قازاقستان پرەزيدەنتى نۇرسۇلتان نازارباەۆ تاۋەلسىزدىكتىڭ 25 جىلدىعىنا ارنالعان سالتاناتتى شارا بارىسىندا ەلدىڭ دامۋىنا جۇمىس ىستەگەن بارشا قازاقستاندىقتارعا العىس ايتتى, دەپ حابارلايدى strategy2050.kz.
«بارشا قازاقستاندىقتارعا, تۆ الدىندا وتىرعان وتانداستارعا, مەرەكە كۇندەرى دە جۇمىس ىستەپ جاتقان قىزمەتكەرلەرگە, دەمالىسسىز, تىنباي ەڭبەك ەتەتىن ونەدىرىس وشاقتارىنىڭ جۇمىسكەرلەرىنە, فەرمەرلەر مەن ۇستازدارعا, دارىگەرلەرگە, عالىمدارعا, كاسىپكەرلەر مەن اسكەري قىزمەتكەرلەرگە, ونەر يەلەرىنە, جاستارعا ەلدىڭ گۇلدەنۋى جولىندا ەڭبەك ەتكەندەرى ءۇشىن العىس بىلدىرەمىن. رەفورمانىڭ قۇندىلىعىن ارتتىرعان تىنباي ەڭبەك ەتكەن تۇرعىندار بولىپ تابىلادى. ءبىزدىڭ ەكونوميكامىزدىڭ دامۋى كوپتەگەن ساراپشىلاردىڭ تاڭدايىن قاقتىردى. تاۋەلسىزدىك جىلدارى ەكونوميكامىز 20 ەسەگە ءوستى. 25 جىلدىڭ 17 جىلىندا ول تىنىمسىز وسۋدە», – دەدى ەلباسى.
ەلباسى ەڭ كۇردەلى كەزدىڭ وزىندە وتانداستاردىڭ قولداۋى كۇش-جىگەر بەرگەنىن ايتىپ ءوتتى.
«1991 جىلدىڭ 10 جەلتوقسانىندا, ياعني 25 جىل بۇرىن مەن پرەزيدەنت لاۋازىمىنا كەلدىم. حالقىم ءۇشىن كەز كەلگەن سىناققا توتەپ بەرۋگە دايىن بولدىم. 25 جىل وتكەن سوڭ تاۋەلسىزدىگىمىزدىڭ مەرەيتويىندا وسى سوزدەردى قايتالاعىم كەلەدى. مەن ءۇشىن قازاقستان حالقىنا ادال قىزمەت ەتۋدەن اسقان باقىت جوق», – دەدى ن.نازارباەۆ.