ەل تاۋەلسىزدىگىنىڭ 25 جىلدىعىنا وراي قىزىلجار اۋدانىندا بىرنەشە الەۋمەتتىك نىسان جۇرتشىلىق يگىلىگىنە پايدالانۋعا بەرىلدى.
بەسكول كەنتىندە بوي كوتەرگەن 18 ءپاتەرلى ارەندالىق جاتاقحانانىڭ اشىلۋ سالتاناتىنا وبلىس اكىمىنىڭ ءبىرىنشى ورىنباسارى ايداربەك ساپاروۆ قاتىسىپ, جاڭا پاتەردىڭ كىلتتەرىن تابىس ەتتى. ول ءوز سوزىندە بيىل وڭىردە 170 مىڭ شارشى مەتر تۇرعىن ءۇي تۇرعىزىلعانىن, «جۇمىسپەن قامتۋدىڭ جول كارتاسى-2020» مەملەكەتتىك باعدارلاماسى اياسىندا 307 ەلدى مەكەندە جانە 4 شاعىن قالادا اباتتاندىرۋ جۇمىستارى جۇرگىزىلىپ جاتقانىن جەتكىزدى. سونىمەن قاتار, اۋىلىشىلىك جولدار جوندەلىپ, جارىقتاندىرىلدى, سپورت كەشەندەرى قالپىنا كەلتىرىلدى. «ليرا» جشس وزىنە جۇكتەلگەن تاپسىرمالاردى تاپ-تۇيناقتاي اتقارىپ, ەڭبەك ۋچاسكەلەرىنە 40-قا جۋىق جەرگىلىكتى تۇرعىن تارتىلعان. ونى سالۋعا رەسپۋبليكالىق جانە جەرگىلىكتى قازىنالاردان 160 ميلليون تەڭگە ءبولىنىپ, اباتتاندىرۋعا, ينجەنەرلىك جەلىلەر تارتۋعا 44 ميلليون تەڭگە باعىتتالعان. ورتالىقتاندىرىلعان جىلىتۋ جۇيەسىنە قوسىلعان. ءۇش بولمەلى جايلى ءپاتەرگە قونىستانعان رۋسلان مەن دانا كاكەنوۆتار «جۇمىسپەن قامتۋدىڭ جول كارتاسى-2020» باعدارلاماسى اياسىندا التى اي وندىرىستىك تاجىريبەدەن ءوتىپ, اۋداندا جۇمىسقا ورنالاسقان. رۋسلان «كۇزەت» مەكەمەسىندە, دانا اۋداندىق جەر قاتىناستارى بولىمىندە قىزمەت اتقارادى. جاس وتباسىلارعا اي سايىن بار-جوعى 5 مىڭ تەڭگە جالگەرلىك اقى تولەۋ جەڭىلدىكتەرى قاراستىرىلعان.
وسى اۋداننىڭ نوۆونيكولسك اۋىلىندا تاعى ءبىر نىسان اشىلدى. زاماناۋي قۇرال-جابدىقتار ورناتىلعان دارىگەرلىك امبۋلاتوريانىڭ ەكى مىڭداي تۇرعىنى بار ەلدى مەكەن ءۇشىن ماڭىزى زور ەكەنى ايتپاسا دا تۇسىنىكتى. ەندى, باس اۋىرىپ, بالتىر سىزداي قالسا, الىسقا سابىلمايدى. مۇندا ناۋقاستارعا بارلىق جاعداي جاسالعان. دارىگەرگە دەيىنگى تەكسەرۋ, مەديتسينالىق مۇراعات, فيزيوتەراپەۆت جانە تاعى باسقا 26 كابينەت ورنالاسقان عيماراتتىڭ جالپى اۋماعى 416 شارشى مەتردى قۇرايدى. ەم-دوممەن توعىز مامان اينالىسادى. جالپى, پراكتيكا جانە ءتىس دارىگەرلەرىمەن دە قامتىلعان. الداعى ۋاقىتتا ناۋقاستاردىڭ دەنساۋلىعىنا قاتىستى جيىنتىق ءمالىمەتتەردى قامتاماسىز ەتەتىن ەلەكترون-
دى قۇجاتتاندىرۋ جۇيەسىنە كوشۋ, سونداي-اق, كورشى ەلدى مەكەندەردىڭ تۇرعىندارىنا دا مەديتسينالىق كومەك كورسەتۋ جوسپارلانعان.
ا.ساپاروۆ ۇجىمعا «جەدەل جاردەم» كولىگىن تارتۋ ەتتى. تاعى ەكى كولىك ورتالىق اۋرۋحانا مەن سوكولوۆكا فەلدشەرلىك-اكۋشەرلىك پۋنكتكە بەرىلدى.
دارىگەرلىك امبۋلاتوريا قازاقستاننىڭ ەڭبەك ەرى, بەلگىلى ديقان گەننادي زەنچەنكو جەتەكشىلىك ەتەتىن كومانديتتىك سەرىكتەستىك بولگەن 75 ميلليون تەڭگەگە تۇرعىزىلدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى