ماڭعىستاۋ وبلىسى بويىنشا قارجىلىق مونيتورينگ اگەنتتىگىنىڭ دەپارتامەنتى زاڭسىز ونلاين-كازينو ۇيىمداستىرۋ فاكتىسى نەگىزىندە سوتقا دەيىنگى تەرگەۋ جۇرگىزىپ جاتىر. ءىس بويىنشا رانتيك باحتيار وگلى كۇدىككە ىلىنگەن, دەپ حابارلايدى Egemen.kz.
ۆەدومستۆو مالىمەتىنشە, ويىن پلاتفورماسىنىڭ جۇمىسى ءۇشىن «bingo37 pro» سەرۆيسى پايدالانىلعان. بۇل سەرۆيس مىڭنان استام قۇمار ويىن تۇرىنە قولجەتىمدىلىك بەرگەن. ولاردىڭ قاتارىندا «Crazy Monkey», «Keno», «Euro Game» جانە وزگە دە تانىمال ويىندار بار.
زاڭسىز كازينو ۇيىمداستىرۋشىلاردان 420 ملن تەڭگەنىڭ مۇلكى تاركىلەندى
تەرگەۋ دەرەكتەرىنە سايكەس, كليەنتتەر Telegram جانە WhatsApp مەسسەندجەرلەرى ارقىلى تارتىلعان. وندا جارنامالىق حابارلامالار, فوتو جانە بەينەماتەريالدار, سونداي-اق اكتسيالار مەن بونۋستىق ۇسىنىستار تاراتىلىپ, وڭاي ءارى تەز ۇتىسقا كەنەلۋ مۇمكىندىگى تۋرالى تۇسىنىك قالىپتاستىرىلعان. قاراجات اۋدارعاننان كەيىن ويىنشىلارعا پلاتفورماعا كىرۋگە ارنالعان لوگين مەن قۇپياسوز بەرىلگەن.
افم مالىمەتىنشە, اقشا قابىلداۋ جانە قارجى اعىندارىن جاسىرۋ ماقساتىندا گرۋزيا مەن تاجىكستان ازاماتتارى «دروپپەر» رەتىندە تارتىلعان. ولار قازاقستان اۋماعىنا ارنايى كەلىپ, بانك شوتتارى مەن ابونەنتتىك نومىرلەردى تىركەگەن. كەيىن بۇل شوتتار مەن نومىرلەردى ۇيىمداستىرۋشىعا بەرىپ, وزدەرى ءىس جۇزىندە باسقارماعان.
تىركەلگەن شوتتار ارقىلى 3,1 ملرد تەڭگەدەن استام قاراجات وتكەن.
قازىرگى ۋاقىتتا تەرگەۋ امالدارى جالعاسىپ جاتىر. وزگە اقپارات تەرگەۋ مۇددەسىنە بايلانىستى جاريا ەتىلمەيدى.
ەلىمىزدە تەك شەتەلدىكتەر كىرە الاتىن كازينولار سالىنادى