قازاق عالىمدارى كورەي ارىپتەستەرىمەن جىلقى ءوسىرۋ تاجىريبەسىمەن بولىسەدى, دەپ حابارلايدى حابار24.
كورەيا عىلىمي ينستيتۋتتارى سولتۇستىك, باتىس جانە شىعىس قازاقستانداعى قولايسىز اۋا رايى جاعدايىندا سويا ءوسىرۋدىڭ قىر-سىرىن اشىپ بەرمەك. ءىرى قازاقستاندىق عىلىمي-زەرتتەۋ ينستيتۋتتارىنىڭ باسشىلارى كورەياعا ساپار اياسىندا وسىنداي كەلىسىمگە كەلدى.
كورەيالىق كونكۋك ۋنيۆەرسيتەتى مەن قازاق ۇلتتىق اگرارلىق ۋنيۆەرسيتەتى ەلىمىزدە بىرلەسكەن كافەدرا اشۋعا كەلىستى. كورەيلىكتەردى قازاقستاندىق جىلقى ءوسىرۋ تاجىريبەسى قىزىقتىرادى.
"وسى كونكۋك ۋنيۆەرسيتەتىنىڭ عالىمدارى قازىر قازاقستانعا كەلىپ جىلقى شارۋاشىلىعى بويىنشا بىرلەسكەن جۇمىس ىستەۋدى كوزدەپ وتىر. سەبەبى جىلقى مايىنان ولار ءارتۇرلى كوسمەتيكالىق زاتتار الادى ەكەن. ال كورەيا – مەديتسينالىق تۋريزم, كوسمەتيكا شىعارۋ جاعىنان ىلگەرى كەلە جاتقان ەل. سوندىقتان قازاقستاننان مال شارۋاشىلىق سالاسىنداعى كوپتەگەن شيكىزاتتى الىپ, سونى قور ەسەبىندە پايدالانۋ كوزدەلىپ وتىر," - دەيدى سولتۇستىك قازاقستان مال جانە وسىمدىك شارۋاشىلىعى عىلىمي زەرتتەۋ ينستيتۋتىنىڭ باس ديرەكتورى ءايىپ ىسقاقوۆ.
كورەي ماماندارى مال بيۋاسىن كوبەيتۋ تەحنولوگياسىنىڭ تاپشىلىعىن العا تارتادى.
"چەچجۋدو ارالىندا شامامەن 25 مىڭ باس جىلقى بار. بىراق ولاردى ءمىنىپ سەرۋەندەيمىز. جالپى, اپتاسىنا 3-4 جىلقى سويىلادى. الايدا مال باسىن كوبەيتۋ ءۇشىن تەحنولوگيا جەتىسپەيدى. سوندىقتان جىلقى وسىرۋدە جەتىستىككە جەتكەن قازاقستاننان تاجىريبە العىمىز كەلەدى. كورەيادا ءداندى داقىلدىڭ 150 مىڭ ءتۇرى ساقتالعان روبوتتىق گەن بانكى قۇرىلدى. سونداي وسىمدىكتىڭ ءبىرى – سويا قازىر كورەي ەلىندە تاپشى. سوندىقتان ونىڭ ەگىس القابىن 100 مىڭنان 400 مىڭعا ۇلعايتىپ, سولتۇستىك, باتىس جانە شىعىس كازاقستاندا ءوسىرۋ كوزدەلىپ وتىر," - دەيدى كونكۋك ۋنيۆەرسيتەتىنىڭ پروفەسسورى كيم سۋ كي.
ىنتىماقتاستىقتىڭ تاعى ءبىر باعىتى – كادر دايارلاۋ. كورەيالىق ۋنيۆەرسيتەتتەردىڭ بىرىندە جەرگىلىكتى سويا سۇرىپتارىن قازاقستاندىق اسپيرانت زەرتتەپ جاتىر. قازاقستانعا ورالىپ, ول كورەيلىك ارىپتەستەرمەن بىرگە ءوزىنىڭ تاجىريبەسىن باسقالارعا ۇيرەتىپ, ءتىپتى سويانىڭ جاڭا سۇرپىن شىعارۋدى كوزدەپ وتىر.