ۇكىمەتتە حالىققا ەلەكتروندى قىزمەت كورسەتۋ ماسەلەلەرى قارالدى

اقپارات جانە كوممۋنيكاتسيالار ءمينيسترى داۋرەن اباەۆ «ازاماتتارعا ارنالعان ۇكىمەتتىڭ» ەلىمىز بويىنشا 350-گە جۋىق كەڭسەسى بارىن باياندادى. جىل سايىن 200 مىڭنان استام قىزمەتكەر ء«بىر تەرەزە» قاعيداتى بويىنشا 40 ملن-نان استام قىزمەت كورسەتەدى.  مەملەكەتتىك كورپوراتسيا كليەنتتەرگە باعدارلانۋدى ارتتىرۋعا باعىتتالعان جاڭا تاسىلدەر مەن قۇرالداردى ءجيى ەنگىزەدى. مىسالى, جىل باسىنان بەرى قۇجاتتىڭ ءازىر بولعانى تۋرالى حاباردار ەتەتىن sms-حابارلاما, telegram-بوت, دايىن قۇجاتتاردى ۇيگە دەيىن جەتكىزۋ, ەلەكتروندى ۇكىمەت پورتالىنان ەتسق قولدانباي انىقتاما الۋ, استانا جانە الماتى قالالارىنداعى حقكو-تارىن تەگىن wi-fi-مەن قامتۋ ءتارىزدى سەرۆيستەر ىسكە قوسىلدى.  الىس ەلدى مەكەندەردىڭ تۇرعىندارىنا قىزمەت كورسەتۋ ءۇشىن 70 ءموبيلدى حقكو جۇمىس ىستەيدى, ولار جىلىنا 13 مىڭنان استام رەت شالعايعا شىعادى. جەلىسى قازاقستانداعى ەلدى مەكەندەردىڭ باسىم بولىگىندە جۇمىس ىستەيتىن «قازپوشتامەن» بىرلەسىپ, ۇلتتىق پوشتا وپەراتورىنىڭ كەڭسەلەرىندە مەملەكەتتىك قىزمەتتى ۇسىنۋ بويىنشا جوبا جۇزەگە اسىرىلىپ جاتىر.  مەملەكەت باسشىسىنىڭ تاپسىرماسى بويىنشا «ازاماتتارعا ارنالعان ۇكىمەت» مۇمكىندىگى شەكتەلۋى ادامداردى كەدەرگىسىز ورتامەن قامتۋعا ەرەكشە كوڭىل بولەدى. بيىل ەستۋ جانە سويلەۋ قابىلەتى بۇزىلعان جاندارعا ارنالعان ونلاين-سۋردواۋدارما سەرۆيسى ىسكە قوسىلدى. كورپوراتسيانىڭ كەڭسەلەرىندە ارباعا تاڭىلعان مۇگەدەكتەر ءۇشىن پاندۋستار مەن شاقىرۋ تۇيمەلەرى, برايل ماتىنىمەن جازىلعان اقپاراتتىق تاقتالار, ناشار كورەتىندەرگە ارنالعان تاكتيلدى جولدار بار. سونىمەن قاتار ءى جانە ءىى توپتارداعى مۇگەدەكتەر ۇيدە وتىرىپ تا «ازاماتتارعا ارنالعان ۇكىمەت» قىزمەتتەرىن الا الادى.  بۇدان بىلاي «ازاماتتارعا ارنالعان ۇكىمەت» ەتسق قولدانباي ەلەكتروندى قىزمەت ۇسىنۋ, پرواكتيۆتى قىزمەت ۇسىنۋ, ءبىر ءوتىنىم قاعيداتىن ەنگىزۋ جانە ەكساۋماقتىققا كوشۋ ءتارىزدى باعىتتار بويىنشا جۇمىستاردى كۇشەيتۋدى جوسپارلاپ وتىر.