قازاقستان كاسىپقوي فۋتبول ليگاسى Instat كومپانياسىنىڭ ءاناليزىن پايدالانا وتىرىپ, 2016 جىلعى پرەمەر-ليگانىڭ ۇزدىك قاقپاشىلارىن جاريالادى, دەپ حابارلادى sports.kz.
«استانانىڭ» قاقپاشىسى نەناد ەريچ ءوز پوزيتسياسىندا وتكەن ماۋسىمنىڭ ۇزدىگى اتاندى. ونىڭ يندەكسى – 203-كە تەڭ. مۇنداي شەشىم شىعارۋعا ونىڭ قايتارعان سوققىلارىنىڭ سانى, سەيۆتەرى, قارسىلاسىمەن جەكە شىققانداعى ويىنى, ءدال بەرگەن پاستارى (ۇزىن, قىسقا, كونسترۋكتيۆتى) ت.ب. نەگىز بولدى.
ەلىمىزدىڭ ءۇش دۇركىن چەمپيونى اتانعان تاجىريبەلى قاقپاشى بيىلعى ماۋسىمدا 30 ويىنعا (2850 مينۋت) قاتىسىپ, 21 گول جىبەرگەن. سونىمەن قاتار, 79 سوققىنى قايتارعان جانە 29 سەيۆ جاسادى. قارسىلاسىمەن جەكە شىققان كەزدە دە ءساتتى (95%) ويناعان. ال پاستارىنىڭ دالدىگى 81%-عا تەڭ.
ەكىنشى ورىندا – رەسەيدىڭ «روستوۆ» كومانداسىنان جالعا العان «قايراتتىڭ» گولكيپەرى ستاس پوكاتيلوۆ. ونىڭ يندەكسى 201-ءدى قۇرايدى. ول بارلىعى 8 ويىنعا (763 مينۋت) قاتىسىپ, 6 گول جىبەرگەن. بۇل ويىنداردا 24 مارتە (80%) سوققى قايتارا بىلگەن. بۇل قاقپاشىلار اراسىنداعى ۇزدىك كورسەتكىش. قارسىلاسىمەن بەتپە-بەت شىققانداعى كورسەتكىشى دە كوڭىل تولارلىق, 87%-دى قۇرايدى. سونداي-اق, 84% ءدال پاس بەرگەن.
ءۇشىنشى ورىندا – كوكشەتاۋدىڭ «وقجەتپەسىندە» وينايتىن ساشا ستامەنكوۆيچ. بۇل قاقپاشىنىڭ يندەكسى – 197. بارلىعى 29 ويىندا (2756 مينۋت) 40 دوپ جىبەرگەن. چەمپيوناتتا 112 سوققىنى قايتارىپ, بۇل كورسەتكىشتە ۇزدىك ناتيجەگە قول جەتكىزدى. سينەگوريالىق گولكيپەر 55 سەيۆ جاساپتى. قارسىلاسىمەن جەكە شىققانداعى كورسەتكىشى 90%-عا, ال پاستارىنىڭ دالدىگى 77%-عا تەڭ.
ءتورتىنشى ورىندا – المات بەكباەۆ («ورداباسى»), بەسىنشى ورىندا – دەنيس تولەباەۆ («اقجايىق»), التىنشى ورىندا – انتون تسيرين («ەرتىس»), جەتىنشى ورىندا – داۆيد لوريا («ەرتىس»), سەگىزىنشى ورىندا – جاسۇر نارزىقۇلوۆ («اتىراۋ»), توعىزىنشى – الەكساندر گريگورەنكو («تاراز»), ونىنشى – سامات وتارباەۆ («اقتوبە»).