىستى. ەاەو كەدەندىك كودەكسى 2017 جىلدىڭ 1 شىلدەسىنەن باستاپ كۇشىنە ەنەدى دەپ جوسپارلانعان.