ۇكىمەت قر پرەزيدەنتىنىڭ قاراۋىنا ۇلتتىق قوردىڭ قاراجاتىن پايدالانۋدى قالىپتاستىرۋ بويىنشا جاڭا تۇجىرىمداما ەنگىزدى. بۇل تۋرالى بۇگىن قر پرەمەر-ءمينيسترى باقىتجان ساعىنتاەۆ ايتتى, دەپ حابارلادى «قازاقپارات».
«الەمدەگى جاعداي كۇردەلى ەكەنى بارشاعا بەلگىلى. مۇنى كورىپ وتىرمىز. بارلىعى اقشا تەك ۇلتتىق قوردان كەلەدى, باسقا تيىن جوق دەدى. ەگەر ءبىز تەك وسى باعىتتا ارەكەت ەتسەك, وندا ۇلتتىق قوردا تۇك تە قالمايدى. ءبىزدىڭ ۇلتتىق قور جايلى تىلەگىمىز مۇنايدىڭ باررەلىنە 100-115 دوللار بولعان كەزدەگىدەي قالىپ قويعان. بۇگىنگى مۇنايدىڭ باعاسى مۇلدەم باسقاشا. ءبىز ۇلتتىق قوردىڭ قاراجاتىن مۇنايدىڭ باعاسى باررەلىنە 100 دوللار جاعدايىندا ءومىر ءسۇرىپ جاتقانداي پايدالانعىمىز كەلەدى. سوندىقتان ءبىز مەملەكەت باسشىسىنا ۇلتتىق قوردىڭ قاراجاتىن پايدالانۋدى قالىپتاستىرۋدىڭ جاڭا تۇجىرىمداماسىن ەنگىزدىك. پرەزيدەنت تۇجىرىمدامانى ماقۇلدادى. ءتيىستى شەشىمدەر بار. كەلەسى جىلدان باستاپ ۇلتتىق قوردىڭ قاراجاتىن باسقاشا پايدالاناتىن بولامىز», - دەدى «اتامەكەن» ۇكپ پرەزيديۋمىنىڭ وتىرىسىندا ساعىنتاەۆ.
ەسكە سالساق, قازاندا ۇلتتىق ەكونوميكا ءمينيسترى قۋاندىق بىشىمباەۆ ءۇش جىلدا ۇلتتىق قور قاراجاتىن پايدالانۋ كولەمى ازايتىلاتىنىن حابارلاعان.
«وكىنىشكە وراي, ۇلتتىق قوردىڭ قاراجاتىن پايدالانۋدان قازىرگى ساتتە باس تارتا المايمىز. بىراق, جوسپارىمىز بويىنشا, 2017, 2018, 2019 جىلداردان باستاپ ءۇش جىل ىشىندە ءبىز بيۋدجەت شىعىستارى مەن ۇلتتىق قوردان تارتىلاتىن قاراجات كولەمىن تەڭگەرىمدەيمىز», - دەپ اتاپ ءوتتى ول.