ەلوردادا ءوتىپ جاتقان قازاقستان تاۋەلسىزدىگىنىڭ 25 جىلدىق مەرەيتويىنا ارنالعان سالتاناتتى جيىندا ەلباسى نۇرسۇلتان نازارباەۆ ەگەمەندىك جىلدارىنداعى قازاق ءتىلىنىڭ جاعدايىنا باعا بەردى.
«ءبىز قاسيەتتى قازاق ءتىلى مەن ۇلتتىق مادەنيەتىمىزدىڭ جاھاندىق گۋمانيتارلىق كەڭىستىككە ەركىن ەنۋىن قامتاماسىز ەتتىك. وزدەرىڭىز كورىپ, ەستىدىڭىزدەر, قازاقتىڭ ءتىلى بىرىككەن ۇلتتار ۇيىمى باس اسسامبلەياسىنىڭ تورىنەن ەستىلدى. ول عارىشتان دا ەستىلدى, بۇگىندە ينتەرنەتتىڭ دە ءتىلى. وتاندىق اقپارات قۇرالدارىنىڭ باسىم كوپشىلىگى قازاقشا شىعادى. ەستەرىڭىزدە بولسا, ءبىر كەزدە, تاۋەلسىزدىككە دەيىن الماتىدا ءبىر عانا قازاق مەكتەبى بار ەدى. وتكەن 25 جىلدا ەلىمىزدە قازاق تىلىندە ءبىلىم بەرەتىن 1 مىڭنان استام مەكتەپ اشىلدى», – دەپ اتاپ ءوتتى ەلباسى.
وسى ورايدا, مەملەكەت باسشىسى قازاقتىڭ ءتىلى اقش, ۇلىبريتانيا, گەرمانيا, قىتاي, وڭتۇستىك كورەيا, ماجارستان, پولشا, ازەربايجان, ارمەنيا سياقتى ەلدەردىڭ بەلدى ۋنيۆەرسيتەتتەرىندە وقىتىلىپ جۇرگەندىگىن جەتكىزدى.
«قازىرگى تاڭدا مەكتەپ وقۋشىلارىنىڭ ۇشتەن ەكىسىنەن استامى, ستۋدەنتتەردىڭ 60 پايىزعا جۋىعى مەملەكەتتىك تىلدە ءبىلىم الىپ جاتىر. ەلىمىز بويىنشا قازاق ءتىلىن وقىتاتىن 350 ورتالىق تابىستى جۇمىس ىستەۋدە», - دەدى پرەزيدەنت.