«NOMAD» ساقتاندىرۋ كومپانياسىنىڭ ساراپشىلارى 2016 جىلى قازاقستاندىقتار ءجيى ساياحاتتاعان شەت ەلدىڭ ءتىزىمىن جاسادى, دەپ حابارلايدى قازاقپارات. ونى انىقتاۋ ءۇشىن اتالعان كومپانيا 24 مىڭنان استام پوليستەردى ساراپتاپ شىققان. ناتيجەسىندە, قازاقستاندىقتار ساياحاتتاعان تانىمال شەت ەلدەردىڭ رەيتىنگى دايىندالعان.
رەيتينگتە شەنگەن ايماعى ەلدەرى (گەرمانيا, يسپانيا, يتاليا, گرەتسيا) كوش باستاپ تۇر. قازاقستاندىق تۋريستەرگە 2016 جىلدىڭ باسىنان بەرىلگەن بارلىق مەديتسينالىق ءپوليستىڭ 32 پايىزى وسى ەلدەرگە شىعاتىندارعا رەسىمدەلگەن.
بالالارىمەن دەمالىس وتكىزۋ ماسەلەسىندە قازاقستاندىقتار نەگىزىنەن 2016 جىلى تۇركيانى تاڭداعانى بەلگىلى بولدى. كومپانيا رەسىمدەگەن پوليستەر بويىنشا ساراپتايتىن بولساق, تۇركياعا بەرىلگەن پوليستەر پايىزدىق كورسەتكىشپەن ەسەپتەگەندە 19 پايىزدى قۇراعان.
تۇركيادان كەيىن رەيتينگتە ءۇشىنشى ورىندى بىرىككە اراب امىرلىكتەرى العان. ول ەلگە بارۋشىلارعا 17 پايىز مەديتسينالىق ساقتاندىرۋ پوليستەرى رەسىمدەلگەن.
قازاقستاندىقتار ساياحاتتاعاندى ۇناتاتىن ءتورتىنشى ەل تايلاند كورولدىگى. بۇل ەلگە ساياحاتتاۋشى قازاقستاندىقتارعا 8,1 پايىز ساقتاندىرۋ ءپوليسى رەسىمدەلگەن. كەلەسى ورىندا رەسەي مەن گرۋزيا. اتالعان ەلدەرگە بارلىعى 2 پايىز پوليس رەسىمدەلگەن.
«جالپى, جاھانداعى احۋال, حالىقتىڭ تابىس كوزىنىڭ ازايۋى, شەت ەلگە دەمالۋشىلاردىڭ سانىن كەمىتىپ وتىر. 2015 جىلى جاز ماۋسىمىندا بارۋعا ىڭعايلى بولعان ەلدەرگە 2016 جىلى بارۋشىلار كوپ بولمادى. رەسمي ستاتيستيكا بويىنشا, 2016 جىلدىڭ العاشقى جارتى جىلدىعىندا شەتەلگە قازاقستاننان 4,5 ملن تۋريست شىققان. بۇل 2015 جىلدىڭ سايكەس كەزەڭى, العاشقى جارتى جىلدىعىمەن سالىستىرعاندا 18 پايىزعا تومەن. 2015 جىلى ول كەزەڭدە قازاقستاننان 5,5 ملن تۋريست شەتەلگە بارىپ دەمالعان», - دەلىنگەن ساقتاندىرۋ كومپانياسىنىڭ حابارلاماسىندا.