اقتوبەدە العاشقى رەت قازاقستان رەسپۋبليكاسى تاۋەلسىزدىگىنىڭ 20 جىلدىعىنا جانە كونستيتۋتسيا كۇنىنە ارنالىپ حالىقارالىق «Plein Air Aktobe» اتتى كەسكىندەمە فەستيۆالى ءوز جۇمىسىن باستادى. ون كۇنگە سوزىلاتىن فەستيۆال قالا ماڭىنداعى «ەنەرگەتيك» دەمالىس بازاسىندا ۇيىمداستىرىلۋدا. فەستيۆالدىڭ ماقساتى – وبلىستا كەسكىندەمە ونەرىن دامىتۋعا ىقپال ەتۋ, الىستان كەلگەن سۋرەتشىلەرمەن ءوزارا تاجىريبە الماسۋ, تاياۋ شەتەلدىڭ جانە ەلىمىزدىڭ بەلگىلى قىلقالام شەبەرلەرىنىڭ ەڭبەكتەرىمەن وبلىستىق كوركەمسۋرەت جانە ساندىك-قولدانبالى ونەر مۇراجايىنىڭ قورىن تولىقتىرۋ بولىپ تابىلادى. وعان قاتىسۋشى سۋرەتشىلەر وسى مەرزىمدە كونستيتۋتسيا كۇنى, وتباسى, ماحاببات, ەۋروپا-ازيا, قازاقستان تاۋەلسىزدىگىنىڭ 20 جىلدىعى جانە اقتوبە قالاسى تاقىرىپتارىنا ءۇش كەسكىندەمە تۋىندىسىن جازىپ ءبىتىرۋى كەرەك. بۇل تۋىندىلار وبلىستىق ونەر مۇراجايىنىڭ قورىنا قالدىرىلادى.
ساتىبالدى ءساۋىرباي.