«تاۋەلسىز قازاقستان» پويىزى الماتىدا ءوزىنىڭ ساپارىن اياقتادى
ۇلان-بايتاق دالامىزدىڭ وزەندەرى مەن كولدەرىن كەسىپ ءوتىپ, وڭىرلەرى مەن ەلدى مەكەندەرىن شارلاعان «تاۋەلسىز قازاقستان» پويىزى الماتىعا كەلىپ تۇمسىق تىرەدى. الماتى – 45 كۇنگە سوزىلعان ساياحاتتىڭ سوڭعى ستانساسى بولاتىن. وسىناۋ ۇزاق تا مازمۇندى ساپاردىڭ جولاۋشىلارى نە ءبىتىردى؟ ەل ومىرىنەن نە كوردى؟ الەۋمەتكە قانداي پايدا, كەڭەسى ءتيدى؟ بۇل تۋرالى بىلگىسى كەلگەن باق وكىلدەرى كوپ ەدى.
ءبىز «تاۋەلسىز قازاقستان» پويىزىن سارسەنبىنىڭ ءساتتى كۇنى تاڭەرتەڭگىلىك «الماتى-2» تەمىر جول ۆوكزالىنان ءسان-سالتاناتىمەن كۇتىپ الدىق. باتىستان شىعىسقا, شىعىستان باتىسقا اعىلىپ جاتقان پويىزداردان بۇل پويىزدىڭ ءتۇرى دە بولەك, اماناتى دا باسقا بولىپ كورىندى.
جۇيتكىپ كەلىپ توقتاعان پويىز-
عا الماتى جاستارى جالاۋلاتىپ قوشەمەت ءبىلدىرىپ, وركەستر ويناپ, اق كيمەشەكتى اجەلەر شاشۋىن الا ۇمتىلدى. وسىدان كەيىن ىعى-جىعى كوپشىلىك بىردەن ورنىن تاۋىپ, قازاقستان حالقى اسسامبلەياسى توراعاسىنىڭ ورىنباسارى ەرالى توعجانوۆ ۆوكزالدى دۋمانعا بولەگەن حالىقتى ساپاردىڭ قورىتىندىلاۋىمەن قۇتتىقتادى. «ءتاۋەلسىز قازاقستان» پويىزىنىڭ تىندىرعان تىرلىكتەرىن سارالادى. وسى شاراعا ءبىر كىسىدەي جۇمىلعان مينيسترلىكتەر مەن جەرگىلىكتى بيلىك وكىلدەرىنە, قازاقستان تەمىر جولىنا العىسىن ءبىلدىردى.
ەرالى توعجانوۆتىڭ ايتۋىنشا, وسى ۇلكەن ساپاردا 100 ميلليون تەڭگە كولەمىندە ناقتى الەۋمەتتىك كومەك كورسەتىلگەن. بۇل پويىزدىڭ مەديتسينالىق قىزمەتكەرلەرى الماتى وبلىسىندا نارەستەنىڭ ءدۇنيەگە كەلۋىنە كومەكتەسىپ, كىندىگىن كەسكەن.
– «ەڭ باستىسى, «تاۋەلسىز قازاقستان» پويىزى ەلباسى نۇرسۇلتان نازارباەۆتىڭ سالەمىن ەلگە جەتكىزدى. پويىزداعى شارالارعا قاتىسقان ازاماتتار ءبۇگىن تاۋەلسىزدىكتىڭ التىن بەسىگى الماتىعا كەلىپ, جۇمىسىن اياقتاپ وتىر. پويىزدا 12 مينيسترلىكتىڭ وكىلى بولدى. ولار ءاربىر ءۇش كۇن سايىن اۋىسىپ وتىردى. جيناقتاپ ايتقاندا, ءبىر ايدان استام ۋاقىت ىشىندە 300 مامان جۇمىس ىستەدى. پويىز نەگىزگى مىندەتىن اتقارىپ شىقتى. شالعايداعى اعايىننىڭ كەيبىر ماسەلەلەرىن سول ورىندا بىلىكتى ماماندار شەشىپ بەردى. باستى مەرەكەمىز – تاۋەلسىزدىك كۇنى جاقىنداپ قالدى. ەلىمىزدى وسى ۇلى مەرەكەمەن قۇتتىقتايمىز! ۇلكەن ساپاردان ورالعان ازاماتتارعا العىسىمىزدى ايتامىز. ەگەر قازاقستان الىپ پويىز بولسا, وندا بارشامىز سول «قازاقستان» دەگەن پويىزدىڭ جولاۋشىلارىمىز», – دەدى ەرالى توعجانوۆ.
بۇل پويىزدى كۇتكەندەردىڭ اراسىندا قازاقستان حالقى اسسامبلەياسىنىڭ وكىلدەرى دە بار ەدى. سوڭعى ستانساداعى سالتاناتتىڭ ءسانىن اسىرعان دا وسى سان ۇلتتىڭ كيىمىن كيگەن وتانداستارىمىز بولدى.
ال الماتى قالاسى اكىمىنىڭ ورىنباسارى ارمان قىرىقباي 45 كۇن بويى اتتان تۇسپەگەندەي توقتاۋسىز جۇيتكىگەن تاۋەلسىزدىك پويىزىنىڭ جولاۋشىلارىن 1000 جىلدىق تاريحى بار شاھارعا امان-ەسەن جەتۋىمەن قۇتتىقتادى.
كەزەگىمەن ءسوز العان «ءتاۋەلسىز قازاقستان» ارنايى پويىز شتابىنىڭ جەتەكشىسى ءامىرجان الپەيىسوۆ: «بۇل پويىز ەلباسىنىڭ تاپسىرماسىمەن قازاقستان
حالقى اسسامبلەياسىنىڭ ۇيىمداستىرۋىمەن شىققان بولاتىن. 45 كۇننىڭ ىشىندە ءبىز 16 مىڭ شاقىرىم جەر ءجۇرىپ, ەلباسىنىڭ قۇتتىقتاۋىن اۋىل-ايماق, ەلدى مەكەندەرگە جەتكىزدىك. ونداعى اعايىننىڭ الەۋمەتتىك ماسەلەلەرىنىڭ شەشىلۋىنە اتسالىستىق. ءىس-شارالارىمىزعا 100 مىڭنان استام ادام قاتىسقان, ونىڭ ءىشىندە 13 مىڭىنا مەديتسينالىق كومەك, 12 مىڭ ادامنىڭ جەكە باس ماسەلەلەرىن شەشۋگە, 77 مىڭ ادامعا كونسۋلتاتيۆتىك كومەك بەرىپ, ەلباسىمىزدىڭ «ماڭگىلىك ەل» يدەياسىن, 25 جىل ىشىندە جەتكەن جەتىستىگىمىزدى ەلگە جەتكىزىپ, اڭگىمە-دۇكەن قۇردىق. ءبىز الەۋمەتتىك ماسەلەلەردى شەشۋ بارىسىندا ۇيىعان حالىقتى كوردىك», – دەدى.
دەگەنمەن, ءامىرجان الپەيىسوۆتىڭ ايتۋىنشا, بۇل ساپاردىڭ جولاۋشىلارى شەشە الماعان دا جايتتار بولعان. ول كوبىنەسە زاڭنامالىق ماسەلەلەرگە قاتىستى بولىپ كەلمەك. ونىڭ ىشىندە ءمۇمكىندىگى شەكتەۋلى جانداردىڭ ءومىرىن جەڭىلدەتۋگە قاتىستى وتىنىشتەر بار. ەندىگى جەردە مەملەكەتتىك دەڭگەيدە شەشىلۋى ءتيىستى ماسەلەلەر پرەزيدەنت اكىمشىلىگىنە جولدانادى. شەشىمىن كۇتكەن بۇل جايتتار الداعى ۋاقىتتا پارلامەنت ءماجىلىسى وتىرىستارىندا قارالاتىن بولادى.
«تاۋەلسىز قازاقستان» پويىزىنا قاتىسۋشىلار وڭتۇستىك استانادا بىرقاتار جوسپارلى شارالارعا قاتىسادى دەپ كۇتىلۋدە. الماتىدا دا اتالمىش اكتسياعا قاتىسۋشى ماماندار حالىققا مەديتسينالىق قىزمەت كورسەتىپ, مادەني شارالار قويىلىمىن وتكىزەدى جانە كاسىپكەرلىكتى قولداۋ, اۋىل شارۋاشىلىعى سۇراقتارىنا قاتىستى كەڭەس بەرەدى.
ەسكە سالا كەتەيىك, «تاۋەلسىز قازاقستان پويىزى» 1 قاراشا مەن 14 جەلتوقسان ارالىعىندا ەلىمىزدىڭ 35 ەلدى مەكەنىندە حالىقپەن كەزدەسۋ وتكىزدى.
ءبىر جارىم اي بويى جولدا ءجۇرگەن پويىز جولاۋشىلارى قۇزىرەتتەرى جەتكەنشە كومەك سۇراعان, كەڭەس سۇراعان حالىققا سول ارادا سەپتىگىن تيگىزىپ, ساۋاپ الۋعا ۇمتىلعاندارى قۋانتادى.
ارنايى پويىزدى ەلىمىزدىڭ ءار تۇكپىرىندە قۇلاعدار بولىپ, تاعاتسىزدانا كۇتكەن تۇرعىندار كوپ بولعان. اياقتارى جەتكەنشە تىلەكتەرىن ايتىپ, ويلاساتىن شارۋالاردى ورتاعا سالىپتى.
وسىلايشا, قاسيەتتى پارىز ارقالاعان بۇل پويىز شيرەك عاسىردا تىندىرىلعان تىرلىكتى تۇرلاۋلى ەتۋ ءۇشىن تاتۋلىقتىڭ تۋىن تۇسىرمەي, اۋىزبىرشىلىكتى ساقتاۋعا ۇمتىلعان حالقىمىزدىڭ اماندىعىن ءبىلىپ قايتتى. ەندى, ولار سول ەلدىڭ اماناتىن ەكشەپ, ەلباسىنىڭ, ەل اعالارىنىڭ تالقىسىنا سالاتىن بولادى.
ايناش ەسالي,
«ەگەمەن قازاقستان»
الماتى
سۋرەتتى تۇسىرگەن
سامات قۇسايىنوۆ