بۇگىن ورتالىق كوممۋنيكاتسيالار قىزمەتىندە قازاقستان رەسپۋبليكاسىنىڭ اگروونەركاسىپتىك كەشەنىن دامىتۋدىڭ 2017-2021 جىلدارعا ارنالعان مەملەكەتتىك باعدارلاماسى اياسىندا 610 مىڭ گەكتار سۋارمالى جەردى اينالىمعا ءتۇسىرۋ مەن جەر قاتىناستارىن جەتىلدىرۋگە ارنالعان ءباسپاسوز كونفەرەنتسياسى بولىپ ءوتتى.
وعان اۋىل شارۋاشىلىعى مينيسترلىگى سۋ رەسۋرستارى كوميتەتىنىڭ توراعاسى يسلام ابىشەۆ پەن «قازسۋشار» رمك ديرەكتورىنىڭ ورىنباسارى ەريك ياكۋباەۆ قاتىستى.
«الداعى 5 جىلدا 610 مىڭ گەكتار اۋماقتاعى تۇراقتى سۋعارىلاتىن جەردىڭ يرريگاتسيالىق جۇيەسىن قالپىنا كەلتىرۋ جوسپارلانۋدا. اتاپ ايتقاندا, الماتى وبلىسىندا – 127 مىڭ, وقو – 99 مىڭ, شقو – 92 مىڭ, جامبىل وبلىسى – 86 مىڭ, بقو – 40 مىڭ, پاۆلودار وبلىسى – 30 مىڭ, اقتوبە وبلىسى – 29 مىڭ, قىزىلوردا وبلىسى – 29 مىڭ, قاراعاندى وبلىسى – 28 مىڭ, سقو – 28 مىڭ جانە اتىراۋ وبلىسى – 22 مىڭ گەكتار», – دەدى يسلام ابىشەۆ.
سونىمەن بىرگە, ونىڭ ايتۋىنشا, مەملەكەتتىك باعدارلاما اياسىندا 368 مىڭ گەكتار اۋماقتاعى كولدەتىپ سۋارۋ جەرىن قالپىنا كەلتىرۋ جوسپارلانىپ وتىر. اتاپ ايتقاندا, باتىس قازاقستان وبلىسىندا 163 مىڭ, شىعىس قازاقستاندا 56 مىڭ, اقمولا وبلىسىندا 44 مىڭ, اقتوبە وبلىسى – 41مىڭ, اتىراۋ وبلىسى – 36 مىڭ, پاۆلودار وبلىسى – 24 مىڭ جانە قاراعاندى وبلىسى – 4 مىڭ گەكتار. بۇدان باسقا, ەسكىرگەن كوللەكتورلىق-درەناجدىق جەلىلەردى قالپىنا كەلتىرۋ جوسپارلانۋدا. ونىڭ جالپى ۇزىندىعى 13,2 مىڭ شاقىرىم, ۆەرتيكالدى-درەناجدى ساڭىلاۋ 955 دانا بولادى.
داستان كەنجالين