تالدىقورعان اسكەري-تەحنيكالىق مەكتەبىندە كەڭەس وداعىنىڭ باتىرى, 28 پانفيلوۆشىنىڭ ءبىرى مۇسابەك سەڭگىرباەۆقا ەسكەرتكىش ءمۇسىن اشىلدى, – دەپ حابارلايدى قازاقپارات.
باتىر ءمۇسىنى بولاشاق وفيتسەرلەر مەن ساربازداردى تاربيەلەيتىن ءبىلىم ورداسىنداعى اسكەري داڭق مۋزەيىندە ورىن تەپتى. مۇسابەك سەڭگىرباەۆتىڭ ۇرپاقتارى اتالارىنىڭ ەرلىگى جاستارعا پاتريوتتىق تاربيە بەرىپ, وتان قورعاۋشىلاردىڭ رۋحاني شىڭدالۋىنا ۇلەس قوسادى دەگەن سەنىمدە. كەڭەس وداعىنىڭ باتىرى ماسكەۋ قالاسىن قورعاۋدا قولىنداعى گراناتاسىمەن جاۋ تانكىسىنە قاراي ۇمتىلىپ, ەرەكشە ەرلىك كورسەتكەن بولاتىن.
مۇسابەك سەڭگىرباەۆ 1917 جىلى الماتى وبلىسى, كوكسۋ اۋدانى, قىزىلارىق اۋىلىندا دۇنيەگە كەلگەن. جاس جاۋىنگەر 1941 جىلى مايدانعا اتتانىپ, ماسكەۋ تۇبىندەگى ۆولوكولام اۋدانى, دۋبوسەكوۆو اۋىلىندا وتانىن قورعاۋدا ەرلىكپەن قازا تاپتى. ەكىنشى دۇنيەجۇزىلىك سوعىستا كورسەتكەن ەرجۇرەكتىلىگى ءۇشىن كەڭەس وداعىنىڭ باتىرى اتاعى بەرىلەدى.