بۇكىلالەمدىك بوكس سەرياسىنىڭ (WSB) كەزەكتى 7-ءشى ماۋسىمى 2017 جىلدىڭ اقپان ايىندا باستالادى, دەپ حابارلايدى قازاقپارات.
بيىل بۇكىلالەمدىك بوكس سەرياسىندا كوماندالار ورنالاسقان قۇرلىقتارى بويىنشا ءتورت-تورتتەن امەريكالىق, ەۋروپالىق جانە ازيالىق بولىپ 3 توپقا (جوباعا بارلىعى 12 كوماندا قاتىسادى) ءبولىندى.
ەكى دۇركىن چەمپيون اتانعان «استانا ارلاندارى» كەلەسى جاڭا ماۋسىمدا جوباعا قايتا ورالعان China Dragons (قىتاي), Uzbek Tigers (وزبەكستان) جانە Russian Boxing Team (رەسەي) كوماندالارىمەن ءبىر توپتا ونەر كورسەتەدى. ەندى «استانا ارلاندارىنىڭ» جاڭا قۇرامى ۇلتتىق قۇرامامەن بىرگە قاڭتار ايىندا الماتىدا ورنالاسقان ايبا-نىڭ بوكس اكادەمياسىندا جاتتىعۋ جيىندارىن وتكىزەدى.
سونىمەن قاتار, قاڭتاردا بوكسشىلارمەن كەلىسىمشارت جاسالىپ, «استانا ارلاندارىنىڭ» WSB-دىڭ جەتىنشى ماۋسىمىنا تۇساۋكەسەرى وتكىزىلەدى. كوماندانىڭ نەگىزگى قۇرامىنا 10 سالماق دارەجەسى بويىنشا 20 بوكسشى ەنەدى جانە 17 بوكسشى قوسالقى قۇرامدى تولىقتىرادى. ولار:
49 كگ: تەمىرتاس ءجۇسىپوۆ, ەرمەك ماديەۆ;
52 كگ: ولجاس ساتتىباەۆ, ءانۋار مۇزاپاروۆ;
56 كگ: ءىلياس سۇلەيمەنوۆ, جانبولات قىدىرباەۆ;
60 كگ: زاكىر سافيۋللين, ءميراسالى سارسەنوۆ;
64 كگ: ءدىلمۇرات مىجىتەۆ, ماقسات جەكسەنبى;
69 كگ: اسلانبەك شىمبەرگەنوۆ, قاناعات مارالوۆ;
75 كگ: ەرىك ءالجانوۆ, ساپارباي ايداروۆ;
81 كگ: نۇرداۋلەت جارمانوۆ, ارمان رىسبەك;
91 كگ: انتون پينچۋك, مۇحامەدجان ەركىن;
+91 كگ: ولجاس بوقاەۆ, دميتري زيسكو.
ايتا كەتەيىك, سالماق دارەجەلەرى جىلداعىداي س1 جانە س2 توپتارىنا بولىنەدى. س1 توبىندا: 49 كگ, 56 كگ, 64 كگ, 75 كگ جانە 91 كگ سالماق دارەجەلەرىندەگى بوكسشىلار بولادى. س2 توبىنا: 52 كگ, 60 كگ, 69 كگ, 81 كگ جانە +91 كگ سالماق دارەجەلەرى ەنەدى. ماۋسىم بارىسىندا كوماندالار س1 جانە س2 توپتارىندا كەزەك-كەزەك كەزدەسۋلەر وتكىزەتىن بولادى. ارلانداردىڭ العاشقى كەزدەسۋى رەسەيدە اقپان ايىنىڭ باسىندا وتەدى.