قازىرگى تاڭدا جاستاردىڭ البىرتتىقپەن, وتكىنشى سەزىمنىڭ جەتەگىندە ءجۇرىپ, وت باسىپ قالاتىن جاعدايلار از ەمەس. قوعامدا تاستاندى بالالار, اكەسىز وسكەن جەتىمدەر, كوز جاسىن جۋعان انالار تاعدىرى ءبىزدى بەي-جاي قالدىرا المايدى. قويىلىمنىڭ التىن ارقاۋى دا وسى. اۆتور ىشكى مونولوگ ارقىلى جاستارعا وي سالادى.
«ورالحان اعامىزدىڭ بارلىق شىعارماسى جاقسى جازىلعان. وكىنىشكە قاراي, ومىردە جاستار ماحابباتتىڭ بۋىمەن دۇرىس قادام باسپاي, ءسۇرىنىپ جاتاتىنى, ءتۇرلى كەدەرگىلەرگە شىداماي, شىرت سىنىپ جاتاتىن كەزدەرى ءجيى بولىپ جاتادى. قازىرگى جەتكىنشەكتەر بۇرىنعى جاستاردان وزگەرەك. وزدەرىڭىز كورىپ وتىرعانداي, ول كەزدە مەكتەپتە قىز بەن جىگىتتىڭ كەزدەسىپ ءجۇرۋى قوعامدا ۇلكەن رەزونانس تۋدىرىپ, قىلمىس جاساعانمەن تەڭ ەدى. ۇلتتىق تاربيەنى جاڭعىرتۋدا, وتكەن عاسىردىڭ ەنشىسىندە قالعان قازاقي تاربيەنى قولعا الساق, قازىرگى جاستار سودان ۇلگى السا ەكەن دەيمىز.
قازىر مونوسپەكتاكل ەلىمىزدە كەنجە دامىپ كەلە جاتقان, كوپ قويىلا بەرمەيتىن جانردىڭ ءبىر ءتۇرى. سوندىقتان مونولوگقا قۇرىلعان جاڭاشا ستيلدە اراسىنا قازىرگى زاماننىڭ اۋەندەرىن قوسىپ, اتاپ ايتساق, كوكسەرەك حامزا, امانگەلدى سەيتاق, قانات يمانبەكوۆ, سىندى بىرنەشە اقىنداردىڭ سوزىنە ءان جازىپ, كورەرمەنگە ۇسىنىپ وتىرمىز», دەيدى رەجيسسەر, ءارى اكتەر داۋرەن سەرعازين.
باستى كەيىپكەر جەڭىسحاندى – داۋرەن سەرعازين, باقىتتى − ىڭكار ناسيەۆا ويناسا, ايسۇلتان جاليەۆ, اقجان ورىنباساروۆا, مەيىرعات امانگەلدين سىندى اكتەرلار ءان سالىپ, مۋزىكالىق اسپاپپەن سۇيەمەلدەپ تاعى ءبىر جاڭا قىرىنان كورىندى. ساحنا دەكوراتسياسى دا زامان تالابىنا ساي ادەمى ۇيلەسىم تاپقان. قالانىڭ قاربالاس تىرشىلىگىنەن شارشاعاندا ءوزىڭ تۋىپ-وسكەن اۋىلدى, الىستاعى اناڭدى, وتكەن بوزبالا شاعىڭدى ساعىناسىڭ. اۋىل اتتى التىن بەسىكتىڭ ساناڭدا قالعان ساۋلەلى ساتتەرىنە ءبىر ءسات ورالعانداي كۇي كەشەسىڭ.
ايمان مۇقىشەۆا