الماتىدا اتالمىش جوباعا قاتىستى جيىن ءوتتى. ايەل كاسىپكەرلەردىڭ كەزەكتى توعىسۋىندا وسى باعدارلامانىڭ ناقتى ناتيجەلەرى ءسوز بولدى. جانە اتالعان بانك قازاقستاندىق كاسىپكەر ايەلدەردى قولداۋىن جالعاستىراتىنىن مالىمدەپ وتىر.
ءوز كەزەگىندە بۇگىنگە دەيىن قازاقستان ۇكىمەتى «بيزنەستەگى ارۋلار» باعدارلاماسىنا 8,2 ميلليون اقش دوللارى كولەمىندە قارجى بولگەن. قالاي دەسەك تە, ورتالىق ازياداعى العاشقى باعدارلاما كاسىپكەر ارۋلارعا قارجىلىق قۇرالدار مەن بيزنەستەگى نوۋ-حاۋدى قولجەتىمدى ەتۋدى كوزدەيدى. دەگەنمەن, بۇل باستامانىڭ ايەل كاسىپكەرلەرگە بەرگەن ناقتى كومەگى قانداي؟ وسى ساۋالداردىڭ توڭىرەگىندەگى كونفەرەنتسياعا ۇلتتىق ەكونوميكا مينيسترلىگى, «دامۋ» كاسىپكەرلىكتى دامىتۋ قورى» اق, ارىپتەس قارجىلىق ينستيتۋتتار جانە تۇركيا, كانادادان ساراپشىلار قاتىستى.
باعدارلاما ارىپتەس قارجىلىق ينستيتۋتتارعا نەسيە جانە نەسيەلىك تاۋەكەلدەردى باسقارۋدى جانە شاعىن جانە ورتا بيزنەسپەن اينالىسقاندا كەپىلدەندىرۋ ادىستەرىن جاقسارتۋ, تيىمدىلىكتى باعالاۋ جانە ەسەپتەۋ ادىستەرىن جاقسارتۋ, نەسيە مەنەدجەرلەرىن شوب-پەن جۇمىس ىستەۋدى ۇيرەتۋ سەكىلدى تەحنيكالىق قولداۋ كورسەتەدى. قارجىمەن قوسا ەقدب تىكەلەي شاعىن جانە ورتا بيزنەسكە باسەكەلەستىكتى ارتتىرۋعا باعىتتالعان زاماناۋي باسقارۋ تاجىريبەسىن جانە تەحنولوگياسىن ەنگىزۋگە نوۋ-حاۋ الۋعا مۇمكىندىك بەرەدى.
باعدارلاما ىسكە قوسىلعالى بەرى ەقدب 88 كەڭەس بەرۋ جوباسىن جۇزەگە اسىرعان. جانە ەقدب-دان 4 ارىپتەس-قارجىلىق ينستيتۋت كاسىپكەر ارۋلاردى قارجىلاندىرۋعا 45 ميلليون اقش دوللارى كولەمىندە نەسيەگە قول جەتكىزگەن. ياعني, بانكتسەنتركرەديت 20 ميلليون اقش دوللارىن, شينحان بانك كازاحستان 5 ميلليون اقش دوللارىن, مفو KMF 10 ميلليون اقش دوللارىن, فورتەبانك قازاقستان 10 ميلليون اقش دوللارىن العان. وعان قوسا, ارىپتەس-قارجى ينستيتۋتتارىنىڭ نەسيە مەنەدجەرلەرى مەن مەنەدجمەنتى باعدارلاما تالاپتارى, قارجىلىق ەمەس قىزمەتتەر مەن «بيزنەس ايناسى» اتتى بيزنەستىڭ ونلاين دياگنوستيكا قۇرالى تۋرالى ارنايى سەمينارلارعا قاتىسقان. جانە ەقدب كاسىپكەر ارۋلارعا ء«ىس-ارەكەتتەگى باسشىلىق», «ماركەتينگتەگى ساندىق تەحنولوگيالار», «قارجى مەنەدجمەنتىنىڭ كىلتى», «كاسىپكەردەن كاسىپورىنعا دەيىن» اتتى سەمينارلار ۇيىمداستىرعان. بيىل اقپان ايىندا «قازاقستاننىڭ كاسىپكەر ارۋلارىنا ارنالعان تالىمگەرلىك» باعدارلاماسى ىسكە قوسىلعان. تالىمگەر رەتىندە قازاقستاندا بيزنەس جۇرگىزۋدە ايتارلىقتاي تاجىريبەسى بار 28 جەتەكشى كاسىپكەر تاڭدالىنىپ الىنعان. ساۋالداماعا قاتىسۋشىلاردىڭ 86 پايىزى باعدارلاما ابدەن كوڭىلىنەن شىققانىن ءبىلدىرىپ, 76 پايىزى تالىمگەرلەرىنىڭ جوعارى بىلىكتىلىگىن اتاپ وتكەن.
ەۋروپا قايتا قۇرۋ جانە دامۋ بانكىنىڭ قازاقستانداعى ديرەكتورى اگريس پرەيمانيستىڭ پىكىرىنە قاراعاندا, قارجى ينستيتۋتتارىنىڭ «بيزنەستەگى ارۋلار» باعدارلاماسىن اتقارۋعا قازاقستان ۇكىمەتىنىڭ قولداۋى يگى ىقپال ەتۋدە.
ايناش ەسالي, «ەگەمەن قازاقستان»
الماتى