– دەيدى ناقاق قارالانعان ورال قالاسىنىڭ تۇرعىنى ۆلاديمير پولۋبوياروۆ
ءبىز بۇل كىسىنى بۇرىننان بىلەتىنبىز. ول ءبىراز جىلداردان بەرى قۇرىلىس مەكەمەلەرىندە جەتەكشىلىك قىزمەتتەر اتقاراتىن. سوڭعى ۋاقىتتاردا باتىس قازاقستان وبلىستىق قۇرىلىس باسقارماسى باستىعىنىڭ ورىنباسارى بولىپ ىستەدى. وزىنە جۇكتەلگەن جاۋاپكەرشىلىكتى تەرەڭ سەزىنە بىلەتىن باسشى ەكەنىنە دە كۇمانىمىز بولمايتىن. تۇلەن ءتۇرتەيىن دەسە قيىن با؟ كۇندەردىڭ ءبىر كۇنىندە ونىڭ ءۇستىنەن قىلمىستىق ءىس قوزعالدى. ۆ.پولۋبوياروۆ «ەگەمەن قازاقستاننىڭ» تىلشىلەر قوسىنىنا وسى ءماسەلەگە بايلانىستى كەلىپتى. اماندىق-ساۋلىقتان سوڭ قولىنداعى پاپكاسىنىڭ اراسىنان ەكى-ءۇش پاراق قاعازدى الدى دا:
– وقىپ, تانىسىپ كورىڭىزشى دەپ ءوتىنىش جاسادى.
– بۇل نە ءوزى ۆلاديمير بوريسوۆيچ, ءتۇسىندىرىپ ايتپايسىز با؟
– تۇسىندىرەتىن ەشتەڭەسى جوق. بۇل جوعارعى سوتتىڭ قىلمىستىق ىستەر جونىندەگى قاداعالاۋشى سوت القاسىنىڭ 2011 جىلدىڭ 26 شىلدەدەگى قاۋلىسى. وسى قاۋلىعا ءسايكەس مەن قىلمىستىق كودەكستىڭ 307-بابىنىڭ 4-ءشى جانە 314-بابىنىڭ 2-ءشى تارماقتارى بويىنشا تولىق اقتالىپ شىقتىم. بۇل جەردە رەسپۋبليكامىزداعى سوت جۇيەسى ادىلدىكتىڭ تۋ ۇستاۋشىسى, قارا قىلدى قاق جارعان تورەشىسى ەكەنىنە كوزىم جەتكەنىن ايتقىم كەلەدى.
– ءسىز نە ءۇشىن قىلمىستىق جاۋاپكەرشىلىككە تارتىلىپ ەدىڭىز؟
– ماعان سىبايلاس جەمقورلىققا قاتىسى بار دەگەن ايىپ تاعىلدى. بەلگىلى ءبىر قۇرىلىس نىساندارىن تۇرعىزعان كەزدە كەلىسىمشارتتىق قارىم-قاتىناستاردى بەلىنەن باسقان, ونى ورەسكەل بۇزعان بولىپ شىعىپپىن. ءسويتىپ, ماعان قاتىستى قوزعالعان قىلمىستىق ءىس ءبىرىنشى كەزەكتە ورال قالالىق سوتىندا, سودان كەيىن باتىس قازاقستان وبلىستىق اپەللياتسيالىق سوت ساتىسىندا قارالدى. جوعارعى سوت ولار شىعارعان شەشىمدى وزگەرىسسىز, سول كۇيىندە قالدىردى. سوعان سايكەس ماعان جوعارىدا تاعىلعان ايىپتار نەگىزسىز دەپ تابىلدى. مەملەكەتىمىزدىڭ باس گازەتىنىڭ وبلىستاعى وكىلىنە كەلگەن ماقساتىم – سولارعا دەگەن شىن جۇرەكتەن شىققان العىس سەزىمىم مەن ريزاشىلىعىمدى جەتكىزۋ ەدى.
مەن, اسىرەسە, جوعارعى سوت جۇيەسىندە قالىپتاسقان قاراپايىم ادامدارعا دەگەن سەرگەك كوزقاراسقا ءتانتى بولدىم. جوعارعى سوت مۇشەلەرىنىڭ ارقايسىسى قالىڭ-قالىڭ ءتورت پاپكادان تۇراتىن ىسپەن ەگجەي-تەگجەيلى تانىسىپ شىققانى مەنى تاڭقالدىردى ءارى ءسۇيسىندىردى. قاي ءىستىڭ دە باستى جاۋى – سەلقوستىق پەن نەمقۇرايدىلىق دەسەك, مۇنداي كوزقاراستان ولاردىڭ قاي-قايسىسى دا بويلارىن اۋلاق ۇستايتىن بولىپ شىقتى. ءىستى قاراۋ بارىسىندا وي-پىكىرلەردىڭ ناقتىلىعى مەن ايقىندىعى, جۇيەلىلىگى مەن قيسىندىلىعى كوزگە بىردەن بايقالىپ تۇردى.
ايتايىن دەگەنىم, ءبىزدىڭ ءتاۋەلسىز, ەگەمەن ەلىمىزدە ناقاق قارالانعان ادامدارعا اراشا ءتۇسىپ, ولاردى قورعاپ قالا الاتىن ءادىلەتتىڭ اق الماسىنداي سوت جۇيەسى قالىپتاسقان ەكەن. مەنىڭ وسىعان كوزىم جەتتى. سوندىقتان دا ءتاۋەلسىزدىكتىڭ 20 جىلىندا ەلىمىزدىڭ سوت جۇيەسى دە, كۇردەلى سىندارلى جولدان ءوتىپ, رەسپۋبليكا ازاماتتارىنىڭ سەنىمىنە يە بولا الدى دەپ ايتا الامىن. سونىمەن بىرگە, وسى ءساتتى پايدالانىپ جوعارعى سوت توراعاسى ب.بەكنازاروۆقا قىلمىستىق ىستەر جونىندەگى قاداعالاۋشى سوت القاسىنىڭ ءتوراعاسى ا.قاسىموۆقا, وسى القانىڭ بارلىق ءمۇشەلەرىنە ماعان قاتىستى قارالعان ءىس ماتەريالدارىمەن تانىسۋ بارىسىندا ادىلدىك تانىتقاندارى ءۇشىن تاعى دا ريزاشىلىعىمدى بىلدىرەمىن. «ەگەمەنگە» كەلگەندەگى ايتايىن دەگەنىم وسى ەدى. وسى ءبىر كەۋدەمدەگى شاتتىعىمنىڭ كورىنىسى باس باسىلىمنان ورىن تاۋىپ جاتسا, شەكسىز قۋانىشتى بولار ەدىم.
ول وسىلاي دەدى دە, بىزگە ءۇمىت ارتا قارادى.
تەمىر قۇسايىن.
ورال.