مەملەكەت باسشىسى نۇرسۇلتان نازارباەۆتىڭ اتىنا قازاقستان تاۋەلسىزدىگىنىڭ 25 جىلدىعىنا وراي قۇتتىقتاۋ جەدەلحاتتارى كەلىپ تۇسۋدە, دەپ حابارلادى پرەزيدەنتتىڭ ءباسپاسوز قىزمەتى.
گەرمانيا فەدەراتيۆتىك رەسپۋبليكاسىنىڭ پرەزيدەنتى يواحيم گاۋك ءوز قۇتتىقتاۋىندا قازاقستاننىڭ تاۋەلسىزدىك العاننان بەرى قارقىندى دامىپ كەلە جاتقانىن اتاپ وتكەن.
– كوپۇلتتى قازاقستان قوعامىنداعى بەيبىتشىلىك پەن كەلىسىم ەلدەرىڭىزدىڭ وركەندەۋىنە قولايلى جاعداي تۋعىزىپ وتىر. گەرمانيا قازاقستاننىڭ سەنىمدى سەرىكتەسى بولىپ قالا بەرەدى جانە دەموكراتيا مەن زاڭنىڭ ۇستەمدىگى جونىندەگى ساياسي ۇنقاتىسۋدى جالعاستىرۋعا نيەتتى, – دەلىنگەن جەدەلحاتتا.
سونداي-اق, كورەيا رەسپۋبليكاسىنىڭ پرەزيدەنتى پاك كىن حە رەسپۋبليكامىزدىڭ ازاماتتارىن قۇتتىقتاپ, ەكى ەل حالقىنىڭ دوستىعى ودان ءارى نىعايا بەرۋىنە تىلەكتەستىك ءبىلدىردى.
– قازاقستان پرەزيدەنتىنىڭ ءوتكەن ايداعى مەملەكەتتىك ساپارى ەلدەرىمىز اراسىنداعى وسى جىلداردا ۇزدىكسىز دامىپ كەلە جاتقان ستراتەگيالىق ارىپتەستىكتىڭ ودان ءارى نىعايا تۇسۋىنە سەپتىگىن تيگىزدى دەپ ويلايمىن. قازاقستان رەسپۋبليكاسىنا باياندى عۇمىر مەن باق-بەرەكە تىلەيمىن, – دەلىنگەن قۇتتىقتاۋ جەدەلحاتىندا.