كەلەسى جىلى وبلىستا شىبىن-شىركەيمەن كۇرەسكە بولىنەتىن قاراجات قۇنى ءتورت ەسە وسپەك, دەپ حابارلادى pavlodarnews.kz.
بۇل تۋرالى جۋرناليستەرمەن بەيرەسمي كەزدەسۋ بارىسىندا وبلىس اكىمى بولات باقاۋوۆ مالىمدەدى.
«بيىل شىبىن-شىركەيلەرگە قارسى كۇرەسكە 143 ميلليون تەڭگە بولىنسە, 2017 جىلى 602 ميلليون تەڭگە ءبولۋدى جوسپارلاپ وتىرمىز. وسىلايشا, ەكسپو كورمەسى وتەتىن جىلى وڭىردە جاندىكتەردىڭ بۇل ءتۇرى كۇرت ازايماق. اتالمىش جۇمىسپەن اينالىساتىن مەردىگەرلەردى الدىن الا بەلگىلەيتىن بولامىز. نەگىزى, بۇل كونكۋرستى قاراشا-جەلتوقسان ايلارىندا وتسە دەپ ويلادىم, بىراق مەرزىمى ءبىراز شەگەرىلدى. زەرتحانالار دا ەرتەرەك وبلىستاعى جاعداي بويىنشا ەسكەرتۋ جاسايدى. ءبىزدىڭ ءوڭىر ءۇشىن بۇل وتە ماڭىزدى. پاۆلودار وبلىسىنا تۋريستەردى تارتۋ كەرەك جانە وسى ماسەلەدە ەشنارسە كەدەرگى بولماۋ كەرەك.
ايتا كەتەيىك, بيىل ەرتىس وزەنىنىڭ تاسۋى سوڭعى 15 جىلدا رەكوردتىق كورسەتكىشكە جەتكەن بولاتىن. سونىڭ سالدارىنان پاۆلودارلىقتار ەكى مارتە شىبىن-شىركەيدىڭ استىندا قالدى. كوكتەمدە وزەنگە 19 توننا «باكتيتسيت» بيولوگيالىق ءدارى-دارمەگى قۇيىلدى. الايدا, بۇل ءدارىنىڭ وبلىستا شىبىن-شىركەيدىڭ سانىن ازايتۋعا سەپتىگى بولمادى.