استانا كاسىپكەرلەرىندە قالا ىشىندە ساۋدا جاسايتىن نۇكتە يەمدەنۋ مۇمكىندىگى پايدا بولادى. الداعى ۋاقىتتا قالا بيلىگى جەردى سۋبارەنداعا بەرۋگە بايقاۋ جاريالايدى. وعان شاعىن جانە ورتا بيزنەس وكىلدەرى قاتىسا الادى, دەپ حابارلايدى قالانىڭ كاسىپكەرلىك جانە ونەركاسىپ باسقارماسى.
بايقاۋعا وتىنىشتەر 2017 جىلدىڭ 6 قاڭتارىنان باستاپ www.smart.astana.kz پورتالى ارقىلى بەرىلەدى. ول ءۇشىن ەلەكتروندى كىلت پەن سايتتا تىركەلۋ كەرەك.
سونىمەن قاتار, مىنا قۇجاتتار بولۋ كەرەك:
ءوتىنىش-انكەتا(ۇلگى بويىنشا);
جەكە كاسىپكەرلىك نەمەسە زاڭدى تۇلعانىڭ تىركەلگەنى تۋرالى كۋالىكتىڭ كوشىرمەسى;
قاجەت بولعان جاعدايدا كاسىپكەرلىككە قۇزىرەتتىلىكتى راستايتىن قۇجات;
سول ۋاقىتتا سالىق بويىنشا قارىز جوقتىعى تۋرالى انىقتاما;
9 شارشى مەتردەن از كولەمدە جەر سۇرايتىندارعا ساۋدا نىسانىنىڭ ەسكيز سىزباسى كەرەك. ونىڭ ىشىندە جالپى مالىمەتتەر, سىزبا, فاساد, جالپى كورىنىس, سىرتقى كورىنىسى كورسەتىلگەن نىساننىڭ پاسپورتى, قانداي ماتەريالداردان دايىندالعانى, ونى دايىنداعان جەردىڭ مەكەن-جايى بولۋى ءتيىس;
9 شارشى مەتردەن كوپ جەر سۇرايتىندارعا دۇكەندى دايىنداعان جەردىڭ مەكەن-جايى كورسەتىلگەن مالىمەت كەرەك.
قازىرگى تاڭدا قالا بيلىگى استانادا سىرتقى ساۋداعا 300 جەر تەلىمىن بەرمەكشى. جەردى ازىق-ت ۇلىك, گۇل, سۋۆەنير, تۇرمىستىق جانە اۆتو بۇيىمدار مەن ءتۇرلى جوندەۋ زاتتارىن ساتۋ ءۇشىن الۋعا بولادى.
سۋبارەندالىق جەر تەلىمدەرى 9-80 شارشى مەتر ارالىعىندا 7 جىلعا بەرىلەدى. ونىڭ جالداۋ قۇنى جىلىنا شامامەن 70-400 مىڭ تەڭگە.