وسىعان دەيىن 4 جەكپە-جەك وتكىزىپ, ونىڭ بارلىعىن ۋاقىتىنان بۇرىن اياقتاعان ءالي احمەدوۆ 5-ءشى ايقاسىن ەرتەڭ, ياعني 9 جەلتوقسان كۇنى وتكىزۋگە دايىن, دەپ حابارلايدى قازاقپارات.
وسىعان دەيىن جەرلەسىمىزدى پولشا جەرىندە لاتۆيالىق 20 جاستاعى ەدۋاردس گەراسيموۆسپەن جۇدىرىقتاساتىنى ايتىلعان بولاتىن. الايدا, بوكس كەشىنە بىرەر كۇن قالعاندا احمەدوۆتىڭ قارسىلاسى وزگەرگەنى بەلگىلى بولدى. ەندى جەرلەسىمىز گەراسيموۆپەن ەمەس, بەلارۋس بوكسشىسى ۋلادزيمير حاركەۆيچپەن جۇدىرىقتاسادى. ول كاسىپقوي بوكستا جالپى توعىز كەزدەسۋ وتكىزىپ, ەكەۋىندە نوكاۋتپەن جەڭسە, التاۋىندا جەڭىلگەن, ال ءبىر كەزدەسۋىندە تەڭ تۇسكەن.
جەرلەسىمىز ءالي احمەدوۆ سوڭعى جەكپە-جەگىن الماتىداعى قانات يسلام مەن پاتريك اللوتەي اراسىنداعى بوكس كەشىندە وتكىزگەن بولاتىن. وندا احمەدوۆ ازەربايجاندىق ماممەدوۆتى ءبىرىنشى راۋندتا جارىس جولىنان شىعارعان بولاتىن. بۇل بوكس كەشىندە باستى جەكپە-جەك رەتىندە اۋستراليالىقتار كايا ماككەنزي مەن ديلانا ەمەري اراسىنداعى كەزدەسۋ وتپەك. قوس سپورتشى ورتا جەڭىل سالماقتا اۋستراليا چەمپيونى تيتۋلىن ساراپقا سالادى.