سوكولوۆ-سارىباي كەن بايىتۋ وندىرىستىك بىرلەستىگىنىڭ جىلۋ – ەنەرگەتيكالىق ورتالىعىندا بولعان جارىلىستان ەكى ادام وقيعا ورنىندا اجال قۇشتى, ءۇش جۇمىسشىعا مەديتسينالىق كومەك كورسەتىلۋدە. اپات جىلۋ-ەنەرگەتيكالىق ورتالىقتىڭ №1 قازاندىق تسەحىنداعى رەدۋكتورلىق-سالقىنداتۋ قوندىرعىسىنىڭ تومەنگى بولىگىندەگى جارىلىستان بولعان.
ناتيجەسىندە اتقىلاعان بۋ كۇش الىپ كەتىپ, اكىمشىلىك جانە تۇرمىستىق عيماراتقا وتكەن. ونداعى جىلۋ-ەنەرگەتيكالىق ورتالىعى مەن قاراعاندىلىق تۋربو-مەحانيكالىق زاۋىتى جۇمىسشىلارى تۇرعان جەرگە دەيىن جايىلعان. ىستىق بۋدىڭ قۇرساۋىندا قالعان جۇمىسشىلار ءتۇرلى دەڭگەيدە جاراقات العان.
وقيعا ورنىنا «سسكوب» اق قاراستى فابريكانىڭ ءورت ءسوندىرۋ قىزمەتكەرلەرى, رۋدنىيداعى اسكەريلەندىرىلگەن تاۋ-كەن قۇتقارۋ كومانداسى شاقىرىلعان. ماماندار جەو مەن قتمز جۇمىسشىلارىن قاۋىپتى ايماقتان الىپ شىقتى. قازىر وقيعا ورنىندا اپاتتىڭ سالدارىن تەكسەرۋ جۇمىستارى جۇرگىزىلۋدە.
«سسكوب» اق, ەۋرازيالىق توپ باسشىلارى جەو-نىڭ قازا تاپقان كەڭسە سىپىرۋشىلارى ب.ك.بازارباەۆا مەن س.ۆ.ششەرباكوۆانىڭ وتباسى مەن جاقىندارىنا كوڭىل ايتتى. كومپانيا تاراپىنان مارقۇمداردىڭ وتباسى الدىنداعى بارلىق مىندەتتەمەلەر زاڭ بويىنشا ورىندالاتىن بولادى.
ءنازيرا جارىمبەتوۆا, «ەگەمەن قازاقستان».