ەلىمىزدەگى جالعىز مامانداندىرىلعان بەت-جاق جانە لور ورگاندارى پاتولوگياسىمەن اۋىراتىن ناۋقاستارعا تاۋلىك بويى جەدەل كومەك كورسەتەتىن الماتىداعى №5 قالالىق كلينيكالىق اۋرۋحانا – ەمدەۋمەن قاتار, جاناشىرلىق جانە قايىرىمدىلىق شارالارىمەن دە ءداستۇرلى تۇردە اينالىسىپ كەلەدى. مۇندا ەرەسەكتەرمەن قاتار, كاسىبي جوعارى ءبىلىمدى ۇلكەن جۇرەكتى بالالار دارىگەرلەرى جاڭا تۋعان نارەستەدەن باستاپ 14 جاسقا دەيىن ەم-دوم كورسەتەدى.
جۋىردا تاۋەلسىزدىگىمىزدىڭ 25 جىلدىعىنا وراي اتالمىش اۋرۋحانا ۇجىمى 25 قايىرىمدىلىق شارا اكتسياسىنا ءۇن قوسىپ, شاھارداعى №2 مامانداندىرىلعان سابيلەر ۇيىنە كەلىپ, كىشكەنە بالاقايلارعا جۇرەك جىلۋى مەن سۇيىسپەنشىلىكتەرىن ءبىلدىردى. ولار قىستا كيەتىن ادەمى كۇرتەشەلەر, ءتۇرلى ويىنشىقتار سىيلاپ, قامكوڭىل بالالاردى ءبىر قۋانتىپ تاستادى. ويىن بالاسى ەمەس پە, سىيلىقتارى قولىنا تيىسىمەن, جۇزدەرى بال-بۇل جايناپ, سەكىرىپ قۋانعاندارىن ايتپاڭىز. قايتارىمىنا ولەڭ, تاقپاقتارىن كەزەك كۇتپەي, ءبىر-ءبىرىن تىڭداماي ايتىپ جاتىر.
– بىزدەر, دارىگەرلەر كۇندەلىكتى بالا ءومىرىمەن كۇرەسە ءجۇرىپ, دەنى ساۋ بالا – اتا-انانىڭ قۋانىشى ەكەنىن, cونداي-اق, دەنى ساۋ بالا – مەملەكەتتىڭ بولاشاعى, ۇلتتىڭ ساۋلىعى ەكەنىن جاقسى تۇسىنەمىز, – دەدى اۋرۋحانا باس دارىگەرىنىڭ ورىنباسارى مايا بولشانوۆا. – سوندىقتان دارىگەر ءۇشىن ەڭ ۇلكەن العىس, راحمەت – ول كىشكەنە پاتسيەنتتەرىنىڭ جۇزىنەن كۇلكى كورۋ. بىراق بۇگىندە ولار تەك مەديتسينالىق كومەككە عانا ەمەس, مەيىرىمگە, سۇيىسپەنشىلىككە ءزارۋ. ال قوعامدا وتباسى, اتا-اناسى جوق بالالارعا از دا بولسا قامقورلىق جاساپ, قۋانىش سىيلاۋ ءبىزدىڭ مىندەتىمىز. سوندىقتان دا ءتول مەرەكە قارساڭىندا وسىنداي قايىرىمدىلىق شارا جاساۋدى ازاماتتىق بورىشىمىز سانادىق.
ءبىر ايتا كەتەرلىگى, №5 اۋرۋحانا وزدەرىنە كورشى ورنالاسقان اتالمىش بالالار ۇيىنە بەس جىلدان بەرى تۇراقتى كومەك قولىن سوزىپ كەلەدى. وعان قوسا, ەمدەۋ-دياگنوستيكالىق كومەكتەرىن دە كورسەتەدى. ءار مەرەكە سايىن ءتاتتىلەرىن, سىيلىقتارىن الىپ بارادى. الداعى, 28 جەلتوقسان كۇنى وتەتىن ەمدەۋ ورنىنىڭ جاڭا جىلدىق شىرشاسىنا بالالاردى دا شاقىرىپ وتىر. اۋرۋحانا ۇجىمى ولارعا سىيلىقتارىن دايىنداپ تا قويعان.
بۇگىندە 75 ورىنعا ارنالعان سابيلەر ۇيىندە 5 جاسقا دەيىنگى 50 بالا تاربيەلەنىپ, ونىڭ ەلۋ پايىزى تۋا سالىسىمەن مۇگەدەك, قالعاندارىنىڭ اتا-اناسى اباقتىدا وتىرعاندار, اتا-انا قۇقىعىنان ايىرىلعاندار ەكەنىن جەتكىزگەن سابيلەر ءۇيىنىڭ باس دارىگەرى ءلاتيپا قوجامقۇلوۆا, مۇنداعى بالالارعا مەملەكەت تاراپىنان ۇلكەن كومەك كورسەتىلىپ جاتقانىن تىلگە تيەك ەتە كەتتى. «بۇگىن ءبىزدىڭ سابيلەر ۇيىندە توي. تاۋەلسىزدىگىمىزدىڭ 25 جىلدىق مەرەكەسىنە وراي №5 اۋرۋحانا ۇجىمى ۇلكەن سىيلىق جاساپ وتىر. بالالار سوعان قاتتى قۋانۋدا. «قايىرىمدى قول تامۇقتا كۇيمەيدى» دەگەن, بۇگىنگى مۇمكىندىكتى پايدالانىپ, ءوزىمىز ءسۇيىپ وقيتىن «ەگەمەن قازاقستان» گازەتى ارقىلى اۋرۋحانا ۇجىمىنا ريزاشىلىعىمىزدى ءبىلدىرگىمىز كەلەدى. ويتكەنى, ولار بەس جىلدان بەرى تۇراقتى قايىرىمدىلىق شارالارىن كورسەتۋمەن بىرگە, ءبىزدىڭ بالالاردىڭ دەنساۋلىعىنا بايلانىستى كەلىپ تە, بولماسا اۋرۋحاناعا جاتقىزىپ تا تەگىن ەمدەپ بەرەدى, – دەيدى باس دارىگەر.
گۇلزەينەپ سادىرقىزى,
«ەگەمەن قازاقستان»