ەل تاۋەلسىزدىگىنىڭ 25 جىلدىعىنا ارنالعان «تاۋەلسىزدىك تولعاۋى» جاڭا پەسالار بايقاۋى ءوز مارەسىنە جەتتى.
«تاريحتا ءىزى قالعان دارا تۇلعالارمەن كەزدەسۋدىڭ كيەلى ورنى – تەاتر ساحناسى» دەپ ۇلتىمىزدىڭ ايتۋلى كلاسسيگى ع.مۇسىرەپوۆ ايتقانداي, قازاقتىڭ ءتىلى مەن تاريحىن, مادەنيەتى مەن ونەرىنىڭ مايەگىنە اينالعان تەاتر ساحناسىن كوركەيتەتىن جانر قاشاندا دراماتۋرگيا ەكەنى داۋسىز. سوعان وراي ۋاقىت تالابى مەن جاڭارعان قوعامداعى كورەرمەننىڭ تالابىنا ساي دۇنيەلەردى ساحنالاۋعا, سونداي-اق, كاسىبي ماماندار سارابىنان ءوتكەن پەسالارعا جىلدان جىلعا سۇرانىستىڭ ارتا ءتۇسۋى زاڭدى قۇبىلىس. دراماتۋرگيانىڭ باعىتىن ايقىنداپ, باعدارىنان جاڭىلدىرمايتىن مامانداردىڭ ءادىل سىنىنان سۇزىلگەن شىعارمالاردىڭ تەاتر ساحناسىنا جول تارتۋى كەيىنگى جاس بۋىن قالامگەرلەردى تانىتۋ مەن ۇلتتىق دراماتۋرگيانى دامىتۋدىڭ مۇمكىندىگى سانالۋدا.
تاۋەلسىزدىك تۋىنىڭ ەگەمەن ەل كوگىندە جەلبىرەگەنىنە 25 جىل تولۋىنا وراي وتكىزىلگەن بايقاۋدىڭ ماقساتى – تەاتر رەپەرتۋارلارىن تاۋەلسىز قازاقستاننىڭ بۇگىنگى كەلبەتىن بەينەلەيتىن شىعارمالارمەن تولىقتىرۋ, ۇلتتىق تەاتر ونەرىنە, وڭىردەن شىققان تالانتتى دراماتۋرگتەرگە قولداۋ كورسەتۋ, ولاردىڭ كوركەم شىعارمالارىن ناسيحاتتاۋ, جاس دراماتۋرگتەردى انىقتاۋ بولاتىن.
ساراپشىلار نازارىنا ەلىمىزدىڭ ءتۇكپىر-ءتۇكپىرىنەن 28 پەسا كەلىپ ءتۇستى. بايقاۋدىڭ ەرەجەسىنە سايكەس, قاتىسۋشىلارعا بۇرىن-سوڭدى تەاتر ساحناسىندا قويىلماعان, ءتاۋەلسىزدىك جىلدارىندا جازىلىپ, وسى جىلدارداعى وقيعالاردى قامتيتىن, كوركەمدىك دەڭگەيى جوعارى شىعارمالار قابىلداناتىنى اتاپ كورسەتىلگەن بولاتىن. رەسپۋبليكامىزدىڭ ادەبي الەمىندە قارىمدى قالامىمەن تانىلعان بەلگىلى دراماتۋرگتەر مەن جازۋشىلار قازىلىق ەتكەن بايقاۋ ءوز مەجەسىنە جەتىپ, جەڭىمپازدار انىقتالدى.
كەز كەلگەن بايقاۋدا باس بايگەنى يەلەنگەن شىعارما ۇلكەن وقيعا تۋدىرۋى كەرەك. سول سەبەپتى, باس جۇلدەنىڭ ورنىنا 1-ورىندى 2 شىعارماعا بەرۋگە شەشىم قابىلداعان قازىلار القاسىنىڭ ورتاق ۇيعارىمى بويىنشا ءبىرىنشى جۇلدە – مارحابات بايعۇتتىڭ «اسقاروۆتىڭ اققايىڭدارى» مەن سايا قاسىمبەكتىڭ «داۋىل» پەسالارىنا, ەكىنشى ورىن – بايعالي ەسەناليەۆتىڭ «انا ءجۇرەگى», ءۇشىنشى ورىن توكەن الجانتەگىنىڭ «جالعىزدىق جاڭعىرىعى» جانە مۇرات قولعاناتتىڭ «پوني» شىعارمالارىنا بەرىلدى. ال ارنايى نوميناتسيالار, «شىعارماداعى رۋحاني كەڭىستىك», «تاقىرىپ تۇتاستىعى», «ۇلتتىق قۇندىلىقتى دارىپتەگەنى ءۇشىن», «ءبۇگىنگى كۇننىڭ جارقىن بەلگىسى» اتالىمدارى بويىنشا حۇسەيىن ءامىر-تەمىردىڭ «ەشكىمگە كەرەگى جوق اۋىل», ۇلجان شايحيەۆانىڭ «جەلتوقسان ايى مازاسىز», اقىلبەك شاياحمەتتىڭ «العىس پەن قارعىس نەمەسە جارىق پەن كولەڭكە» جانە اسىلبەك يحسانوۆتىڭ «حاق جولى» تۋىندىلارى ماراپاتتالدى.
قاراشاش توقسانباي,
«ەگەمەن قازاقستان»