ع.جۇبانوۆا اتىنداعى فيلارمونيادا تاۋەلسىزدىكتىڭ 25 جىلدىعىنا وراي اقتوبە قالالىق مادەنيەت جانە تىلدەردى دامىتۋ ءبولىمى «وركەسترلەر شەرۋى» فەستيۆالىن وتكىزدى. فەستيۆالگە 7 وركەستر قاتىستى, ونىڭ ىشىندە قاراعاندى وبلىسى بالقاش قالاسىنان كەلگەن «ورفەي» فلەيتاشىلار انسامبلىنەن باسقاسى ءوز وڭىرىمىزدەن.
فەستيۆالدىڭ ماقساتى ۇرلەمەلى جانە ۇرمالى اسپاپتاردا ورىنداۋشىلاردىڭ كاسىبي شەبەرلىگىن ارتتىرۋ, ۇرلەمەلى اسپاپتار انسامبلدەرى مەن وركەسترلەرىنىڭ شىعارماشىلىعىن ناسيحاتتاۋ بولىپ تابىلادى.
انسامبلدەر اراسىندا قاراعاندى وبلىسى, بالقاش قالاسىنان كەلگەن «ورفەي» ءانسامبلى (كوركەمدىك جەتەكشىسى سۆەتلانا شوحاتاەۆا) ءى ورىنعا يە بولدى. ۇجىمدار اراسىندا ق.مەدەتوۆ اتىنداعى مۋزىكا مەكتەبىنىڭ ۇلگىلى ەسترادالىق-سيمفونيالىق بالالار وركەسترى (كوركەمدىك جەتەكشىسى ا.يابلۋنوۆسكي) ءى ورىندى جەڭىپ الدى. ەكى مارتە كەڭەستەر وداعىنىڭ باتىرى ت.بيگەلدينوۆ اتىنداعى اۋە قورعانىس كۇشتەرى اسكەري ينستيتۋتىنىڭ اسكەري وركەسترى, ا.جۇبانوۆ اتىنداعى مۋزىكا كوللەدجىنىڭ ۇرلەمەلى اسپاپتار وركەسترى (كوركەمدىك جەتەكشىسى بەكتۇرعان دۇيسەنباەۆ) فەستيۆال جەڭىمپازدارى اتاندى.
ارناۋلى وقۋ ورىندارى اراسىندا ا.جۇبانوۆ اتىنداعى اقتوبە مۋزىكالىق كوللەدجىنىڭ «Bestau band» ءانسامبلى (كوركەمدىك جەتەكشىسى قۋانىش دۇيسەنباەۆ), سول وقۋ ورداسىنىڭ تاعى ءبىر ءانسامبلى «Bress-Quartet» (كوركەمدىك جەتەكشىسى ماقسات قاراباسوۆ) ءىى ورىندى ەنشىلەدى. قاتىسقان وركەسترلەردىڭ ءبارى دە جۇلدەدەن قۇر قالعان جوق. فەستيۆالدىڭ سوڭى اقتوبەلىكتەر ءۇشىن ورنى بولەك ەسترادالىق ۇرلەمەلى اسپاپتار وركەسترىنىڭ 35 جىلدىق مەرەيتويىنا ۇلاستى.
ساتىبالدى ءساۋىرباي,
«ەگەمەنقازاقستان»