«استانا» كومانداسىنىڭ باس جاتتىقتىرۋشىسى ستانيمير ستويلوۆ كلۋبتىڭ رەسمي سايتىندا شۆەيتساريانىڭ «يانگ بويز» كلۋبىنا قارسى ويىن جايلى ءوز پىكىرىن ءبىلدىردى.
جىلدىڭ سوڭعى ويىنى بولسا دا تەك جەڭىستى عانا ماقسات ەتكەن ستويلوۆ: «قازاقستان چەمپيوناتى اياقتالعاندىقتان ءبىز ءدال وسى كەزدەسۋگە تىڭعىلىقتى دايىندالدىق. بيىلعى ماۋسىمدا ءبىز وزدەرىڭىز بىلەتىندەي تەك التىندارمەن اياقتادىق. ال ەندى جىلدىڭ سوڭعى ويىنىن شۆەيتساريادا ءساتتى اياقتاۋدى جوسپارلاپ وتىرمىز. بۇل ماتچتىڭ بىزگە ەشقانداي پايدا اپەرمەيتىندىگىنە قاراماستان, ويىنشىلارىمنىڭ كاسىبيلىگىنە سەنىم ارتىپ وتىرمىن», – دەدى.
وسى رەتتە باپكەر شۆەيتساريالىق كوماندانىڭ نەگىزگى قۇرامىندا وينايتىن التى بىردەي فۋتبولشىنىڭ جاراقات الۋىنا قاتىستى دا ءوز ويىن بىلدىرگەن. بۇل تۋرالى: «يانگ بويزدىڭ» ماڭىزدى ويىنشىلارى جەتەرلىك. الاڭعا شىعا المايتىندارىن قوسالقى قۇرامداعىلارى الماستىرادى دەپ ويلايمىن», – دەدى ستويلوۆ.
وزدەرىڭىز بىلەتىندەي, تەك شۆەيتسار كومانداسىنىڭ عانا ەمەس, «استانانىڭ» دا جاراقات العان فۋتبولشىلارى بار. «كاپيتانىمىز تاڭات نوسەرباەۆ كەلە المادى. ول جاقىن كۇندەرى كوزىنە وتا جاساتۋى ءتيىس. سونىمەن قاتار, جاراقاتىنان تولىق ايىقپاعان اگيم يبراگيم دە تىزىمگە ەنبەدى», – دەدى جاتتىقتىرۋشى.
وسى ۋاقىتقا دەيىن «يانگ بويز» جاتتىقتىرۋشىسى ادي حيۋتتەر شابۋىلعا كوبىرەك كوڭىل بولەتىنىن ايتقان. بۇل كەزدەسۋگە ءسىز نەنى جوسپارلادىڭىز دەگەن سۇراققا: "بىز دە كەز كەلگەن كوماندا سياقتى جەڭىسكە جەتكىزىمىز كەلەدى. بۇل ماتچتا قانداي ناتيجە تىركەلسە دە پلەي-وفف كەزەڭىنە وتە المايتىنىمىز بەلەگىلى, ايتسە دە ۋەفا رەيتينگىندە ماڭىزدى ۇپايلارعا قول جەتكىزە الامىز. بۇل كەلەر جىلعى جەرەبەدە بىزگە سەپتىگىن تيگىزەرى انىق", – دەپ قورىتىندىلادى بولگاريالىق مامان.
ايتا كەتەيىك, ەۋروپا ليگاسىنىڭ B توبىنداعى سوڭعى ويىن جەلتوقساننىڭ 8-نەن 9-نا قاراعان ءتۇنى شۆەيتساريانىڭ بەرن قالاسىندا وتەدى. قوس كوماندا دا پلەي-وفف كەزەڭىنە جولداما الاتىن مۇمكىندىكتەرىنەن ايىرىلعان.