اقتوبە وبلىسى قارعالى اۋدانىنداعى 2 مىڭنان اسا تۇرعىنى بار قوس-ەستەك اۋىلىنا كوگىلدىر وتىن تارتىلدى. گازدى ىسكە قوسۋ شاراسىنا وبلىس اكىمىنىڭ ورىنباسارى بەكسارى جاڭاباي, «قاز ترانس گاز» اق اقتوبە وندىرىستىك فيليال ديرەكتورى امانجول تاجعاليەۆ, اۋدان اكىمى راحات سىدىقوۆ قاتىستى. وبلىس اكىمىنىڭ ورىنباسارى ب.جاڭاباي اۋىل تۇرعىندارىن كوگىلدىر وتىننىڭ يگىلىگىن كورەر ءساتتى كۇندەرىمەن قۇتتىقتاپ, وبلىس اكىمى بەردىبەك ساپارباەۆتىڭ اتىنان 4 وتباسىنا, سانداي-اق اۋىلداعى «مومىن- اتا» مەشىتىنە گاز جەلىلەرىن تەگىن تارتۋ ءۇشىن كومەكتىك سەرتيفيكاتتارىن تابىستادى. «قاز ترانس گاز» باسشىسى امانجول تاجعاليەۆ بيىلعى جىل قازاقستاندىقتار ءۇشىن اسا ماڭىزدى ەكەنىنە توقتالىپ, سونىڭ ىشىندە كوگىلدىر وتىنمەن اۋىلدىقتاردى قامتۋ ەلباسىنىڭ تاپسىرماسى ەكەنىن ايتتى.
قۋانىشتى ءساتتى قارسى العان ساعىنتاي داۋلەتوۆ اۋىلداستارىن قۋانىشتارىمەن قۇتتىقتاپ, باسشى قاۋىمعا العىسىن جەتكىزدى. وبلىس اكىمىنىڭ ورىنباسارى بەكسارى جانباي مەن اۋىل اقساقالى ساعىندىق داۋلەتوۆ گاز قۇبىرىن ىسكە قوستى.
باقىت يماشەۆ,
اقتوبە وبلىسى.