قوستانايداعى «مارت» ويىن-ساۋىق ورتالىعىندا وبلىستىق مادەنيەت, جاستار ساياساتى باسقارمالارىنىڭ جانە قالالىق مادەنيەت جانە تىلدەردى دامىتۋ ءبولىمىنىڭ ۇيىمداستىرۋىمەن ەلىمىز تاۋەلسىزدىگىنىڭ 25 جىلدىعى قارساڭىنداعى «25 جۇلدىزدى كۇن» اكتسياسى اياسىندا قۇمانعازىنىڭ «سارىارقا» كۇيىن ءبىر مەزگىلدە ورىنداعان دومبىراشىلار فلەشموبى ءوتتى. ساعات كۇندىزگى 12.00-دە بۇل فلەشموب وبلىس اۋداندارىندا مەن قالالارىندا بىردەي باستالدى. وعان بارلىعى 300 دومبىراشى قاتىستى.
«مەن وبلىستىق بالالار شىعارماشىلىعى ۇيىندە دومبىرا ۇيىرمەسىنە قاتىسامىن. فلەشموبقا ءبىرىنشى رەت قاتىستىم. ءبىز الدىن الا «سارىارقا» كۇيىن تارتىپ, جاتتىققان بولاتىنبىز, جاقسى وينادىق. ويىن-سۋىق ساۋدا ۇيىنە كەلگەن جۇرتشىلىقتىڭ بارلىعى بىزگە قىزىقتاي قاراپ, كۇي تىڭداپ كەتتى» دەيدى فلەشموبقا قاتىسقان بەكزات جاۋكە.
«ءوز شارۋاممەن ساۋدا ۇيىنە كەلگەن ەدىم, «سارىارقا» كۇيىنىڭ وينالىپ جاتقانىن كورىپ, جاقىنداپ, تىڭدادىم. ماعان ۇنادى, رۋحىڭدى كوتەرەدى. ۇلى دالاداعى بابالار مىنگەن تۇلپارلار ءدۇبىرىن ەستىگەندەي اسەرلەندىم», دەدى قوستاناي قالاسىنىڭ تۇرعىنى نۇربول ابدىعالي. فلەشموبتىڭ ماقساتى حالىقتىق مۋزىكانى ناسيحاتتاۋمەن بىرگە, تاۋەلسىزدىك رۋحىن كۇي ارقىلى جەتكىزۋ ەدى.
وبلىستىق مادەنيەت باسقارماسىنىڭ قىزمەتكەرى يرينا شاتكونىڭ ايتۋىنشا, وبلىس قالالارى مەن اۋداندارىنىڭ بارلىعىندا دومبىراشىلار فلەشموبى ساعات 12.00-دە بىردەي باستالدى. دومبىراشىلار سانى 300-دەن اسىپ جىعىلۋى دا مۇمكىن. فلەشموب بارلىق جەرلەردە ادامدار جۇرەتىن قوعامدىق ورىنداردا ءوتتى. مىسالى, ول ارقالىق قالاسىندا -- پەداگوگيكا كوللەدجىندە, قاراسۋدا—ساۋدا ورتالىعىندا, قارابالىقتا اۆتوۆوكزالدا تۇرعىندار دومبىراشىلاردىڭ ورىنداۋىندا «سارىارقانى» تىڭدادى.
ءنازيرا جارىمبەتوۆا, «ەگەمەن قازاقستان».