ش.ايمانوۆ اتىنداعى «قازاقفيلم» اق مەن «الماتىفيلم» جشس بىرلەسىپ دايىنداعان «جۇرەكتەرگە جاڭا عۇمىر سىيلاعان» دەرەكتى ءفيلمى جەلتوقساننىڭ 8-ءى مەن 12-ءى ارالىعىندا كاتماندۋ قالاسىندا (نەپال) وتەتىن 14-ءشى حالىقارالىق كينوفەستيۆالدىڭ بايقاۋدىڭ تىس باعدارلاماسىندا كورسەتىلەدى, دەپ حابارلايدى قازاقپارات.
ءفيلمنىڭ رەجيسسەرى – وڭداسىن تاستانوۆ. دەرەكتى فيلم حالىقارالىق دەڭگەيلى ۇزدىك كارديوحيرۋرگتاردىڭ ءبىرى – مەديتسينا عىلىمدارىنىڭ دوكتورى يۋري پيانىڭ قىزمەتى جانە ونىڭ العاشقى ناۋقاستارى تۋرالى سىر شەرتەدى.
«يۋري پيا – حيرۋرگ بولۋعا جاراتىلعان ادام. فيلمگە ونىڭ بىلىكتىلىگى تۋرالى ايتاتىن ارىپتەستەرى مەن ءومىرىن ساقتاپ قالعان ناۋقاس جاندار قاتىسقان. بۇل فيلم شەتەلدە كورسەتىلەتىنىنە قۋانىشتىمىن», – دەدى ءفيلمنىڭ رەجيسسەرى وڭداسىن تاستانوۆ.
گيمالاي اسسوتسياتسياسىنىڭ (Himal Association) ۇيىمداستىرۋىمەن كاتماندۋ قالاسىندا جىل سايىن وتەتىن حالىقارالىق كينوفەستيۆال 2000 جىلدان بەرى وتكىزىلىپ كەلەدى. بيىل فەستيۆال شەڭبەرىندە گەرمانيا, قىتاي, فرانتسيا, ءۇندىستان, تۇركيا, اقش, كورەيا سىندى مەملەكەتتەردىڭ 80-گە جۋىق فيلمدەرى كورسەتىلەدى.
ايتا كەتەيىك, «جۇرەكتەرگە جاڭا عۇمىر سىيلاعان» اتتى دەرەكتى فيلم حالىقارالىق دەڭگەيلى ۇزدىك كارديوحيرۋرگتاردىڭ ءبىرى - مەديتسينا عىلىمدارىنىڭ دوكتورى, دەنساۋلىق ساقتاۋ جانە الەۋمەتتىك دامۋ مينيسترلىگىنىڭ شتاتتان تىس باس كارديوحيرۋرگى يۋري پيانىڭ قىزمەتى جانە ونىڭ العاشقى ناۋقاستارى تۋرالى. يۋري پيا قازاقستاندا كارديوحيرۋرگيالىق جاردەم قىزمەتىن جولعا قويۋ جانە دامىتۋعا قوماقتى ۇلەس قوستى, سونىڭ ۇسىنۋىمەن ونداعان ناۋقاستاردىڭ ءومىرىن ساقتاپ قالعان جاڭا وزىق مەديتسينالىق تەحنولوگيالاردى ەنگىزىلدى.