جاقسىلىققا ءۇمىت ارتىپ, كۇتە ءبىلۋ دە ءبىر عانيبەت. مىنە, «تاۋەلسىز قازاقستان» پويىزى جەتىسۋ جەرىنە دە جەتتى. التىنكول بەكەتىنە ايالداعان پويىزدى پانفيلوۆ اۋدانىنىڭ اكىمى بەرداۋلەت ابدۋللاەۆ پەن ەڭبەك ەرى كۇلاش احمەتوۆا باستاعان ءوڭىر تۇرعىندارى قارسى الدى. قازاقى سالت-داستۇرمەن ىرىم دا جاسالدى.
ەل شەكاراسىنداعى اۋداننىڭ الەۋمەتتىك-ەكونوميكالىق جاعدايى مەن وسى وڭىردەگى قۇرعاق پورتى تۋرالى اۋدان باسشىسى قوناقتارعا قىسقاشا ماعلۇمات بەرگەن سوڭ, ەل اناسى ك.احمەتوۆا تۇرعىنداردىڭ ىنتىماعى, تاتۋلىقتى تۋ ەتكەن دوستىعى تۋرالى ماقتانا ايتتى.
ەلباسى تاپسىرماسىمەن ەل ارالاپ جۇرگەن پويىزداعى دەنساۋلىق ساقتاۋ, ءبىلىم بەرۋ, ازاماتتار قۇقىعىن قورعاۋ سەكىلدى سالالار بويىنشا ماماندار ۋاقىتتى وزدىرماي بىردەن ەلمەن ەتەنە ارالاسىپ كەتتى. بىرنەشە ساعاتتا 325 ادام تالاپقا ساي تىركەلىپ, ءوز ماسەلەلەرىن ورتاعا سالىپ تا ۇلگەردى. كاسىبي ماماندار مۇمكىندىكتەرى بويىنشا مەديتسينالىق كومەكتەرىن كورسەتۋمەن شەكتەلمەي, ناۋقاستارعا ءتيىستى ورىندارعا ارنايى بارىپ تەكسەرىلۋ جولدارىن دا ايتىپ, قۇندى كەڭەستەرىن بەردى.
سونىمەن, «تاۋەلسىز قازاقستان» پويىزى 7 جەلتوقساندا تالدىقورعان قالاسىنا كەلىپ توقتادى. تەمىر جول ۆوكزالىنا 200-گە جۋىق ادام جينالدى. ءدۇيىم جۇرتتىڭ الدىنا الماتى وبلىسى اكىمىنىڭ ورىنباسارى جاقسىلىق ومار شىعىپ, بۇل كۇندى تالدىقورعاندىقتاردىڭ كوپتەن كۇتىپ جۇرگەندىگىن, سوندىقتان مەديتسينا, الەۋمەتتىك ماسەلەلەر جانە زاڭ كەڭەسىن بەرۋ, تاعى دا باسقا سالالار بويىنشا وزىندىك كومەك الۋ نيەتتەرى بار ەكەنىن جەتكىزدى. كەلەسى كەزەكتە «تاۋەلسىز قازاقستان» پويىزىنىڭ جەتەكشىسى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى «حالىقارالىق قاتىناستار» كافەدراسىنىڭ پروفەسسورى ءامىرجان الپەيىسوۆ قازاقستان حالقى اسسامبلەياسىنىڭ تىكەلەي ۇيىمداستىرۋىمەن ءوتىپ جاتقان رەسپۋبليكالىق اكتسيانىڭ نەگىزگى ماقساتىنا توقتالدى. جالپى, 7 مينيسترلىك پەن 3 ۇلتتىق كومپانيادان بارلىعى 272 ادامنان تۇراتىن دەلەگاتسيا قۇرامىندا 71 مەديتسينا قىزمەتكەرى بار ەكەن.
ماماندار تالدىقورعان قالاسىندا ءۇش توپقا ءبولىنىپ, حالىققا قىزمەت كورسەتۋگە كىرىستى. ءتۇرلى ناۋقاستارى بويىنشا زەرتحانالار قورىتىندىلارىن الىپ, تالدىقورعان قالالىق ەمحاناسىنداعى دارىگەرلەرگە اعىلدى.ەمحانا ماڭىندا سىقاسقان كولىكتىڭ كوپتىگى ءوز الدىنا, ەمحانانىڭ قوس قاباتىنداعى كابينەتتەرگە بولىنگەن دارىگەرلەردىڭ الدى ءبىر ءسات تە بوسامادى. «تاۋەلسىز قازاقستان» پويىزىمەن كەلگەن كاسىبي ماماندار دۇرىس جول سىلتەپ, قۇندى كەڭەستەرىن ايتۋدان جالىققان جوق.
ءبىلىم بەرۋ سالاسى بويىنشا تالدىقورعان پوليتەحنيكالىق كوللەدجىنىڭ ءماجىلىس زالىندا سەمينار-كەڭەس ءوتتى. ال 103 ەتنوس وكىلىنىڭ باسىن قوسقان سالتاناتتى جيىندى قازاقستان حالقى اسسامبلەياسى الماتى وبلىستىق حاتشىلىعىنىڭ مەڭگەرۋشىسى عابيت تۇرسىنباي اشىپ, بايانداما جاسادى. قاشاندا وزىندىك جاراسىمىن تابا بىلەتىن اسسامبلەيا جيىنىنا ءار حالىق وكىلى ۇلتتىق كيىمدەرىن مالىنتا كيىپ كەلىپتى.
دەلەگاتسيا جەتەكشىسى ءامىرجان الپەيىسوۆ باستى قۇندىلىعىمىز – رۋحاني بايلىعىمىز ەكەندىگىن باسا ايتىپ, ەلباسىنىڭ كىندىك قانى تامعان وڭىردەگى 7 بەكەتتى تولىق ارالاپ شىعۋ ءۇشىن سەگىز كۇن جۇمسالاتىنىنا ەرەكشە ەكپىن بەردى. نەگىزگى ماقسات – تاۋەلسىزدىك جىلدارىندا قول جەتكىزگەن جەتىستىكتەردى حالىققا ايتىپ, ەلدىڭ بىرلىگىن نىعايتۋ, تۇرعىنداردىڭ الەۋمەتتىك جاعدايىن كورىپ, جاقسارتۋ, سونىمەن قاتار حالىقتىڭ قۇقىعىنىڭ تولىق قورعالۋىنا, نۇقسان كەلمەۋىنە ىقپال ەتۋ ەكەندىگى دە ورتاعا سالىندى.
ءبىر شاڭىراقتىڭ استىندا باستارى قوسىلعان سايىن تەك جاقسى حابارلارىمەن بولىسەتىن ءار ۇلت وكىلدەرى دوستىققا بەرىكتىگىن بۇل كۇنى دە كورسەتە ءبىلدى. ءسويتىپ, دوستىق ۇيىندە وبلىستىق قحا-نىڭ عىلىمي-ساراپشىلىق كەڭەسى جانە ەتنومادەني بىرلەستىكتەر وكىلدەرى مەن اقپاراتتىق-ناسيحات توبىنىڭ قاتىسۋىمەن ەل تاۋەلسىزدىگىنىڭ 25 جىلدىعىنا ارنالعان «ءتاۋەلسىزدىك – تۇعىرىم» اتتى فورۋم ءوتتى.
«تاۋەلسىز قازاقستان» پويىزى بەلگىلەنگەن كەستەگە ساي تۇندەلەتىپ ۇشتوبەگە بەت الدى.
نۇربول الدىباەۆ,
«ەگەمەن قازاقستان»
الماتى وبلىسى