پارلامەنت سەناتىنىڭ بيۋروسىندا 2016 جىلعى 22 جەلتوقساندا بولاتىن پالاتا وتىرىسىنىڭ كۇن ءتارتىبى كەلىسىلدى, دەپ حابارلادى سەناتتىڭ ءباسپاسوز قىزمەتى.
سەناتورلار «پروباتسيا تۋرالى», «داكتيلوسكوپيالىق جانە گەنومدىق تىركەۋ تۋرالى», «قارسى بارلاۋ قىزمەتى تۋرالى» زاڭ جوبالارى مەن بىرقاتار وزگە زاڭدارعا تۇزەتۋلەر ەنگىزۋدى كوزدەيتىن ىلەسپە زاڭ جوبالارىن قارايدى.
كۇن تارتىبىندە «ۆولونتەرلىك قىزمەت تۋرالى» زاڭ جوباسى مەن زاڭناماعا باسەكەلەستىك جانە تۇرعىن ءۇي قۇرىلىسىن مەملەكەتتىك قولداۋ ماسەلەلەرى بويىنشا تۇزەتۋلەر دە بار.
بيۋرودا ماجىلىستەن تۇسكەن زاڭ جوبالارى سالالىق كوميتەتتەرگە ءبولىنىپ بەرىلدى.
قازاقستان مەن يران اراسىنداعى سوتتالعان ادامداردى بەرۋ تۋرالى كەلىسىمدى راتيفيكاتسيالاۋ تۋرالى زاڭ جوباسى بويىنشا باس كوميتەت بولىپ كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتى بەلگىلەندى.
ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە باسەكەلەستىك جانە تۇرعىن ءۇي قۇرىلىسىن مەملەكەتتىك قولداۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ودان ءارى پىسىقتاۋمەن اينالىساتىن بولدى.