زاڭسىز شىرشا كەسكەندەر قىلمىستىق جاۋاپقا تارتىلادى

ءتارتىپ ساقشىلارى 42 جاستاعى ازاماتتى ۇستادى. ول تيان-شان تاۋلارىنىڭ 20 شىرشاسىن زاڭسىز الىپ بارا جاتقان جەرىنەن ۇستالدى, دەپ حابارلايدى قازاقپارات. وڭىردە جاڭا جىل مەرەكەسى قارساڭىندا قىلقانجاپىراقتى اعاشتاردى كەسۋ ارەكەتتەرىنىڭ الدىن الۋ ماقساتىندا «شىرشا» اتتى جەدەل شارا ۇيىمداستىرىلدى. وسى شارانىڭ اياسىندا ورمان شارۋاشىلىقتارى مەن قورىقتارىندا 64 ارنايى جەدەل توپتار جۇمىس ىستەۋدە. ولاردىڭ قۇرامىندا ءتارتىپ ساقشىلارى مەن تابيعاتتى قورعاۋ قىزمەتىنىڭ وكىلدەرى بار. «ورمان شارۋاشىلىقتارى, ساياباقتار, بازارلار مەن ساۋدا ورىندارى, ياعني زاڭسىز كەسىلگەن اعاشتار ساۋدالانۋى مۇمكىن ورىندار دا تەكسەرىلىپ جاتىر. سوڭعى رەيد بارىسىندا كولساي شاتقالىنىڭ ماڭىندا تيان-شيان تاۋلارىنىڭ 20 شىرشاسى تيەلگەن جۇك كولىگى ۇستالدى. كولىكتىڭ جۇرگىزۋشىسى اعاشتاردى كەسۋگە رۇقسات بەرەتىن قانداي دا ءبىر قۇجاتتاردى كورسەتە المادى. قازىرگى تاڭدا اتالمىش فاكتى بويىنشا قىلمىستىق ءىس قوزعالدى. مەملەكەتكە كەلگەن شىعىن 336 000 تەڭگەنى قۇراپ وتىر»,-دەپ حابارلادى ءىىد-ءنىڭ تابيعاتتى قورعاۋ قىزمەتى. ەكى اپتانىڭ ىشىندە وڭىردە تابيعاتتى قورعاۋ زاڭدارىن بۇزۋ ارەكەتتەرىنىڭ 25 فاكتىسى انىقتالدى. ولاردىڭ 8-ءى ەكولوگيالىق قىلمىستار ساناتىنا جاتادى.