زەينەتاقى مەن جاردەماقىنى ارتتىرۋ بويىنشا زاڭ جوباسى ماقۇلداندى

«زاڭ جوباسىندا زەينەتاقى زاڭناماسىنا بىرقاتار وزگەرىستەر ەنگىزۋ كوزدەلگەن. بىرىنشىدەن, ەلباسىنىڭ بيىلعى جولداۋىندا بەرگەن تاپسىرماسىنا سايكەس, 2017-2018 جىلدارى بيۋدجەتتەن تولەنەتىن زەينەتاقىلار مولشەرى ءۇش كەزەڭدە ارتتىرىلاتىن بولادى. ءبىرىنشى كەزەڭدە, ياعني 2017 جىلعى 1 قاڭتاردان باستاپ ىنتىماقتى زەينەتاقىلار مولشەرى – 9 پايىزعا, بازالىق زەينەتاقى 7 پايىزعا ارتتى. ال, ەكىنشى كەزەڭدە, 2017 جىلعى 1 شىلدەدەن باستاپ ىنتىماقتى زەينەتاقى مولشەرى – 11 پايىزعا, بازالىق زەينەتاقى مولشەرى 13 پايىزعا كوبەيتىلگەلى وتىر. ناتيجەسىندە, 2017 جىلعى 1 شىلدەدەن باستاپ زەينەتاقى مولشەرلەرى 2016 جىلعى زەينەتاقى مولشەرىمەن سالىستىرعاندا 20 پايىزعا ارتادى. ياعني, ەڭ تومەنگى زەينەتاقى 45 711 تەڭگەگە دەيىن, ورتاشا زەينەتاقى 66 676 تەڭگەگە دەيىن ارتاتىن بولادى», – دەدى ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە الەۋمەتتىك قامسىزداندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا بايانداما جاساۋ بارىسىندا.  سونداي-اق, 2017 جىلعى 1 شىلدەدەن باستاپ زەينەتاقى تاعايىنداۋ ءۇشىن ەسەپكە الىناتىن تابىستىڭ ەڭ جوعارعى مولشەرىن 41 ايلىق ەسەپتىك كورسەتكىشىنەن 46 ايلىق ەسەپتىك كورسەتكىشىنە دەيىن (93 029 تەڭگەدەن 104 374 تەڭگەگە دەيىن) ارتتىرۋ كوزدەلگەن. بۇل 2017 جىلدىڭ ءبىرىنشى جارتىسىندا تاعايىندالعان زەينەتاقىلاردىڭ 11 پايىزعا ارتۋ ەسەبىمەن وسى جىلدىڭ ەكىنشى جارتىسىندا تاعايىندالعان زەينەتاقىلار مولشەرلەرىنىڭ تەپە-تەڭدىگىن قامتاماسىز ەتۋ ءۇشىن قارالىپ وتىر.  «زەينەتاقىنى ارتتىرۋدىڭ ءۇشىنشى كەزەڭى 2018 جىلعى 1 شىلدەدەن باستاپ جۇرگىزىلەدى. ول بازالىق زەينەتاقىنى تاعايىنداۋ ادىستەمەسىنىڭ وزگەرۋىمەن بايلانىستى. بۇگىنگى تاڭدا بازالىق زەينەتاقى زەينەتكەرلىك جاسقا جەتكەن ادامدارعا بىردەي مولشەردە تاعايىندالادى. جاڭا ادىستەمەگە سايكەس, ول زەينەتاقى جۇيەسىنە قاتىسۋ وتىلىنە بايلانىستى بولادى, بۇل رەتتە 1998 جىلعا دەيىنگى ەڭبەك ءوتىلى جانە 1998 جىلدان كەيىنگى جيناقتاۋشى زەينەتاقى جۇيەسىنە اۋدارىلعان زەينەتاقى جيناقتارىنىڭ مەرزىمى ەسكەرىلەدى», – دەپ اتاپ ءوتتى ت. دۇيسەنوۆا.  ونىڭ ايتۋىنشا, ۇستىمىزدەگى جىلى زەينەتاقى مولشەرىنىڭ 20 پايىزعا دەيىن ارتۋىن ەسكەرە وتىرىپ, زاڭ جوباسىندا بازالىق زەينەتاقىنىڭ ەڭ تومەنگى مولشەرىن كۇنكورىس دەڭگەيىنەن 50-دەن 54 پايىزعا دەيىن ۇلعايتۋ ۇسىنىلىپ وتىر. وسىلايشا, 2018 جىلعى 1 شىلدەدەن باستاپ بازالىق زەينەتاقى مولشەرى ازاماتتاردىڭ ەڭبەك ءوتىلى جانە جيناقتاۋشى زەينەتاقى جۇيەسىنە اۋدارىمدار كەزەڭى 10 جىلدان اسپاسا – ەڭ تومەن كۇنكورىس دەڭگەيىنىڭ 54 پايىزىن, 20 جىل بولسا – ەڭ تومەن كۇنكورىس دەڭگەيىنىڭ 74 پايىزىن, ال 33 جىلدان اسقاندا 100 پايىزىن قۇرايدى.  «ناتيجەسىندە, ەڭبەك ءوتىلى مەن جيناقتاۋشى زەينەتاقى جۇيەسىنە نەعۇرلىم كوپ قاتىسقان ازاماتتاردىڭ زەينەتاقىسى جوعارى بولادى. 2018 جىلعى 1 شىلدەدەن باستاپ 2 ملن زەينەتكەردىڭ 44,7 پايىزى ەڭ تومەن كۇنكورىس دەڭگەيىنىڭ 74 پايىزىنان جوعارى الاتىن بولادى. 45,2 پايىزى ەڭ تومەن كۇنكورىس دەڭگەيىنىڭ 100 پايىزىن الادى نەمەسە بازالىق زەينەتاقىسى بۇگىنگىگە قاراعاندا 2 ەسە كوپ بولادى دەپ كۇتىلۋدە», – دەپ ناقتىلادى مينيستر.  ۆەدومستۆو باسشىسى اتاپ وتكەندەي, 2018 جىلدان باستاپ جۇمىس بەرۋشىلەردىڭ ءوز قىزمەتكەرلەرىنىڭ پايداسىنا 5 پايىز جارنالارى ەسەبىنەن قالىپتاستىرىلاتىن شارتتى-جيناقتاۋشى كومپونەنتىن ەنگىزۋ كوزدەلگەن بولاتىن. قالىپتاسقان ەكونوميكالىق احۋالدى ەسكەرە وتىرىپ, زاڭ جوباسىندا جۇمىس بەرۋشىنىڭ مىندەتتى زەينەتاقى جارنالارىن ەنگىزۋ مەرزىمىن 2018 جىلدان 2020 جىلعا اۋىستىرۋ قاراستىرىلعان.  بۇدان باسقا, زاڭ جوباسىندا بالالى وتباسىلاردى مەملەكەتتىك قولداۋعا باعىتتالعان نورمالار قاراستىرىلعان. بىرىنشىدەن, بالا تۋىنا بايلانىستى بەرىلەتىن بىرجولعى جاردەماقى مولشەرىن 20 پايىزعا ارتتىرۋ كوزدەلگەن. جاردەماقى مولشەرى ءبىرىنشى, ەكىنشى, ءۇشىنشى بالاعا 31,41 ايلىق ەسەپتىك كورسەتكىشتەن 38 ايلىق ەسەپتىك كورسەتكىشكە دەيىن (71 270 تەڭگەدەن 86 222 تەڭگەگە دەيىن), ءتورتىنشى جانە ودان كوپ بالاعا 52,35 ايلىق ەسەپتىك كورسەتكىشتەن 63 ايلىق ەسەپتىك كورسەتكىشكە دەيىن (118 783 تەڭگەدەن 142 947 تەڭگەگە دەيىن) ارتاتىن بولادى.  ەلىمىزدە جىلىنا 400 مىڭداي بالا دۇنيەگە كەلەتىنىن ەسكەرسەك, شامامەن 300 مىڭنان استام وتباسى ارتتىرىلعان مولشەردە جاردەماقى الادى. ناتيجەسىندە, 2017 جىلى جاردەماقىنىڭ مولشەرى 2016 جىلمەن سالىستىرعاندا 27 پايىزعا ارتادى.