ەلوردا تورىندەگى تاۋەلسىزدىك سارايىندا «تاۋەلسىزدىك تاعىلىمى-25» اتتى فوتوكورمەنىڭ اشىلۋ سالتاناتى ءوتتى. شاراعا ەلىمىزدىڭ ۇزدىك فوتوجۋرناليستەرى ۇسىنعان, سونداي-اق «مەنىڭ ەلىم – قازاقستان» فوتوبايقاۋىنا قاتىسقان 100-گە تارتا جۇمىس قويىلدى.
كورمە ەكى بولىمنەن تۇرادى. العاشقىسى 9-20 قاراشا ارالىعىندا «تاۋەلسىزدىكتىڭ بەسىگى» دەگەن اتاۋمەن الماتى قالاسىندا وتسە, كەلەسىسى 6 جەلتوقساننان جىل سوڭىنا دەيىن استانادا جالعاسادى.
«ەلىمىز ەگەمەندىگىن العالى 25 جىل ىشىندە بىرقاتار ماڭىزدى ءارى ايتۋلى وقيعالار جۇزەگە استى. ولاردىڭ ەلىمىزدىڭ بولاشاعى مەن دامۋىنا ەلەۋلى ۇلەس بولىپ قوسىلارى انىق. بۇگىنگە دەيىنگى ۋاقىت ارالىعىندا جاس مەملەكەتىمىزدىڭ بولاشاققا جاساعان ءاربىر قادامى فوتوجۋرناليستەردىڭ نازارىنان تىس قالعان جوق جانە سولار ارقىلى جۇرتشىلىققا جاريالانىپ, تاريح بەتتەرىنەن ورىن الىپ, وسكەلەڭ ۇرپاق ءۇشىن ساقتالىپ كەلەدى», دەدى «فوتوونەر» قوعامدىق بىرلەستىگىنىڭ باسشىسى اسىلحان ءابدىرايىم.
«فوتوونەر» قوعامدىق ءبىرلەستىگى بۇل ءىس-شارانى استانا قالاسى اكىمدىگىنىڭ قولداۋىمەن ءوتكىزىپ وتىر. ۇيىمداستىرۋشىلار كەلەر ۇرپاققا جاڭا تاريحتىڭ شەجىرەسىندەي قۇندى دەرەكتەردى قىزىقتى ەتىپ جەتكىزۋدى ماقسات ەتتى.
فوتوكورمە اياسىندا «ايقىن» رەسپۋبليكالىق قوعامدىق-ساياسي گازەتىنىڭ ءفوتوتىلشىسى سوۆەتبەك ماعزۇموۆ قازاقسان فوتوجۋرناليستيكاسىنا سىڭىرگەن ەڭبەگى ءۇشىن «فوتوونەر قايراتكەرى» مەدالىمەن ماراپاتتالدى.
سونداي-اق, شارا شەڭبەرىندە ۇكىمەت باسشىسىنىڭ فوتوگرافى شۇكىر شاحايعا, «قازاقپارات» حالىقارالىق اگەنتتىگىنىڭ فوتوگرافى مۇحتار حولدوربەكوۆكە, قازاق تىلىندە جارىق كورەتىن National Geographic جۋرنالىنىڭ شەف-فوتوگرافى ەربولات شادىراقوۆقا, قورعانىس مينيسترلىگىنىڭ فوتوگرافى ەرمەك سارباسقا جانە «ەگەمەن قازاقستان» گازەتىنىڭ فوتوگرافى ەرلان وماروۆقا دا قۇرمەت كورسەتىلدى. ولارعا تاۋەلسىز قازاقستاننىڭ فوتشەجىرەسىن جاساپ جۇرگەن جاندار رەتىندە باعالى سىيلىقتار تاپسىرىلدى.
ايان ءابدۋالي,
«ەگەمەن قازاقستان»
سۋرەتتەردى تۇسىرگەن
ورىنباي بالمۇرات,
«ەگەمەن قازاقستان»