بۇگىنگى كۇنى يپوتەكالىق قارىزدىڭ ۇلەسى بار بولعانى 8 پايىزدى قۇرايدى. ونىڭ ۇلكەن بولىگى «تۇرعىن ءۇي قۇرىلىس جيناق بانكىنە» تيەسىلى. يپوتەكانى 1-2 دەڭگەيدەگى بانك قانا بەرەدى. ال «نۇرلى جەر» باعدارلاماسىندا بانكتەردى ىنتالاندىراتىن تەتىكتەر الىنىپ تاستالعان. بۇل تۋرالى بۇگىن ۇكىمەت وتىرىسىندا تۇرعىن ءۇي قۇرىلىسى بىرىڭعاي باعدارلاماسى تۇجىرىمداماسىن تالقىلاۋ بارىسىندا قازاقستان قۇرىلىسشىلار قاۋىمداستىعىنىڭ توراعاسى ايدىن راقىمباەۆ ايتتى.
«بۇل جەردە رەسەيدىڭ وڭ تاجىريبەسىن مىسالعا كەلتىرۋگە بولادى. كورشى ەلدە يپوتەكالىق كرەديت ۇلەسى ايتارلىقتاي جوعارى, ال يپوتەكانى وتەمەۋ مولشەرى 5 پايىزدان تومەن. باعدارلامانىڭ الدىڭعى رەداكتسياسىندا بىرىڭعاي جيناقتاۋشى زەينەتاقى قورىنداعى قاراجات ەسەبىنەن بانكتەردى قورلاندىرۋ تەتىكتەرى قاراستىرىلعان بولاتىن. بىراق بۇل تەتىكتەر ۇلتتىق بانكتىڭ ەسكەرتۋلەرىنەن كەيىن الىنىپ تاستالدى. وكىنىشكە قاراي, قازىرگى ۋاقىتتا بانكتەر جاي دا يپوتەكا بەرۋگە مۇددەلى ەمەس», - دەيدى ا.راقىمباەۆ.
ونىڭ ايتۋىنشا, بانكتەردىڭ ۇزاق مەرزىمگە بەرىلەتىن ارزان اقشاسى بولماعاندىقتان, باعدارلامادا ۇسىنىلىپ وتىرعان شارالاردى جاپپاي قولدانىسقا ەنگىزۋ مۇمكىن بولمايدى.
ال باعدارلاما تۇجىرىمداماسىندا 2017 جىلدان باستاپ حالىققا 17 پايىزبەن بەرىلەتىن ەكىنشى دەڭگەيدەگى بانكتەردىڭ يپوتەكاسىن سۋبسيديالاۋ جوسپارلانىپ وتىر. ناتيجەسىندە قارىز الۋشى ءۇشىن سىياقى مولشەرلەمەسى 10 پايىزدى قۇرايتىن بولادى.
دينارا بىتىكوۆا, "ەگەمەن قازاقستان".