ەل تاۋەلسىزدىگىنىڭ 25 جىلدىعىن مەرەكەلەۋ قارساڭىندا «قازمۇنايگاز» اكتسيونەرلىك قوعامىندا سالتاناتتى جيىن ءوتىپ, وندا كومپانيالار توبى قىزمەتكەرلەرى ماراپاتتالدى.
«اسپاندا جۇلدىز بىتكەن دابىل قاقتى,
ال جەردە مۇنارالار شامىن جاقتى.
مۇنايشىنىڭ توگىلگەن تەرى قۇساپ,
داريالاپ قارا التىننان اعىپ جاتتى...»
ءيا, سالتاناتتى جيىن مۇنايشىلاردىڭ وسىنداي رۋحتى جىرلارىمەن شىمىلدىعىن ءتۇردى. قارا ءسوزدىڭ قۇدىرەتىن تۇسىنەتىن قازاقتىڭ قارا بالالارى قارا التىننىڭ دا قادىرىن نەگە بىلمەسىن؟! ەل ەكونوميكاسىنىڭ كۇرەتامىرى سانالاتىن باستى سالانىڭ باسى-قاسىندا وسىنداي قايسار رۋحتى جاستارىمىزدىڭ جۇرگەنىنە ىشتەي قۋانىپ تا, ماقتانىپ تا تۇردىق. تۇلا بويىڭدى تىتىركەندىرگەن رۋحتى جىرلاردى جۇمىسشى-مۇنايشىلاردىڭ جەتەر جەرىنە جەتكىزە جالىنداتا ورىنداۋى مەرەكە قارساڭىندا ونسىز دا كوتەرىڭكى تۇرعان كوڭىلدى ودان سايىن كوككە ۇشىرعانداي. تاۋەلسىز ەلدىڭ ءور ۇلاندارىنىڭ وسىنداي اسقاق رۋحىنا تامساناسىڭ ءارى ريزا بولاسىڭ. ارينە, مۇنىڭ ءبارى – شيرەك عاسىرعا جەتكەن ەل تاۋەلسىزدىگىنىڭ تارتۋى, ەل ەگەمەندىگىنىڭ ەرەكشە قاسيەتى, ماڭگىلىك ەلدىڭ ماقتانىشى.
سالتاناتتى جيىننىڭ اشىلۋىندا «قازمۇنايگاز» ۇلتتىق كومپانياسىنىڭ باسقارما ءتوراعاسى ساۋات مىڭباەۆ جانە وسى سالانىڭ قۇرمەتتى ارداگەرى ۇزاقباي قارابالين ءسوز ءسويلەپ, قاتىسۋشىلاردى ايتۋلى مەرەكەلەرىمەن قۇتتىقتادى.
«مۇنداي كۇندەرى ءبىزدىڭ جۇرەگىمىزدى ماقتانىش سەزىمى كەرنەيدى جانە تاۋەلسىز قازاقستاننىڭ ەنەرگەتيكالىق جۇيەسىن قۇرۋ باعىتىنداعى ۇلكەن دە ماڭىزدى ىسكە ءوزىمىزدىڭ قاتىسىمىز بارىن تەرەڭ سەزىنەمىز. ءبىز جاس مەملەكەتىمىزبەن بىرگە ءوسىپ, دامىپ كەلەمىز. بۇگىندە «قازمۇنايگاز» كومپانيالار توبىندا 85 مىڭنان استام ادام جۇمىس ىستەيدى. ولار تاباندى ەڭبەگىمەن تاۋەلسىز قازاقستاننىڭ يگىلىگىن مولايتىپ كەلە جاتقان مۇنايشىلار مەن گاز وندىرۋشىلەر, وڭدەۋشىلەر مەن بارلاۋشىلار, وزگە دە ارالاس كاسىپ يەلەرى. ال ەلىمىز الەمدىك ەنەرگەتيكا كارتاسىنان لايىقتى ورنىن الدى», دەدى «قازمۇنايگاز» ۇلتتىق كومپانياسىنىڭ باسقارما توراعاسى ساۋات مىڭباەۆ.
تاۋەلسىزدىكتىڭ شيرەك عاسىرىندا ەلىمىز مۇناي جانە گاز كوندەنساتى ءوندىرىسىن ۇلعايتۋ ارقىلى الەمدىك مۇناي-گاز سالاسى «ساحناسىنان» ويىپ تۇرىپ ورىن الدى. وعان دالەل, 1991 جىلى مۇناي جانە گاز كوندەنساتى ءوندىرىسى 26,6 ملن توننانى قۇراسا, وتكەن جىلى بۇل كورسەتكىش 80 ملن تونناعا دەيىن جەتتى. البەتتە, جاس جانە تاۋەلسىز قازاقستاننىڭ قازىرگى ۇلكەن جەتىستىگى ءوز ىسىنە شىن ءجۇرەكتەن بەرىلگەن, تۋعان جەرىنە دەگەن جارقىن بولاشاقتى ارمانداعان العاشقى ءىزاشارلاردىڭ زور تالپىنىسى, ەڭبەكقور جۇرتتىڭ قاجىر-قايراتىنسىز مۇمكىن ەمەس ەدى. ولار ەگەمەن ەلىمىزدىڭ مۇناي-گاز سالاسىنىڭ دامۋىنىڭ باستى قاتىسۋشىلارى مەن العاشقى كۋاگەرلەرى. كەشەگى سالتاناتتى جيىندا مىنە, وسىنداي مۇناي مايتالماندارى ماراپاتتالىپ, ەلدىڭ دامۋىنا قوسقان ەرەن ەڭبەكتەرى ەلەندى.
ماراپاتتالعانداردىڭ قاتارىندا «قازمۇنايگاز» بيزنەس باعىتىنىڭ باسشىلارى, «ۇزدىك مامان» جانە ۇزدىك يننوۆاتسيالىق يدەيالار كونكۋرسىنىڭ جەڭىمپازدارى, قمگ جاستار ۇيىمدارىنىڭ بەلسەندىلەرى بار. ولار «قازاقستان رەسپۋبليكاسى تاۋەلسىزدىگىنە 25 جىل» مەرەكەلىك مەدالدارى, قازاقستان رەسپۋبليكاسى ەنەرگەتيكا مينيسترلىگىنىڭ, «سامۇرىق
قازىنا» ۇلتتىق ءال-اۋقات قورى جانە «قازمۇنايگاز» ۇك» اق قۇرمەت گراموتالارى جانە العىس حاتتارىنا يە بولدى.
جىل بويى «قازمۇنايگاز» ۇلتتىق كومپانياسى «KAZENERGY» اسسوتسياتسياسىمەن بىرىگىپ رەسپۋبليكا تاۋەلسىزدىگىنىڭ 25 جىلدىعىنا ارنالعان «تاۋەلسىز قازاقستاننىڭ مۇناي جانە گازى» اتتى جوباسىن دايىنداعان ەكەن. بۇل جوباعا ەل ەكونوميكاسىنداعى مۇناي-گاز سالاسىنىڭ تاريحي ءرولىن ايقىندايتىن – مۇنايدىڭ مەملەكەتىمىز ءۇشىن ماڭىزدىلىعىن كەلەشەك ۇرپاققا جاستايىنان ءتۇسىندىرۋ ماقساتىندا جازىلعان بالالارعا ارنالعان كىتاپ, سونداي-اق, ءوز ەڭبەگى ارقىلى تۇراقتىلىقتى ساقتاپ, وتانىمىزدىڭ وركەندەۋىنە ۇلەسىن قوسىپ وتىرعان قازاقستاندىق مۇنايشىلارعا ارنالعان فوتوالبوم, سونىمەن قاتار, مۇناي-گاز يندۋسترياسىنا ۇلكەن ۇلەس قوسقان ادامداردىڭ تاريحي ساتتەردەن ايتقان ەستەلىكتەرى مەن مۇناي سالاسىنىڭ بولاشاق دامۋىنا قاتىستى ويلارى قامتىلعان فيلمدەر تسيكلى كىرەدى.
سالتاناتتى شارادا وسى دەرەكتى فيلمنەن ءۇزىندى كورسەتىلىپ, قاتىسۋشىلاردى وتكەننىڭ تاعىلىمىنا تامىر تارتقىزىپ, تاريح تەرەڭىنە تاعى ءبىر سۇڭگىتتى. ال شارا اياسىندا ۇيىمداستىرىلعان «تاۋەلسىز قازاقستان مۇنايى» كورمەسىنە وسى جوبامەن دايىندالعان البومنىڭ سۋرەتتەرى قويىلدى. ياعني, مۇناي-گاز سالاسىنىڭ جانە «قازمۇنايگاز» ۇلتتىق كومپانياسىنىڭ دامۋىنا ەرەكشە ۇلەس قوسقان مۇنايشىلاردىڭ, مۇناي-گاز سالاسىندا جۇرگەن ءتۇرلى ماماندىق يەلەرىنىڭ پورترەتتىك سۋرەتتەرى كولەمدى فورماتتا كورەرمەن نازارىنا ۇسىنىلدى. بۇل كورمە «مۇناي مايتالماندارى» دەپ اتالدى.
دينارا بىتىكوۆا,
«ەگەمەن قازاقستان»