اقمولا وبلىسىنان – باقبەرگەن امالبەك:
ستەپنوگور قالاسىندا شاعىن مۇناي وڭدەۋ زاۋىتى ىسكە قوسىلدى. «نەفتيانوي دوم استانا-ويل» جاۋاپكەرشىلىگى شەكتەۋلى سەرىكتەستىگىنە قاراستى كاسىپورىن وبلىستا تۇڭعىش رەت جوعارى ساپالى ديزەل وتىنىن شىعارا باستايدى. بيىلعى مەرەكەلى جىلدا سەرىكتەستىك وندىرىلگەن ءونىمنىڭ وزىندىك قۇنىن ارزانداتۋ جانە ونىڭ ساپاسىن جاقسارتۋ ماقساتىندا 1,5 ميلليارد تەڭگەنىڭ ينۆەستيتسيالىق جوباسىن ويداعىداي جۇزەگە اسىرىپ شىقتى. اقمولا وبلىسىنىڭ كاسىپكەرلىكتى دامىتۋ كارتاسىنا ەنگىزىلگەن ايرىقشا جوبا جىلىنا 150 مىڭ توننا ءونىم وندىرۋگە مۇمكىندىك بەرەدى. مۇناي ەۋروستاندارتتار تالابىنا جاۋاپ بەرەتىن وزىق يننوۆاتسيالىق تەحنولوگيامەن وڭدەلەدى. «نەفتيانوي دوم استانا-ويل» جشس باسشىلارىنىڭ ايتۋىنشا, ءوڭىردىڭ ديزەل وتىنىنا جىلدىق سۇرانىسى 400 مىڭ توننا بولسا, مۇنىڭ 150 مىڭ تونناسى ستەپنوگورداعى كاسىپورىندا وندىرىلەتىن بولادى. سونداي-اق, شاعىن زاۋىتتىڭ اشىلۋىنا بايلانىستى قوسىمشا 15 جۇمىس ورنى قۇرىلىپ وتىر. كاسىپورىننىڭ قۇرىلتايشىسى ۆلاديمير گريششەنكو كاسىپورىننىڭ تەحنولوگيالىق جابدىقتالۋىنا, تۇپكى ءونىمنىڭ ساپاسىنا سيپاتتاما بەرە كەلە, «نەفتيانوي دوم استانا-ويل» جشس جولاۋشىلارعا ءتيىمدى باعامەن ءوز ماي قۇيۋ ستانساسىن اشۋدى جوسپارلاپ وتىرعانىن ايتتى.قاراعاندى وبلىسىنان – قايرات ءابىلدينوۆ:
قاراعاندى وبلىسىنىڭ سارىشاعان ەلدى مەكەنىندە جاڭا تەمىر جول ۆوكزالى اشىلدى. مۇنان بولەك «نۇرلى جول» باعدارلاماسى اياسىندا سارىشاعان كەنتىندە ۇستىمىزدەگى جىلى دارىگەرلىك امبۋلاتوريا مەن مادەنيەت وشاقتارىنا جوندەۋ جۇمىستارى جۇرگىزىلگەن بولاتىن. وسىنداي ينفراقۇرىلىمدى دامىتۋ باعدارلاماسى شەڭبەرىندە ەندى جاڭا تەمىر جول پايدالانۋعا بەرىلدى. – قوس قاباتتى جاڭا نىساندا جولاۋشىلارعا كەرەك جاعدايدىڭ ءبارى دە جاسالعان, – دەيدى ستانسا باستىعى م.قونىسباەۆ. – انا مەن بالاعا ارنالعان دەمالىس بولمەسى, جولاۋشىلار زالى, اسحاناسى بار, كومپيۋتەرلىك زال قىزمەت كورسەتەدى. سونداي-اق, پويىزداردىڭ كەلىپ-كەتەتىن ۋاقىتىن كورسەتىپ تۇراتىن زاماناۋي ەلەكتروندى تاقتا ورناتىلعان. نىسان ءبىر مەزەتتە 1500 جولاۋشىعا قىزمەت كورسەتە الادى. ەل تاۋەلسىزدىگىنىڭ شيرەك عاسىرلىق مەرەيتويى قارساڭىندا اشىلعان جاڭا ۆوكزال سارىشاعاندىقتار ءۇشىن تاماشا مەرەكەلىك تارتۋ بولدى.قوستاناي وبلىسىنان – ءنازيرا جارىمبەتوۆا:
«قوستاناي وبلىسىندا ەلدى مەكەندەردى گازداندىرۋ جانە گاز تاراتۋ جەلىسىن جاڭعىرتۋ» ينۆەستيتسيالىق جوباسىنىڭ ۇلتتىق وپەراتورى «قازترانسگاز» اكتسيونەرلىك قوعامى رۋدنىي قالاسىنىڭ كاچار كەنتىنە گاز قۇبىرىن كىرگىزۋ جۇمىستارىن اياقتادى. مۇندا اۆتوماتتاندىرىلعان گاز تاراتۋ ستانساسى, گاز رەتتەۋ بلوگى بەكەتى سالىنىپ, 30 شاقىرىم قۇبىر جۇرگىزىلدى. كوگىلدىر وتىن كەنتتەگى 56 ءىرى پانەلدى تۇرعىن ۇيلەرگە, جيىرما شاقتى جەكە ۇيلەرگە جانە 35 ءىرىلى-ۇساقتى كوممۋنالدىق-الەۋمەتتىك نىساندار ورنالاسقان عيماراتتارعا كىرگىزىلدى. سونىڭ ارقاسىندا كاچاردىڭ 12 مىڭ حالقى قولىن جىلى سۋعا مالىپ, وركەنيەت جەمىسىنىڭ راحاتىن كورىپ وتىر. قوستاناي ءوڭىرىن گازداندىرۋ جۇمىسى ءۇزىلىسسىز جۇرگىزىلىپ كەلەدى. سوڭعى ەكى جىلدا وبلىس وڭىرىندە 600 شاقىرىم گاز قۇبىرى تارتىلدى, 50 مىڭ تۇرعىنى بار 8 ەلدى مەكەن – اۋليەكول اۋدانىنداعى اۋليەكول, امانقاراعاي اۋىلدارى, رۋدنىيدىڭ كاچار كەنتى, قارابالىق اۋدانىنداعى توعىزاق ستانساسى, دەنيسوۆ اۋدانىنداعى انتونوۆ, الچانوۆ سەلولارى, ليساكوۆ قالاسىنا قاراستى وكتيابر پوسەلكەسى جانە فەدوروۆ اۋدانىنىڭ ورتالىعى كوگىلدىر وتىننىڭ راحاتىن كورىپ وتىر. وبلىس تۇرعىندارىنىڭ تابيعي گازعا قولى جەتىپ, پايدالانۋى 10 پايىزعا ارتتى. بۇل جۇمىستار ينۆەستيتسيالىق جوبالار اياسىندا الداعى ۋاقىتتا دا جالعاسىن تاباتىن بولادى.جامبىل وبلىسىنان – ورالحان ءداۋىت:
يراندىق ينۆەستورلار پوليەتيلەن قۇبىرلار شىعارۋدى قولعا الماق. اتالعان جوبانى جۇزەگە اسىرۋ ءۇشىن ارنايى كەلىسىمشارت تا جاسالدى. يراندىق ينۆەستورلار جامبىل وبلىسىنىڭ ەكونوميكالىق ءمۇمكىندىكتەرىمەن تانىسۋعا ارنايى كەلىپتى. ولار الدىمەن ينۆەستيتسيا سالۋعا سۇرانىپ تۇرعان بىرقاتار جوبالارمەن تانىسىپ, سونىڭ ىشىندە ديامەترى 3 سم-دەن 3 مەترگە دەيىن جەتەتىن پوليەتيلەن قۇبىرلارىن شىعارۋعا ارنالعان كاسىپورىن اشۋعا نيەتتى ەكەندىكتەرىن جەتكىزدى. مۇنداعى باستى ەرەكشەلىك – قۇبىرلاردىڭ قۇرامىنا شىنى ارالاستىرىلادى. ول توزىمدىلىگىمەن ەرەكشەلەنبەك. كىشكەنتاي كولەمدى قۇبىرلار جىلىجايلاردا پايدالانىلادى. ال ۇلكەن قۇبىرلار قۇرىلىسقا قولايلى. – ينۆەستيتسيا سالۋ ءۇشىن جامبىل وبلىسىنا دەلەگاتسيامىزبەن ەكىنشى رەت كەلدىك. ايماقتىڭ مۇمكىندىكتەرى وتە مول ەكەن. اسىرەسە, بۇل ايماق اۋىل شارۋاشىلىعى ءۇشىن وتە قولايلى. ماسەلەن, ءبىز قولعا الىپ وتىرعان پوليەتيلەن قۇبىرلار تامشىلاتىپ سۋارۋ تەحنولوگياسى ءۇشىن وتە قاجەت. بۇدان بولەك, مال شارۋاشىلىعى, ونىڭ ىشىندە ەت ەكسپورتىن ارتتىرۋعا كومەكتەسكىمىز كەلەدى. يراننان اكەلگەن ارنايى قۇرىلعىلار ارقىلى ەتتى ۆاكۋمداۋعا بولادى. ەتتى ۆاكۋمداۋ ارقىلى ونى 72 ساعات ىشىندە الەمنىڭ كەز كەلگەن جەرىنە تاسىمالداۋعا مۇمكىندىك بار, – دەيدى يراندىق ينۆەستور حوسسەين حاسان كومالي.پاۆلودار وبلىسىنان – فاريدا بىقاي:
وبلىس ورتالىعىنداعى «سارىارقا» شاعىن اۋدانىندا تاعى دا ءبىر جاڭا ءۇي بوي كوتەردى. بۇل جولى جارقىراعان جاڭا شاعىن اۋداندا 4 تۇرعىن ءۇي پايدالانۋعا بەرىلدى. پاتەر العاندار بۇرىنعى «اليۋمينستروي» شاعىن اۋدانىنىڭ بۇرىنعى تۇرعىندارى قالادا 50-ءشى جىلدارى سالىنعان ەكى قاباتتى اپاتتى ۇيلەردە تۇرىپ كەلدى. وسىنىڭ الدىندا عانا «سارىارقا» شاعىن اۋدانىنداعى لوموۆ كوشەسىندە 12 قاباتتى بيىك ءۇي پايدالانۋعا بەرىلگەن ەدى. پاۆلودار قالاسىنىڭ اكىمى نۇرجان اشىمبەتوۆتىڭ ايتۋىنشا, بۇل اۋدانداعى قالعان ەسكى ۇيلەر دە الداعى ۋاقىتتا ءسۇرىلىپ, سودان سوڭ جاڭا ۇيلەر بوي كوتەرەدى. بيىل جازدا «سارىارقا» تۇرعىن ءۇي كەشەنىنىڭ العاشقى كەزەڭى پايدالانۋعا بەرىلىپ, جاڭا پاتەر كىلتىن 105 وتباسى السا, ش.شوكين كوشەسىندە ورنالاسقان تاعى ءبىر جاڭا ۇيدەن 52 وتباسى پاتەر الدى. ال الداعى جىلدارى وبلىس ورتالىعىندا 22 جاڭا ءۇي سالىنادى دەپ جوسپارلانۋدا. جەلتوقسان ايىندا 9 ءۇي كەشەنى پايدالانۋعا بەرىلىپ, 900 وتباسى جاڭا پاتەر الادى.شىعىس قازاقستان وبلىسىنان – دۋمان اناش:
ەلىمىزدەگى شەكارالىق وڭىرلەردىڭ ءبىرى سانالاتىن تارباعاتاي اۋدانى تاۋەلسىزدىكتىڭ 25 جىلدىق مەرەيتويىن جوعارى تابىستارمەن قارسى الىپ وتىر. اۋداننىڭ الەۋمەتتىك-ەكونوميكالىق كورسەتكىشتەرىندە وڭ وزگەرىستەر كوپ. سونىڭ ءبىرى – ارينە, مال شارۋاشىلىعى. ايتا كەتەلىك, اۋداندا 150 مىڭعا جۋىق ءىرى قارا, 450 مىڭعا جۋىق قوي-ەشكى جانە 25 مىڭداي جىلقى بار. سوڭعى 3 جىل كولەمىندە 60-قا جۋىق اسىل تۇقىمدى شارۋاشىلىق جۇمىس ىستەۋدە. مال باسىن تۇرلەندىرۋ بويىنشا اۋدان ءۇشىنشى جىل قاتارىنان رەسپۋبليكادا ءبىرىنشى ورىندى يەلەنىپ وتىر. قازىرگى تاڭدا 26 512 مال باسى تۇقىم تۇرلەندىرۋگە قاتىسۋدا. – ەلباسى بارلىق دەڭگەيدەگى اكىمدەرگە اۋىل تۇرعىندارىن جۇمىسپەن قامتۋ ماقساتىندا وتباسىلىق مال بورداقىلاۋ الاڭدارى مەن ءسۇت قابىلدايتىن تىرەك پۋنكتتەر اشۋ جونىندە تاپسىرمالار بەرگەن بولاتىن. البەتتە, ءبىر وتباسى 5 باستان 50 باسقا دەيىنگى مالدى بورداقىلاي الادى. سوندىقتان تارباعاتايلىقتار شاعىن وتباسىلىق بورداقىلاۋ الاڭىن اشۋعا بىردەن بەل شەشە كىرىستى. قازىر اۋداندا 400-گە جۋىق مال بورداقىلاۋ الاڭى بار, – دەيدى تارباعاتاي اۋدانىنىڭ اكىمى دىلدابەك ورازباەۆ.