«استانا» فۋتبول كلۋبىنىڭ 29 جاستاعى كاپيتانى تاڭات نوسەرباەۆ ەلوردانىڭ فۋتبول كلۋبىنداعى مانسابىن اياقتادى, دەپ حابارلايدى «استانا» فۋتبول كلۋبىنىڭ ءباسپاسوز قىزمەتى.
كلۋب باسشىلىعى نوسەرباەۆتى ەركىن اگەنت قىزمەتىنە بوساتتى. ەندى ول 2017 جىلعى ماۋسىمدا باسقا كلۋبتا وينايدى.
«تاڭات «استانا» كلۋبىنىڭ قالىپتاسىپ, دامۋىنا ايتارلىقتاي ۇلەس قوستى, ءبىزدىڭ جەڭىستەرىمىز بەن جەتىستىكتەرىمىز ءۇشىن ءبارىن سالدى. كلۋبتىڭ كاپيتانى ءارى كوشباسشىسى رەتىندە تاڭاتتىڭ رولىنە زور باعا بەرۋگە بولادى, سەبەبى, تاڭات سوڭعى التى ماۋسىم بويى ءبىزدىڭ كوماندا ءۇشىن وينادى. ءدال وسى التى جىلدىڭ ىشىندە ءبىزدىڭ كلۋب قازاقستان چەمپيوندارىنىڭ قاتارىنا قوسىلدى. سوندىقتان دا, نوسەرباەۆتى قازاقستاننىڭ ەڭ مىقتى فۋتبولشىلارىنىڭ ءبىرى دەپ قورىقپاي ايتا الامىز. الايدا, تاڭاتتىڭ وتباسىما جاقىن تۇرسام دەگەن تىلەگىن قابىلداپ, قولدا بار كەلىسىمشارتقا قاراماستان, ونى جىبەرىپ وتىرمىز. تاڭاتتىڭ «استانا» فۋتبول كلۋبىنا سىڭىرگەن ەڭبەگى ءۇشىن ونى ەركىن اگەنت رەتىندە جىبەردىك. تاڭاتقا ءبىزدىڭ كومانداداعى تاماشا گولدارى ءۇشىن, ۇمىتىلماس جەڭىستەر ءۇشىن, ەستەن كەتپەس ەموتسيالار ءۇشىن تەك قانا العىس ايتامىز. تاڭاتقا ەندىگى مانسابىندا ساتتىلىك سەرىك بولسىن دەگىم كەلەدى. تاڭات پەن «استانا» اراسىنداعى دوستىق بايلانىس ۇزىلمەيدى, نوسەرباەۆتى «استانا» ۇنەمى ىستىق ىقىلاسىمەن قارسى الاد», - دەدى «استانا» فۋتبول كلۋبىنىڭ باس مەنەدجەرى سايان حاميتجانوۆ.
ايتا كەتەيىك, تاڭات نوسەرباەۆ - «استانا» فۋتبول كلۋبىنىڭ تاريحىنداعى ەڭ كوپ گول سالعان فۋتبولشى. «استانا» كومانداسى ءۇشىن 192 ويىن وتكىزىپ, 54 گول سالعان.