«Almaty Invest-2016» فورۋمىنا 63 مەملەكەتتىڭ بيزنەس وكىلدەرى كەلدى
بەيسەنبى كۇنى الماتىداعى Ritz-Carlton قوناق ۇيىندە «Almaty Invest-2016» ءىV حالىقارالىق ينۆەستيتسيالىق فورۋمى باستالدى. ءۇش كۇنگە سوزىلعان بۇل فورۋم سارسەنبى كۇنى الماتىداعى ينۆەستورلاردى تارتۋ جانە قالانىڭ ينۆەستيتسيالىق اۋحالىن جاقسارتۋ جونىندەگى كەڭەستىڭ ماجىلىسىنەن باستاۋ العان بولاتىن. فورۋمنىڭ نەگىزگى جيىنىنا 63 مەملەكەتتەن 500-دەن استام بيزنەس سالاسىنىڭ كوشباسشىلارى, ينۆەستيتسيالىق كورپوراتسيالار جەتەكشىلەرى, قارجى ينستيتۋتتارى مەن حالىقارالىق ۇيىمداردىڭ وكىلدەرى قاتىستى. ولاردىڭ اراسىندا بەلگىلى ساياساتكەرلەر دە بار.
حالىقارالىق جيىندا قالا اكىمى باۋىرجان بايبەك, ۇلتتىق بانك توراعاسى دانيار اقىشەۆ, UBS Asset Management ستراتەگيالار جانە جاھاندىق نارىقتار بويىنشا باسشىسى ماسسيميليانو كاستەلي مەن Sanlas hoiding كومپانياسىنىڭ نەگىزىن قالاۋشى گيۋنتەر نەبەل سەكىلدى ساراپشىلار ءسوز الدى.
الماتىدا بيىلعى 11 اي ءىشىندە نەگىزگى كاپيتالعا ينۆەستيتسيا تارتۋ 1,1 ميلليارد اقش دوللارىن قۇراعان. قازىر وڭتۇستىك استانادا 100 ەلدىڭ 14 مىڭنان استام كومپانياسى ەكونوميكانىڭ سان سالاسى بويىنشا جۇمىس ءىستەۋدە.
قالاي بولعاندا دا, سىرتتاعى بيزنەس-قاۋىمداستىقتىڭ قازاقستانعا دەگەن سەنىمىن جوعالتپاي, ينۆەستيتسيانى ىركىلدىرمەۋ ءۇشىن جاسالىپ جاتقان شارالار بار. ال ينۆەستيتسيا تارتۋ ماسەلەسىندە الماتىنىڭ ورنى ايرىقشا بولىپ قالا بەرمەك. جاڭا جىبەك جولى بويىنداعى ەكونوميكالىق ىسكەرلىك ورتالىعىنا اينالعان الماتىدا ءاربىر ون ادامنىڭ جەتەۋى ورتا جانە شاعىن بيزنەستە جۇمىس ىستەيدى.
وسىمەن ءتورتىنشى رەت وتكىزىلىپ وتىرعان «Almaty Invest-2016» حالىقارالىق ينۆەستيتسيالىق فورۋمىندا الماتى قالاسىنىڭ اكىمى «الماتى – مادەنيەتتىڭ, بيزنەس پەن جەكە كاپيتالدىڭ قالاسى. تاۋەلسىزدىك جىلدارى قالا بيۋدجەتى 41 ميلليارد دوللارعا دەيىن جەتتى. بۇل ەلىمىزدىڭ مۇنايدان ءبولەك كىرىستەرىنىڭ 1/3 بولىگىن بەرەدى. قالادا شاعىن جانە ورتا بيزنەس 130 ەسەگە ءوسىپ, 183 مىڭعا جەتتى, ونىڭ 14 مىڭى شەتەلدىك كاپيتالدىڭ كاتىسۋىمەن جۇمىسىن جۇرگىزىپ وتىر. 25 جىل ءىشىندە قازاقستاندا ءومىر ءسۇرۋ ساپاسى جاقساردى. سوڭعى 5 جىلدا الماتى 2 ەسەگە ءوستى. قالا حالقى اگلومەراتسيا ەسەبىنەن 3 ميلليونعا جەتتى. الماتى – ۇلى جىبەك جولىنداعى 1000 جىلدىق تاريحى بار قالا» دەدى.
قالا اكىمى تاۋەلسىزدىك جىلدارى قالانىڭ ينفراقۇرىلىم سالاسىنا 3 ميلليارد دوللاردان استام قارجى جۇم-
سالعانىن ايتا كەلە, وسى جىلداردا الماتىدا 28 جولايرىق سالىنعانىن, كەلەسى جىلى 4 جولايرىق پەن كۇرە جولدار قۇرىلىسى جالعاساتىندىعىن ءمالىمدەدى.
– الماتىعا ينۆەستيتسيا تارتۋدىڭ تەتىگى – تۋريزم سالاسى. ەلىمىزگە كەلگەن ءاربىر ەكىنشى تۋريست الماتىعا سوقپاي كەتپەيدى. الماتىدا جوعارى ساپاداعى 2 مىڭ مەيرامحانا قوناقتاردى قابىلداۋعا دايىن. الداعى ۋاقىتتا الماتى حالىقارالىق اۋەجايىن كەڭەيتۋ, ماشينا جاساۋ كاسىپورىندارىنا, حيميالىق فارماتسەۆتيكاعا كوڭىل بولىنبەك. قالامىزدا ينۆەستورلار ءۇشىن بارلىق جاعداي جاسالدى. ەلىمىز 30 جىلعا دەيىن كەدەرگىسىز تابىس تابۋعا كەپىلدىك بەرەدى, – دەدى الماتى قالاسىنىڭ اكىمى.
ەلىمىزدىڭ باس بانكيرى دانيار اقىشەۆ «تمد ەلدەرىنىڭ ىشىندە قازاقستان ينۆەستورلار ءۇشىن ەڭ تارتىمدى نىساننىڭ ءبىرى بولىپ قالا بەرەدى. بۇعان الەمدىك قارجىلىق نارىقتاعى قۇبىلمالى جاعدايعا قاراماستان, قازاقستانداعى ەكونوميكالىق تۇراقتىلىق ىقپال ەتىپ تۇر. مۇنىڭ ايعاعى, 2016 جىلدىڭ 6 ايىندا ەلىمىزگە كەلگەن تازا ينۆەستيتسيالىق قارجى 12,1 ميلليارد اقش دوللارىنا جەتتى. مۇنان بولەك, ۇستىمىزدەگى جىلدىڭ ءۇشىنشى توقسانىندا رەكوردتىق قارجى لەگى تىركەلىپ, ول 6,4 ميلليارد دوللارعا جەتتى. ۇكىمەت ەلدە جاعىمدى ينۆەستيتسيالاق احۋال ورناتۋعا جۇمىس ىستەۋدە. سونداي-اق, مۇناي باعاسىنىڭ تومەندەۋىنە قاراماستان, ەلىمىزدە ءىجو-ءنىڭ ءوسىمى بايقالادى. ءدال قازىرگى ۋاقىتتا ول 0,4 پايىزدى قۇرايدى. جىل اياقتالعانشا بۇل كورسەتكىش وسە تۇسەدى دەپ ەسەپتەپ وتىرمىز», دەدى.
ءوز كەزەگىندە ينۆەستيتسيالار جانە دامۋ ۆيتسە-ءمينيسترى ەرلان قايىروۆ قازاقستانعا ينۆەستيتسيا سالۋدىڭ ارتىقشىلىقتارىن اتاي كەلە, «بيىلعى جىلدىڭ باسىنان باستاپ, ەلىمىزدىڭ بارلىق وڭىرىندە ينۆەستورلار ءۇشىن «ءبىر تەرەزە» قاعيداتى جۇمىس جاسايدى. جىل باسىنان بەرى 4000 مەملەكەتتىك قىزمەت كورسەتىلدى, ونىڭ ىشىندە ۆيزا الۋدان باستاپ, جۇمىس كۇشىن اكەلۋ, جەر ۋچاسكەلەرىن الۋ قىزمەتتەرى بار», دەدى
سونداي-اق, ۆيتسە-مينيستر ەلىمىزدە ينۆەستيتسيالىق ومبۋدسمەن بار ەكەنىن ايتتى. ماسەلەن, سوتقا دەيىن 60 ماسەلە ينۆەستورلاردىڭ پايداسىنا شەشىلگەن.
«ەگەر ءسىز قازاقستان ءۇشىن جاڭا تاۋار شىعاراتىن بولساڭىز, ول تاۋار ەكسپورتقا باعىتتالسا, وندا ۇكىمەت قۇرىلىس-مونتاج جۇمىستارى جانە ءسىزدىڭ قۇرىلعى باعاسىنا قاتىستى شىعىننىڭ 30 پايىزىن وتەۋگە دايىن. ءبىز شەتەلدىك جۇمىس كۇشىن قۇرىلىس جۇمىستارى بارىسىندا قازاقستانعا كىرگىزۋگە جانە قۇرىلعىنى ىسكە قوسقاننان كەيىن دە ءبىر جىلعا كىرگىزۋگە رۇقسات بەرەمىز», دەدى ۆيتسە-مينيستر.
قىسقاسى, اۋقىمدى فورۋم كەزىندە يندۋستريالىق ايماق اۋماعىندا بيدايدى قايتا وڭدەۋ زاۋىتى, الماتى قالاسىنداعى وڭالتۋ ورتالىعى, «Leroy Merlin» جانە «OBI» گيپەرماركەتتەرى قۇرىلىسىنىڭ 300 ميلليارد تەڭگەنى قۇرايتىن ينۆەستيتسيالىق جوبالارى بويىنشا شامامەن 50 مەموراندۋم جاسالادى دەپ كۇتىلۋدە.
سپيكەرلەر قاتارىندا Carrefour, Leroy Merlin, Sanlas Holding, Tokyo Rope, EuroShop, UBS Asset Management, دۇنيەجۇزىلىك بانك, ەفكو جانە باسقا دا ۇيىمداردى قوسا العاندا, قالاعا ينۆەستيتسيا سالعان نەمەسە ينۆەستيتسيالاۋدى جوسپارلاپ وتىرعان ءىرى حالىقارالىق ۇيىمداردىڭ باسشىلارى بار.
فورۋمدا ساۋدا جانە قىزمەت كورسەتۋ سالاسى, تاماق ونەركاسىبى, ىسكەرلىك تۋريزم, مەملەكەت-جەكەمەنشىك سەرىكتەستىگى جانە يندۋستريالىق دامۋ سەكىلدى نەگىزگى 5 باعىت بويىنشا الماتى قالاسىنىڭ ينۆەستيتسيالىق مۇمكىندىكتەرى تالقىلاندى.
حالىقارالىق فورۋم جۇما كۇنى دە جالعاسادى. 9 جەلتوقسانداعى ءىس-شارالار جۇمىس ىستەيتىن كاسىپورىندارعا, ونەركاسىپتىك ايماقتار مەن تۋريستىك نىساندارعا قىزىعۋشىلىق تانىتقان ينۆەستورلار ءۇشىن ينۆەستيتسيالىق تۋرلار ۇلگىسىندە وتەدى. بۇدان باسقا, KASE قور بيرجاسىنىڭ جۇمىس ىستەۋ ءتاسىلدەرى بويىنشا سەمينار ۇيىمداستىرىلىپ, «Almaty StartUp City-2017» باعدارلاماسىنىڭ تۇساۋى كەسىلمەك. الماتىلىق ستارتاپشىلار ءۇشىن شەبەرلىك ءدارىستەرى مەن ۆوركشوپتار وتەدى.
ايناش ەسالي,
«ەگەمەن قازاقستان»
الماتى
سۋرەتتەردى تۇسىرگەن
داۋرەن يساەۆ